Nee. Yeesus waar te eyerste persoon woo Kot kemacht hot. Eep eyer uf ti eyert khom is, waar eyer een ëngel un hot im himel kewoont. (João 8:23) Yeesus hot sayne Fater keholef ales mache. Ti Piipel nënt iim te “eensich kepoorene” soon. Tas petayt tas eyer te eensiche is woo Kot aleen kemacht hot. (João 1:14) Yeesus hot Kot sayn orientiirung aus kericht fer anere, weeche tas nënt ti Piipel iim “tas Wort”. Lees Provérbios 8:22, 23, 30; Colossenses 1:15, 16.

Yeesus is weeche tray uersache uf ti Eyert khom. (1) Ti woerheet iwer Kot in lërne, (2) tsayche wii Kot sayn wile mache soo kaar uner xwiirichkheete un (3) sayn perfekt leepe wii een opfer kepe fer uns “fray se khaafe”. Wii is Yeesus uf ti welt khom? Kot hot een wuner kemacht, un een meete, Maria, is xwanger kep. Tas khint waar Yeesus. Lucas 1:30-35. Lees Mateus 20:28.

Meyer al mise fon te sint un fom toot fray kekhaaft wëre. Wii Kot Aatam kemacht hot, wolt eyer net hon tas ti layt solte alt wëre un xtërpe. Kot wolt tas Aatam iim aan heere solt tas se fer imer leepe khënt. Awer Aatam hot Kot net aan keheert. (Gênesis 2:16, 17; 5:5) Un tan, torich Aatam is te sint uf ti welt khom. Ale sayn nookhomer hon te sint keërpt un tes weeche tuun se xtërpe. Soo waar een fray khaaf opfer neetich fer uns fon te sint  un fom toot fray se mache. Êxodo 21:29, 30. Lees Romanos 5:12; 6:23.

Weer khënt tan te prays petsaale fer uns fom toot fray se khaafe? Es mist yemant sin woo khee sinte hët. Lees Salmo 49:7-9.

Yeesus is kextorep wayl eyer ti mënxe liipt. Tee hat net fertiint xtërpe wayl eyer perfekt waar. Awer, toch noch hot eyer sayn Fater aan keheert un hot sayn leepe kep fer uns fom sint fray se mache. Weeche Yeesus sayn opfer, khan Kot te sint fon te mënxe fertsaye. Kot hot sayn liip ketsaycht wii eyer sayne Soon kexikt hot fer uns se rete. Lees João 3:16; Romanos 5:18, 19.

Kuk te wiiteo Fer was is Yeesus kextorep?

Yeesus is Kheenich un tuut im himel rechiire. Wii tee uf te Eyert waar hot eyer mënxe fom toot uf keruuft, kranke kesunt kemacht un tas eelent fon fiile wech kexaft. (Mateus 15:30, 31; João 5:28) Noo tëm woo eyer kextorep is, hot Kot tee uf keruuft fer im himel leepe. (1 Pedro 3:18) Tan, hot Yeesus kewaart pis Yeehoowa tëm kesaat hot tas eyer khënt aan fange se rechiire. (Hebreus 10:12,13) Fiil layt in te kans welt tuun tee aan heere un tuun anere in lërne tas Yeesus Kheenich is. Ti kuute tinge woo eyer hiir uf te Eyert kemacht hot, tsayche was eyer im futuer mache tuut. Lees Daniel 7:13, 14; Mateus 24:14.

In khorts tsayt, tuut Yeesus ti xlechte fernichte un nimant tuut mee xlimes mit mache. Weer klaapt un heert Yeesus aan, tuut tan fer imer in een paratiis uf te Eyert leepe. Lees Salmo 37:9-11.