Unser Kriatoer is fiil kliiche wii meyer. Wii een liipliche fater phast eyer uns uf. Meyer prayche Kot fer froo sin. (Jeremias 10:23) Soo wii een kleen khint mus hilef fon sayn eltere hon, mise mer al Kot sayn hilef hon. (Isaías 48:17, 18) Ti Piipel kept uns tiise hilef. Tii is wii een kexenk fon Kot. Lees 2 Timóteo 3:16.

Wën mer Yeehoowa sayn kesetse aan heere khëne mer hayt frooer sin un wise was mache fer froo sin fer imer. Tas waar Kot woo uns kemacht hot, tes weeche, is es richtich sayn aanreete aan nëme.Lees Salmo 19:7, 11; Apocalipse 4:11.

Als mool, tsaycht ti Piipel een kesets woo tiint fer een spetsiifix situatsioon. (Deuteronômio 22:8) Un als mool, was ti Piipel tsaycht khan penuts wëre in unerxiitliche situatsioone im leepe. Tan, mise mer tenke iwich was mer in ti Piipel kelërnt hon fer kuute ëntxluse mache. (Provérbios 2:10-12) Tsum payxpiil, ti Piipel lërnt uns in, tas es leepe een kexenk fon Kot is. Wën mer uns tas erinere, mache mer ales fer unser leepe un aach ti anere sayns xitse. Meyer mache tas in unser aarwayt, te hëm un wën mer reese. Lees Atos 17:28.

Yeesus hot ketsaycht was fer tswaay kepoote ti haupste sin. Te eyerste tsaycht tas tas wichtiches im leepe is Kot khëne  lërne, liipe un tiiner. Meyer mise uns tas erinere wën mer ëntxluse mache. (Provérbios 3:6) Tii woo tas kepoot ërnst aan nëme kriin Kot sayn froyntxaft, woere frooheet un eewich leepe. Lees Mateus 22:36-38.

Tas tsweete kepoot khan uns helfe in friit mit ti anere leepe. (1 Coríntios 13:4-7) Fer se mache was tas kepoot saat, mise mer mit ti layt um keen soo wii Kot tas macht. Lees Mateus 7:12; 22:39, 40.

Ti Piipel lërnt ti familye in fer liiplich un eenich sin. (Colossenses 3:12-14) Tii saat tas ti hayrat sol fer imer sin, wayl tas xitst ti familye. Lees Gênesis 2:24.

Mache was ti Piipel uns in lërnt khan uns xitse in fiile aate. Tsum payxpiil, ti Piipel saat tas mer sole eerlich un flaysich sin. Ti meyerst xëfe hon liipe tiise sort aarwayter. (Provérbios 10:4, 26; Hebreus 13:18) Ti Piipel saat aach, tas unser froyntxaft mit Kot is wichticher wii tas kelt. Tii saat tas mer sole tsufriite sin wën mer tas nootwëntiche hon fer se leepe. Lees Mateus 6:24, 25, 33; 1 Timóteo 6:8-10.

Weer macht was ti Piipel saat tuut aach sayn kesuntheet xitse. (Provérbios 14:30; 22:24, 25) Tsum payxpiil, ti Piipel ferpoot net alkohool ketrënk, awer saat richt aus tas sauferay ferkheert is. Aan heere tas kesets tuut uns xitse fon xlime krankheete un unklike. (Salmo 104:15; 1 Coríntios 6:10) Ti Piipel tuut uns in lërne uf phase was mer mache un soo kaar was mer tenke. (Salmo 119:97-100) Sicher, mache was ti Piipel saat is aarich kuut fer uns. Awer, Kot sayn tiiner mache tas haupstsechlich wayl se wole Yeehoowa eere. Lees Mateus 5:14-16.