LISYOON 06
Wii hot tas leepe aan kefang?
Ti Piipel saat tas Kot ‘ales kemacht hot’. (Apokalipsis 4:11) Klaapst tuu tas? Etliche layt klaape net tas Kot uns tas leepe kept hot. Wën tas woer is, tan is unser leepe khom torich een unfal, un hot khee tswëk. Awer, wën Yeehoowa uns tas leepe kept hot, tan mus es een opjetiiw hon, mënst tuu net? a (Kuk ti noote.) Meyer wole siin was ti Piipel saat iwich wii tas leepe aan kefang hot. Un aach, warom meyer too traan klaape khene.
1. Wii hot te Uniwërsum aan kefang?
Ti Piipel saat: “Am aanfang hot Kot te himel un ti eyert kemacht.” (Xeenesis 1:1) Ti meyerste syentiste klaape tas te Uniwërsum een aanfang hat. Awer wii hot te Uniwërsum aan kefang? Kot hot sayn aktiiw kraft — sayne hayliche kayst — penutst fer te Uniwërsum mache, tepay kerechent sin ti kalaksye, ti xtërne un planeete. — Xeenesis 1:2.
2. Warom hot Kot ti Eyert kemacht?
Yeehoowa hot net ti eyert “umsonst kemacht, awer hot se kemacht fer pewoont se wëre”. (Isayas 45:18) Kot hot ti Eyert kemacht mit een opjetiiw: Tee wolt tas ti Eyert solt een kuut haymat fer ti mënxe sin, un tas se fer imer uf ti Eyert leepe solte. (Lees Isayas 40:28; 42:5.) Ti syens tsaycht tas ti Eyert eensich is. Ti syentiste hon khee anere planeet kefun woo ales hat was mer prayche fer tas leepe hale.
3. Was macht tas ti mënxe anerste sin wii ti tiere?
Noo tëm woo Yeehoowa ti Eyert kemacht hot, hot eyer ti plantse un ti tiere kemacht. Tan, “Kot hot te man noo sayn pilt kemacht”. (Lees Xeenesis 1:27.) Was macht tas ti mënxe soo spetsyaal sin? Wayl mer noo Kot sayn pilt kemacht sin, tes weeche khene mer sayne kwaliteete noo mache, soo wii ti liip un ti kerechtichkheet. Kot hot uns aach kemacht mit ti apiliteet fer xprooche lërne un uns fraye mit musik un xeene tinge. Un, anerste wii ti tiere, khene mer Kot, unser Kriatoer, tiine.
LËRN MEE
Yets tuun mer tray tinge lërne: (1) tas tas leepe een proyëkt hot, (2) tas was ti Piipel aus leet iwich wii Kot ti Eyert kemacht hot tuut wërklich xtime un (3) was khene mer lërne iwich Kot torich ti mënxe sayn kwaliteete.
4. Tas leepe hat een proyëkt
Ti mënxe wëre keloopt wën se etwas aus tenke woo noo macht was es in ti natuer kept. Awer mënst tuu net, tas tee woo ti natuer kemacht hot mist noch mee keloopt wëre? Kukt te WIITEO. Noochte xprecht iwich tiise frooch:
-
Was hon ti mënxe fon te natuer ap kekukt?
Yeete haus hot een proyëkt un is fon yemant kepaut kept. Awer weer hot ti tinge fon te natuer kepleent un kemacht? Leest Hepreeyer 3:4. Noochte xprecht iwich tiise frooche:
-
Was fer proyëkte in ti natuer tuun tich wunere?
-
Meecht tas meechlich sin klaape tas yemant te Uniwërsum un ales was tsu keheert kemacht hot? Warom tenkst tuu soo?
Wust tuu?
Tuu khanst anere artikele un wiiteos iwich tiise sache fine im jw.org, in ti sesyoon “Hots yemant kepleent?” un “Opiniões sobre a origem da vida”.
“Natiirlich is yeete haus fon yemant kepaut woer, awer tas waar Kot woo ales kemacht hot.”
5. Ales was ti Piipel saat iwich ti kriatsyoon xtimt
In Xeenesis kapitel 1, xprecht ti Piipel iwich ti kriatsyoon fon ti Eyert un fom leepe. Mënst tuu ma khënt klaape aan was ti Piipel saat? Orer mënst tuu tas weyer ales aus ketacht? Kukt te WIITEO. Noochte xprecht iwich tiise frooche:
-
Meecht ti Piipel in lërne tas ti Eyert kemacht woer is in seks taache fon 24 xtune?
-
Mënst tuu tas was ti Piipel aus leet iwich ti kriatsyoon xtimt? Warom tenkst tuu soo?
Leest Xeenesis 1:1. Noochte xprecht iwich tiise frooch:
-
Ti syentiste saan tas te Uniwërsum een aanfang hat. Wii xtimt tas mit was tuu in te Piipel keleest host?
Etliche layt tenke tas Kot ti ewolutsyoon penutst hot fer tas leepe mache. Leest Xeenesis 1:21, 25, 27. Noochte xprecht iwich tiise frooche:
-
Meecht ti Piipel in lërne tas Kot ti ewolutsyoon penutst hot fer fix, anere tiere un ti mënxe mache? Orer hot tee ale lepeentiche kriatuer kemacht noo iire aychne “sorte”? b — Kuk ti noote.
6. Ti mënxe sin een spetsyaal kriatsyoon fon Kot
Meyer sin anerste wii ti tiere woo Yeehoowa kemacht hot. Leest Xeenesis 1:26. Noochte xprecht iwich tiise frooch:
-
Ti mënxe khene liip un mitlayt tsayche wayl se wii Kot sayn pilt kemacht sin. Was lërnt uns tas iwich Yeehoowa sayn personaliteet?
ETLICHE SAAN: “Was ti Piipel saat iwich ti kriatsyoon is net woer. Tas is ausketachtne tings.”
-
Was mënst tuu? Warom?
IN KHORTSE WËRTER
Yeehoowa hot te Uniwërsum un ale lepeentiche kriatuer kemacht.
Was hon mer kelërnt?
-
Was lërnt ti Piipel iwich wii te Uniwërsum aan kefang hot?
-
Meecht Kot ti ewolutsyoon penutst hon fer ale sorte lepeentiche kriatuer mache? Orer hot tee yeete een noo tëne sayn aychne sort kemacht?
-
Was macht tas ti mënxe spetsyaal sin?
FER MEE WISE
Kuk payxpiile fon ti natuer woo tsayche tas een Kriatoer eksistiirt.
“Was tuut ti natuer uns in lërne?” (Despertai!, Septemper 2006)
Kuk wii ti eltere khene fer iire kleene khiner aus leyer was ti Piipel saat iwich ti kriatsyoon.
Mërk op tas meechlich is in ti selwich tsayt klaape aan ti ewolutsyoon un aan ti kriatsyoon.
“Mecht Kot ti ewolutsyoon penutst hon fer unerxiitliche kriatuer mache?” (Artikel fom jw.org)
Etliche saan tas ti fosil un ti syentifixe sperimente xtitse ti ewolutsyoon. Awer meecht tas wërklich soo sin?
A origem da vida — Cinco perguntas que merecem resposta (piichelche)
a Noote: In lisyoon 25, lërne mer was Kot sayne wile fer ti mënxe is.
b Noote: In te Piipel, tas wort “sort” petayt een fiil kreeser krup fon tiere un plantse wii tas wort “sort” woo ti syentiste penutse.
