LISYOON 01

Wii khan ti Piipel tich helfe?

FOERXPIILE

Neekst ale mache sich frooche iwich tas leepe, ti eelent, te toot un te tsukhunft. Meyer mache aach uns ketanke iwich tinge woo mer mise taach tsu taach mit um keen wii kelt fertiine fer uns soriche un wii een froo familye hon. Fiil layt hon in ti Piipel kefun ti antworte fer ti haupste frooche im leepe. Un ti Piipel kept aach kuute aanreete fer een froo leepe hon. Mënst tuu tas ti Piipel khent yemant helfe woos tuu khënst?

1. Was fer frooche tuut ti Piipel antworte?

Ti Piipel kept ti antwort fer wichtiche frooche. Tsum payxpiil: Wii hot tas leepe aan kefang? Hot tas leepe een opjetiiw? Warom tuun ti layt eelent mit mache? Was pasiirt wën yemant xtërpt? Warom kept es soo fiil kriich wën se ale friit wole? Was tuut mit ti welt pasiire? Tas is net ferkheert tiise frooche mache. Milyoone mënxe hon raus kriit tas mer khene klaape aan ti antworte woo ti Piipel kept.

2. Wii khan ti Piipel uns helfe taach tsu taach frooer sin?

Ti Piipel kept kuute aanreete. Tsum payxpiil, tii heleft ti familye wërklich froo sin. Tii tsaycht uns wii mit strees um keen un wii mee frayt in unser aarwayt hon. Tiise puplikatsyoon heleft tich wise was ti Piipel iwich tiise sache un anere in lërnt. Fiilaycht, mit te lëngt, nëmst tuu aan tas “ti kans xrift [orer, ti kans Piipel] is . . . nutslich”. — 2 Timoteus 3:16.

Tiise puplikatsyoon ersetst net ti Piipel. Xtats, tuut se tich uf muute fer ti Piipel peser khëne lërne. Tes weeche, xtreng tich aan fer ti Piipel tekste woo kenënt sin in tiise lisyoone leese un ferklaych tas mit was tuu lërnst.

LËRN MEE

Mërk wii ti Piipel ti layt heleft, was tuu mache khanst fer ti Piipel kërn leese un warom is es kuut hilef hon fer peser ferxteen was se saat.

3. Ti Piipel khan uns lënke

Ti Piipel is wii tas xtarek licht fon een plitslamp. Ti khan uns helfe kuute ëntxlise mache un tsaycht was noch pasiire tuut.

Leest te Psalm 119:105. Noochte xprecht iwich tiise frooche:

Was hot te xrayper fon tiise Psalm iwich ti Piipel ketenkt?
Was tenkst tuu iwich ti Piipel?

4. Ti Piipel khan unser frooche antworte

Kuk wii ti Piipel een leerin keholef hot ti antworte fine fer frooche woo se xon lang triwer ketenkt hot. Kukt te WIITEO, un noochte xprecht iwich tiise frooche:

WIITEO: Tuu net ti hofnung ferliire! (1:48)

Im wiiteo, was fer sort frooche hat ti leerin?
Wii ti Piipel xtutiire hot ti leerin keholef?

Ti Piipel tuut uns uf muute fer ti antworte suuche fer unser frooche. Leest Matheus 7:7. Noochte xprecht iwich tiise frooch:

Fer was fer frooche teest tuu kërn ti antworte in ti Piipel fine?

5. Ti Piipel leese, khan tich kefale

Fiil layt tuun kërn ti Piipel leese, un tas tuut tëne fiil helfe. Kukt te WIITEO. Noochte xprecht iwich tiise frooche:

WIITEO: Ti Piipel leese (2:05)

Im wiiteo, warom hon ti yunge net kërn keleest?
Awer warom leese se kërn ti Piipel?

Ti Piipel treest un kept hofnung. Leest Romaaner 15:4,. Noochte xprecht iwich tiise frooch:

Teest tuu kërn mee wise was ti Piipel ferxprecht iwich troost un hofnung?

6. Anere khene uns helfe ti Piipel ferxteen

Fiil woo ti Piipel aleen keleest hon, hon kemërkt tas mit anere xpreche iwich ti Piipel tuut helfe. Leest Aphostele sayn Kexicht 8:26-31. Noochte xprecht iwich tiise frooch:

Wii khene mer ti Piipel ferxteen? — Kukt ti wërs 30 un 31.

In tas puuch Aphostele sayn Kexicht, praucht eene man hilef fer ti Xrifte ferxteen. Hayt se taach, fiil layt tuun aach tenke tas mit anere xpreche iwich ti Piipel khan tëne helfe.

ETLICHE SAAN: “Piipel xtutiire is tsayt ferliire.”