LISYOON 07

Wii is Yeehoowa?

FOERXPIILE

Wii is Yeehoowa?

Was mënst tuu, wii is Yeehoowa? Mënst tuu tas tee aarich mechtich is, awer is aarich wayt wech fon tich, soo wii ti xtërne im himel? Orer mënst tuu tas tee khee persoon is, awer een mechtich kraft fon ti natuer soo wii tunere? Weer is wërklich Yeehoowa? Ti Piipel xprecht iwich etliche fon Kot sayn kwaliteete, un tas tee sich um tich khimert.

1. Warom khene mer Kot net siin?

Ti Piipel saat in Yoohan 4:24: “Kot is een kayst.” Yeehoowa hot net een fisixe khërper. Tee is een kayst woo im himel leept, in een plats woo mer net siin khene.

2. Was fer kwaliteete hot Yeehoowa?

Is woer tas mer net Yeehoowa siin khene. Awer, wën mer mee iwich iim lërne, siin mer tas tee wërklich een persoon is, mit wuner xeene kwaliteete. Ti Piipel saat tas “Yeehoowa liipt ti kerechtichkheet, un tee tuut tii, woo leaal tsu tëm sin, net im xtich lose”. (Psalm 37:28) Tee hot aach “kroos mitlayt un parmhërtslichkheet”, tee tauert ti layt, hauptseechlich tii woo layte. (Tyako 5:11) Yeehoowa is ticht pay tëne woo een ferprochne hërts hon, “eyer ret tii woo khee muut hon”. (Psalm 34:18, noote) Wust tuu tas wii mer uns aan xtele tuut Yeehoowa petrefe? Wii soo? Wën yemant raus suucht mache was ferkheert is, wërt Yeehoowa traurich. (Psalm 78:40, 41) Awer Yeehoowa frayt sich wën te persoon macht was richtich is. — Lees Xpriiche 27:11.

3. Wii tsaycht Yeehoowa tas tee uns liipt?

Yeehoowa sayn haupst kwaliteet is ti liip. Tes weeche, saat ti Piipel tas “Kot is liip”. (1 Yoohan 4:8) Meyer khene Yeehoowa sayn liip siin net ploos aan was mer in ti Piipel leese, awer aach aan ales was tee kemacht hot. (Lees Aphostele sayn Kexicht 14:17.) Tsum payxpiil, mërk ti aat wii mer kemacht sin. Tee hot uns ti apiliteet kep fer xeene farpe siin, wunerliche musike horiche un ese was kuut xmëkt. Tee wil tas mer sole seer froo sin.

LËRN MEE

Lërn was Yeehoowa penutst fer wunerliche tinge mache. Un aach wii Yeehoowa sayn kwaliteete tsaycht.

4. Te hayliche kayst is Kot sayn aktiiw kraft

Soo wii meyer unser hënt penutse fer een aarwayt xafe, tuut Yeehoowa sayne hayliche kayst penutse. Etliche tenke tas te hayliche kayst is Kot, awer ti Piipel saat tas te hayliche kayst is ti kraft woo Kot penutst fer mache ales was tee wil. Leest Lukas 11:13 un Aphostele sayn Kexicht 2:17. Noochte xprecht iwich tiise frooche:

Wii mer kesiin hon, Kot ‘xit aus’ sayne hayliche kayst iwich tii woo tas fon Kot ferlange. Tan, mënst tuu tas te hayliche kayst is Kot orer Kot sayn aktiiw kraft? Warom tenkst tuu soo?

Yeehoowa penutst sayne hayliche kayst fer wunerliche tinge mache. Leest Psalm 33:6 un 2 Pheeter 1:20, 21. Noochte xprecht iwich tiise frooch:

Wii penutst Yeehoowa sayne hayliche kayst?

5. Yeehoowa hot wunerliche kwaliteete

Mooses waar Kot sayne troye tiiner. Ale tëm, wolt tee mee lërne iwich te Kriatoer. Tes weeche, hot Mooses tsu Yeehoowa kesaat: “Los mich tayn weeche wise, tas ich tich khëne lërne.” (Eeksotus 33:13) Tan, hot Yeehoowa tsu Mooses sayn kwaliteete pekhant kemacht. Leest Eeksotus 34:4-6. Noochte xprecht iwich tiise frooche:

Was fer kwaliteete fon Yeehoowa hot Mooses kelërnt?
Was fer een fon Yeehoowa sayn kwaliteete tuut tich mee kefale?

6. Yeehoowa khimert sich mit te layt

Ti hepreeyxe waare friier Kot sayn folek, un tii waare sklaawe in Ejipt. Wii hot Yeehoowa sich kexpiirt wii eyer kesiin hot sayn folek layte? Horicht te AUTYO un halt ti leesung noo, orer leest Eeksotus 3:1-10. Noochte, xprecht iwich tiise frooche:

AUTYO: Yeehoowa khimert sich mit tëne sayn eelent (2:45)

Wii tuut Yeehoowa sich xpiire wën tee siit ti mënxe layte? — Kukt ti wersikele 7 un 8.
Mënst tuu tas Yeehoowa wil wërklich ti mënxe helfe? Meecht tee ti kraft hon fer tas mache? Warom tenkst tuu soo?

7. Ti natuer lërnt uns iwich Yeehoowa sayn kwaliteete

Meyer khene iwich Yeehoowa sayn kwaliteete lërne wën mer peopachte ti tinge woo tee kemacht hot. Kukt te WIITEO. Noochte, leest Romaaner 1:20, un xprecht iwich tiise frooch: