Priif fom Rechiirente Khërperxaft
‘Tëyer solt leerer sin.’ (Heb 5:12) Tënkt aan tas! Yeehoowa, te kreeste Leerer fom Uniwërsum, hot uns in kelaat fer ti layt iwer tëm in se lërne! Ti woerheet iwer Yeehoowa in te familye, kemaynt orer im preetich aarwayt in se lërne, is was ëkstras un een kroos responsapiliteet. Tan, wii khëne mer een kuute leerer sin?
Te aphostel Phaul hot ti antwort këp. Tee hot fer Timoteo kexrip: “Tuu wayter tich aan xtrënge fer puuplix se leese, fer uf se muute, fer in se lërne.” Un tee hot aus keleet warom tas neetich wëyer: “Wëns tuu tas machst, tuust tich sëlepst un tii woo tich aan heere rëte.” (1 Tim 4:13, 16) Was mëyer fer ti layt preetiche, khan tëne sayn leepe rëte. Tës weeche is es wichtich ti aat wiis tuu leest un in lërnst ferpësere. Tiise puplikatsioon is kemacht kewaar fer tich se hëlfe. Kuk mool ëtliche hilfe:
In yeete sayt, këpts een Piipel tëkst woo khan een piiplix printsiip sin, woo mit ti lisioon se tuun hot orer payxpiile wii ti lisioon aan wëne.
Tiise puplikatsioon tuut tich hëlfe een pëser leeser un leerer sin. Awer tuu tich nii ferkëse tas Yeehoowa te “Kroose Leerer” is. (Isa. 30:20) Ti noorichte woo mer aus richte, khome fon tëm un is tee woo ti layt pay pringt. (João 6:44) Tës weeche, tuu imer peete un ferlang hayliche kayst un penutst ti Piipel. Hëleft ti layt se ferxteen was Yeehoowa iwer een phunkt tënkt xtats saan was tuu tënkst. Tayn opjetiiw mus sin ti layt hëlfe Yeehoowa hërtslich liipe.
Tuu pist inkelaat këpt fer ti wichtichste aarwayt se mache woo yemant mache khënt: ti woerheet iwer Yeehoowa in se lërne. Wëns tuu wayter “aan ti kraft woo Kot këpt” traust, tuust tuu sicher een kuute leerer wëre. (1 Ped 4:11)
Fon ayere froynte woo mit aych tiine un in lërne,
Rechiirente Khërperxaft fon Yeehoowa sayn Tsayer
