Fer yemant sayn fraaynt sin, must tuu tee kuut khëne. Mit Yeehoowa is tas aach soo. Tee wil tayn fraaynt sin. Tes weeche, wil tee tas tuu sayn kwaliteete khëne solst un aach ti aat wii eyer ales kemacht hot, un wise tas tee een xeene tsukhunft fer tich hot. Yeehoowa wil tas soo fiil mee wiis tuu iwich iim lërnst, soo fiil mee wilst tuu tëm sayn fraaynt sin. Is tas wërklich meechlich Kot sayn fraaynt sin? (Lees Psalm 25:14.) Was must tuu mache fer tëm sayn fraaynt sin? Ti Piipel kept ti antwort. Tii tsaycht aach warom ti fraayntxaft mit Yeehoowa is ti wichticher fraayntxaft woos tuu khanst hon.

1. Was fer inlaatung macht Yeehoowa tich?

Ti Piipel saat: “Khomt ticht tsu Kot, un Eyer wërt ticht tsu aych khome.” (Tyako 4:8) Was petayt tas? Tas Yeehoowa tich in laat fer sayn fraaynt sin. Etliche khene tenke: ‘Wii khan ich Kot sayn fraaynt sin wën ich tee kaar net siin khan?’ Awer, Yeehoowa saat in ti Piipel ales was mer iwich iim wise prayche. Soo, khene mer ticht pay iim khome. Wën mer ti Piipel leese, wërt unser fraayntxaft mit Yeehoowa imer xtërke, wën mer iim aach net siin khene.

2. Warom is Yeehoowa te peste Fraaynt woos tuu khanst hon?

Nimant liipt tich mee wii Yeehoowa. Tee wil tas tuu solst froo sin un sayn hilef ferlange imer wëns tuu prauchst. Tuu khanst tayn ‘kanse soriche uf tëm wërfe, wayl Tee tich uf phast’. (1 Pheeter 5:7) Yeehoowa is imer fërtich fer xtitse, treeste un horiche was sayn fraaynte saan. — Lees Psalm 94:18, 19.

3. Was waart Yeehoowa fon sayn fraaynte?

Yeehoowa liipt ale mënxe, awer tee “hot ëng fraayntxaft mit te ufrichtiche”, orer mit tii woo kerecht sin. (Xpriiche 3:32) Yeehoowa wil tas sayn fraaynte sich aan xtrenge sole fer mache was tee saat woo richtich is un net mache was ferkheert is fer iim. Etliche tenke: ‘Ich wëre nii ales mache khene was Kot ferlangt.’ Awer Yeehoowa ferxteet uns. Ale woo iim liipe un mache ales was se khene fer iim kefale khene sayn fraaynte sin. — Psalm 147:11; Aphostele sayn Kexicht 10:34, 35.

 LËRN MEE

4. Apraham waar Yeehoowa sayn fraaynt

Was ti Piipel saat iwich Apraham (aach kenënt Apran) heleft uns ferxteen was petayt Yeehoowa sayn fraaynt sin. Leest iwich Apraham in Xeenesis 12:1-4. Noochte xprecht iwich tiise frooche:

• Was hot Yeehoowa ferlangt tas Apraham mache solt?

• Was hot Yeehoowa Apraham ferxproch?

• Was hot Apraham kemacht?

5. Was waart Yeehoowa fon tëm woo sayn fraaynt is?

Kans oft, waart mer etliche tinge fon unser fraaynte.

• Was fer tinge host tuu kërn tas tayn fraaynte mache fer tich?

Leest 1 Yoohan 5:3. Noochte xprecht iwich tiise frooch:

• Was waart Yeehoowa fon sayn fraaynte?

Fer Yeehoowa aan heere mise mer, im xtant, ënere ti aat wii mer uns aan xtele orer unser personaliteet. Leest Isayas 48:17, 18. Noochte xprecht iwich tiise frooch:

• Warom ferlangt Yeehoowa tas sayn fraaynte ënerunge in iire leepe mache sole?

 6. Was macht Yeehoowa fer sayn fraaynte?

 IN KHORTSE WËRTER

Yeehoowa wil tayn fraaynt sin, un tee tuut tich helfe ticht tsu iim khome.

Was hon mer kelërnt?

• Wii heleft Yeehoowa sayn fraaynte?

• Warom ferlangt Yeehoowa tas sayn fraaynte ënerunge in iire leepe mache sole?

• Mënst tuu tas es xweer is Yeehoowa sayn fraaynt sin? Warom tenkst tuu soo?