TEEL 9
Tuu Yeehoowa mit tayn familye aan peete
‘Peet aan Tee woo te himel un ti eyert kemacht hot.’ (Apokalipsis 14:7)
Tiise piichelche hot uns ketsaycht tas ti Piipel fiile aanreete hot woo khene tich un tayn familye helfe. Yeehoowa wil tas tuu froo wërst. Eyer ferxprecht tas wëns tuu Tëm sayn aanpeetung in eyerst plats tuust, ‘wëre al ti anere tinge tich kep’. (Matheus 6:33) Yeehoowa wil aarich fiil tas tuu tëm sayn froynt wërst. Tan, mach ales was tuu khanst fer een ticht froyntxaft mit tëm uf paue. Tas is tas kreeste priwilëj woo een persoon khan hon. (Matheus 22:37, 38)
1 FERXTËRK TAYN FROYNXAFT MIT YEEHOOWA
WAS TI PIIPEL SAAT: “‘Ich wëre een fater fer aych, un teyer wërt khiner fer mich’, saat Yeehoowa.” (2 Korinter 6:18) Yeehoowa wil tayn peste froynt sin. Een aat fer tas hin kriin, is torich tas kepeet. Yeehoowa laat tich in fer ‘imer tsu tëm peete’. (1 Thesalooniker 5:17) Eyer wil kërn wise was tich soriche macht un was tayn tiifste ketanke sin. (Filiper 4:6) Wëns tuu, te man, mit tayn familye peetst, khene tayn fraa un tayn khiner siin wii ticht tayn froyntxaft mit Yeehoowa is.
Mit Kot fertseele is aarich wichtich, awer is aach wichtich tëm heere. Tuu khanst tas mache wëns tuu ti Piipel un piiplixe puplikatsyoone xtutiirst. (Psalm 1:1, 2) Tan, tenk triwer noo aan was tuu lërnst. (Psalm 77:11, 12) Fer Kot heere, is es wichtich tas tuu aach reeklich ti fersamlunge im Raych Saal pesuuchst. (Psalm 122:1-4)
Een aner aat fer tayn froyntxaft mit Yeehoowa ferxtërke, is iwer tëm mit te anere xpreche. Woo mee tuu tas machst, noch tichter wërt tayn froyntxaft mit Kot. (Matheus 28:19, 20)
WAS KHANST TUU MACHE?
-
Hool yeete taach tsayt fer peete un ti Piipel leese.
-
Helef tayn familye ti kaystlich aktiwiteete foer ti ferkniichung xtele.
2 PENUTS KUUT TI FAMILYE AANPEETUNG
WAS TI PIIPEL SAAT: “Khomt ticht tsu Kot, un eyer khomt ticht tsu aych.” (Tyako 4:8) Pleen mit tayn familye Yeehoowa reeklich aan peete un tuu tas in hale. (Xeenesis 18:19) Awer kepts noch etwas woo wichtich is: los Kot yeete taach teel in tayn leepe sin un ferxtërk ti froyntxaft fon tayn familye mit Tëm. Ti Piipel saat tas tuu solst iwer Kot mit tayn familye xpreche “wëns tuu in tayn haus setst, ufm weech keest, eeps tuu xloofe keest un wëns tuu uf xtayst”. (Teuteronoomyum 6:6, 7) Say pextimt fer Yosuee sayn payxpiil noo mache. Eyer hot kesaat: “Ich un mayn familye tuun Yeehoowa tiine.” (Yosuee 24:15)
WAS KHANST TUU MACHE?
-
Tenk aan was yeete eene fon te familye praycht un pleen een reeklich prokram fer tëne sayn neetichkheete fersoriche.
