Liipe priiter un xwestere:

Ti liip tsu Kot un tsu ti layt tuut uns uf muute se mache tas was ti Piipel saat: ‘Keet, macht tisipele fon mënxe fon ale natsyoone un taaft se.’ (Mat. 28:19, 20; Mar. 12:28-31) Ti woere liip tsu ti anere hot fiil macht. Tii khan tas hërts aan krayfe fon te layt ‘woo ti richtich muut fer tas eewiche leepe hon’. (Aph. 13:48)

Friier, hon mer uns traan kehal fer ti foerxtelunge ausm khop wise un puplikatsyoone fer ti layt lose. Yets, is es neetich unser apiliteet fer mit te anere fertseele, ferpesere. Meyer wole liip tsu ti layt tsayche wën mer iwer tinge xpreche woo fer tii interesant sin. Tas petayt tas mer wole uns aan phase un uns aan xtrenge fer noo tenke aan was yeete persoon sich soriche macht un sich interesiirt. Wii tuut tiise piichelche uns helfe tas mache?

Tiise piichelche hot 12 lisyoone woo tuun uns in lërne etliche kwaliteete woo mer mise ëntwikele fer liip tsayche un tisipele mache. Yeete lisyoon halt sich in een kexicht fon te Piipel woo pringt een kwaliteet foer woo Yeesus orer eene fon te eyerste kriste in te preetich ketsaycht hon. Unser opjetiiw is net unser foerxtelunge ausm khop wise, awer aate fine fer liip tsu ti layt tsayche. Es is woer tas yeete eene fon tiise kwaliteete is neetich in ale aspëkte fon te preetich aarwayt. Awer meyer tuun siin wii etliche kwaliteete sin hauptseechlich wichtich fer kexpreeche aan fange, rik pesuuche mache orer Piipel xtuutye fiire.

Wëns tuu yeete lisyoon xtutiirst, tenk triwer noo aan wiis tuu ti kwaliteet fon te lisyoon tsayche khanst wëns tuu mit te layt fon tayn teritoryum xprechst. Fersuuch tayn liip tsu Yeehoowa un tsu ti layt ferkreesere. Mee wii kwalkee apiliteet, es is ti liip woo tich helfe tuut ti opjetiiw trefe fer tisipele mache.

Fer uns, is es een priwilëj in eenichkheet mit aych xafe. (Sof. 3:9) Meyer winxe tas Yeehoowa ayre aanxtrengunge fer ti layt liipe un tisipele mache wayter fiil seechent!