LISIOON 13
Was saat ti Piipel iwich te futuer fon te relichioone?
1. Sin ti kanse relichioone kuut?
In yeete relichioon sin layt woo wole Kot kefale. Un Kot khimert sich mit tiise layt. Awer is xaat tas ti relichioone mache fiile tinge woo net kuut sin. (2 Coríntios 4:3, 4; 11:13-15) Torich ti notisye siit mer tas etliche relichioone sich soo kaar rin mexe in terorismus un kriich. Un kans oft heert mer tas ti phaatere un ti farer orer anere relichieese xëfe mache seksuaale xaate fer khiner. Tas lost ti layt woo Kot liipe aarich traurich. Lees Mateus 24:3-5, 11, 12.
Un noch, ti falxe relichioone tuun liieray in lërne iwich Kot un iwich was mit te toote pasiirt. Tas tsaycht tas se Kot net respektiire. Yeehoowa wil tas ti layt ti woerheet wise sole. Ti woere relichioon tuut in lërne was in ti Piipel xteet. Lees Eclesiastes 9:5, 10; 1 Timóteo 2:3-5.
2. Was tuut pasiire mit te relichioone?
Meyer prayche uns khee ketanke too triwer mache. Kot siit was ti relichioone mache un wii se ti layt hiner keen, hatich tuut eyer tii fernichte. Hot khee weyert een relichioon saan tas se Kot liipt un macht was tëm net kefalt. (Tiago 4:4) Ti Piipel nënt ti falxe relichioone wii “Papiloon, ti Kroos”, un saat tas tii fernicht wërt. Papiloon waar te naame fon een friirich xtat in Noee sayn taache. Tat hot ti falx relichioon aan kefang, noo ti tsayt woo ti welt uner kang is mit waser. Lees Apocalipse 17:1, 2, 5, 16, 17; 18:8.
Was pasiirt mit te layt woo wole Kot sayn wile mache awer sin noch in te falx relichioon? Yeehoowa hot tii net ferkes. Tee kept tëne ti keleechenheet fer lërne was in te Piipel xteet un fon te falx relichioon raus keen. Lees Miqueias 4:2, 5.
3. Was mise ti layt woo Kot liipe mache?
Ti woere relichioon lërnt ti layt inn eenich sin
Yeehoowa khimert sich fiil mit te layt woo ti woerheet liipe un ferlang tas se sole ti falx relichioon im xtich lose. Weer Kot liipt nëmt aan un macht was tee saat. Lees Apocalipse 18:4
Friier, fiil layt hon kelërnt iwich Kot sayn kuute notisye woo ti aphostele in kelërnt hon. Tii hon kelërnt leepe in een aat woo Yeehoowa kefalt un hon een xeen hofnung fer te futuer kriit. Meyer khëne mache wii tiise layt. Yeehoowa aan heere must tas haupste in unser leepe sin. Lees 1 Tessalonicenses 1:8, 9; 2:13.
Yeehoowa nëmt kuut aan tii woo aus te falx relichioon raus keen. Wëns tuu Yeehoowa sayn hërtslich inlaatung aan nëmst, kriist tuu tëm sayn froyntxaft, een liiplich familye woo iim aan peet un tas eewich leepe. Lees Marcos 10:29, 30; 2 Coríntios 6:17, 18.
4. Was fer kuut notisye hot Kot fer ti kanse layt?
Wën Kot ti falxe relichioone fernicht, wërt khee eene mee hiner kang. Ti layt kepe tan fray fon te liieray un tas leepe wërt laychter. Al tuun se te eensiche woere Kot aan peete soo wii eyer wil. Lees Apocalipse 18:20, 21; 21:3, 4.
