LISIOON 8
Warom kept tas soo fiil eelent?
1. Wii hot ti eelent aan kefang?
Tas is klaar tas ti mënxliche rechiirunge khene net unser xwiirichkheete am ën mache
Te Taywel waar een perfekt ëngel. Tee wust tas ploos Kot solt aan kepeet wëre. Awer te Taywel wolt aach aan kepeet wëre. Tan, hot tee keloo fer Ewa. Tes weeche, xteet in te Piipel tas tee “is net in te woerheet fest keplip”. (João 8:44) Ewa hot kemacht was te Taywel wolt un hot Kot net aan keheert. Nochter hot Aatam aach Kot net aan keheert. Soo hot ti eelent un te toot aan kefang. Lees Gênesis 3:1-6, 19.
Te Taywel is keeche Kot sayn rechiirung kang. Tee wolt hon tas ti anere tas aach mache solte. Tee hot tas ketsaycht wii eyer Ewa hiner kang hot. Hayt, wole ti meyeste layt net rechiirt wëre fon Kot. Tii sin ufm Taywel sayn sayt. Tes weeche, is “tee kheenich fon te welt” kep. Lees João 14:30; 1 João 5:19.
2. Hot Kot ti xult?
Nee. Ales was Yeehoowa macht is perfekt. Ti mënxe un ti ëngele hëte khëne Kot aan keheert hon wën se wolte. (Deuteronômio 32:4, 5) Kot hot uns ti frayheet kep fer raus suuche op mer wole tas richtiche orer tas ferkheerte mache. Wën mer Kot liipe, mach mer was richtich is. Lees Tiago 1:13-15; 1 João 5:3.
3. Warom hot Kot noch net ti eelent tsum ën kepracht?
Ti layt woo ufm Taywel sayn sayt sin tenke tas se Kot net praychte fer een kuut leepe hon. Kot tuut tëne een xanse kepe fer tas pewayse. Awer ti tsayt keet rom, un taach tsu taach wërt tas imer klaar tas ploos Kot sayn rechiirung khan woere frooheet fer ti mënxe pringe. (Eclesiastes 7:29; 8:9) Khee mënxlich rechiirung khont te kriich, ti kriminaliteet, ti unrëchtichkheet un ti krankheete am ën mache. Lees Jeremias 10:23; Romanos 9:17.
Kot sayn rechiirung is kans anerste wii ti mënxliche rechiirunge, wayl eyer tii woo uf sayn sayt sin uf phast. (Isaías 48:17, 18) In een khorts tsayt, tuut Kot een ën mache mit ti kanse mënxliche rechiirunge. Ploos weer Kot sayn rechiirung aan nëmt playpt uf te Eyert woone. — Isaías 11:9. Lees Daniel 2:44.
Kuk te wiiteo Warom eksistiirt soo fiil eelent un phayn?
4. Was khëne mer yets mache?
Meyer khëne tsayche op mer wole Kot sayn rechiirung orer ti mënxliche rechiirunge. Wii mer leepe tsaycht was mer raus kesuucht hon. Te Taywel saat tas nimant teet Kot tiine weeche liip. Awer mer khëne tsayche tas te ferkheert is. Lees Jó 1:8-12; Provérbios 27:11.
5. Wii tsayche mer tas mer wole Kot sayn rechiirung?
Was mer mache tsaycht tas mer uf Kot sayn sayt sin
Meyer tsayche tas mer wole Kot sayn rechiirung torich ti Piipel lërne un ti tinge mache soo wii Kot wil. (João 4:23) Un aach soo wii Yeesus, mache mer net teel in politik un aach net im kriich. Tas tsaych tas mer uf Kot sayn sayt sin un net ufm Taywel sayn sayt. Lees João 17:14.
Te Taywel macht ales tas ti layt tenke sole tas ferkheerte tinge normaal sin. Tan, wën mer tiise tinge net mee mache, etliche froynte orer ferwanter tuun xpote orer sin too keeche. (1 Pedro 4:3, 4) Meechte mer mache was ti layt wole orer was Kot wil? Te Taywel saat tas mer teete ploos Kot aan heere wëns laycht weyer. Awer Kot sayn kesetse sin kuut fer uns, wën mer se aan heere, tsayche mer tas te Taywel een liichner is. Lees 1 Coríntios 6:9, 10; 15:33.
Kot liipt ti layt. Tes weeche, khan mer sicher sin tas eyer ti eelent tsum ën pringt. Weer tas klaapt un heert Kot aan tuut fer imer uf te Eyert leepe. Lees João 3:16.
