LISIOON 6
Was pasiirt wën te mënx xtërept?
1. Was fer kuute notisye hot Kot iwich ti toote?
Lasaro un sayn xwestere, Marta un Maria, hon ticht aan Yeruusalëm kewoont. Wii Yeesus tat hin khom is, waar sayne froynt Lasaro fier taache xon toot. Yeesus is mit Marta un Maria hin kang uf tas plats woo Lasaro pekraapt waar. Klaych hon layt sich kesamelt. Yeesus hot Lasaro fom toot uf keruuft! Tenk mool ti frooheet woo Marta un Maria kexpiirt hon wën se kesiin hon iire pruuter noch mool am leepe. Lees João 11:21-24, 38-44.
Yeehoowa tuut ti toote fom toot uf ruufe fer uf te Eyert leepe. Marta wust xon fon tiise kuute notisye fon Kot. Lees Jó 14:14, 15.
2. Was pasiirt wën mer xtërpe?
Kot hot fer Aatam kesaat: “Tuu pist xtaap un tsum xtaap tuust tuu tsurik keen.” —GÊNESIS 3:19.
Yeehoowa hot uns fom xtaap kemacht, mer hon khee seel woo in unser khërper woont. Wën mer xtërpe is khee teel fon uns woo iwerleept. (Gênesis 2:7; 3:19) Was mer xpiire un tenke tuut ferkeen. Tas is was mit Lasaro pasiirt is. Tes weeche, hot tee niks kesaat wiis im toot waar, wayl ti toote niks mee wise. Lees Eclesiastes 9:5, 6, 10.
Host tuu xon keheert tas Kot ti layt in te fayer hël ferprëne tuut? Tas is een liieray! Ti Piipel tsaycht tas ti toote niks mee xpiire un tenke. Te inlërnung fon fayer hël is falx un tuut tsum ferxteen kepe tas Kot xlëcht is. Tee teet nii yemant ferprëne, Kot hast tas. Lees Deuteronômio 12:31.
Kuk te wiiteo Was pasiirt wën mer xtërpe?
3. Meechte ti toote mit uns xpreche khëne?
Ti toote khëne net xpreche un heere. (Salmos 115:17) Awer es kept xlechte kayste woo mit ti mënxe xpreche, tii ferxtele sich tas ti layt tenke sole tas es weyer te toote woo xpreche teet. (2 Pedro 2:4) Yeehoowa saat tas mer sole net fersuuche mit ti toote xpreche. Lees Deuteronômio 18:10, 11.
4. Weer wërt uf keruuft?
Milioone woo kextorep sin wëre uf keruuft fer noch mool uf te Eyert leepe. Soo kaar tii woo net iwich Kot kelërnt hon un hon tinge kemacht woo Kot net kefale. Lees Lucas 23:43; Atos 24:15.
Tii woo uf keruuft wëre tuun ti woerheet iwich Kot lërne. Tan, torich Yeesus aan heere pewayse se iire klaape. (Apocalipse 20:11-13) Wën se mache was richtich is, tuun se fer imer uf te Eyert leepe. Lees João 5:28, 29.
5. Was tsaych ti ufxtaye fom toot iwich Yeehoowa?
Ti toote khëne noch mool leepe wayl Yeehoowa hot sayne Soon kexikt fer sayn leepe ap kepe weeche uns. Soo, ti ufxtaye tsaycht Yeehoowa sayn liip un kuutheet. Fon ale mënxe woo uf keruuft wëre, weer wils tuu kërn aan trefe? Lees João 3:16; Romanos 6:23.
