LISYOON 09

Peete ferxtërkt unser fraayntxaft mit Yeehoowa

FOERXPIILE

Prauchst tuu xon een kuut aanreet fer etwas woos tuu mit kemacht host? Host tuu wichtiche frooche woos tuu kërn ti antwort fine teest? Prauchst tuu ketreest un kextitst wëre? Teest tuu tich kërn tichter pay Yeehoowa xpiire? Peete is een kroos hilef. Awer, wii is ti richtich aat fer peete? Meecht Kot ale kepeete horiche? Was khanst tuu mache tas Kot tayn kepeete horicht? Wole mer siin.

1. Fer weem sole mer peete, un iwich was?

Yeesus hot in kelërnt tas mer ploos tsu unser Fater im himel peete sole. Tee saat: “Tes weeche, mist teyer soo peete: ‘Unser Fater im himel . . .’” (Matheus 6:9) Wën mer tsu Yeehoowa peete, wërt unser fraayntxaft mit iim noch xtërker.

Meyer khene iwich ale sorte tinge peete. Awer Kot tuut ploos antworte ti kepeete woo sich xteen mit sayne wile. “Tas is een tuun was mer ferlange, eyer heert uns wën tas mit sayne wile xtimt.” (1 Yoohan 5:14) Yeesus hot payxpiile kep iwich was mer peete khene. (Lees Matheus 6:9-13.) Sicher, meyer khene aach peete iwich unser aychne sache. Awer, meyer thërfe nii ferkese peete fer anere un Kot tanke fer ales was tee fer uns macht.

2. Wii khene mer peete?

Unser kepeete mise ufrichtich sin. Tes weeche, muut ti Piipel uns uf fer ‘unser hërts aus xite’ foer Kot. (Psalm 62:8) Meyer khene in hart xtim orer oone xtim peete, is ekaal ti xtun, tas plats orer tayn positsyoon. Tuu khanst tich kniie, setse orer uf xtele fer peete, awer must tas mache mit respekt.

3. Wii tuut Yeehoowa unser kepeet antworte?

Tee macht tas uf fiile aate. Tsum payxpiil, in ti Piipel fine mer antworte fer unser frooche. Kot sayn Wort leese khan ‘ti inesperyente xlau mache’. (Psalm 19:7; lees Tyako 1:5.) Yeehoowa khan unser hërts peruyche wën mer xwiirichkheete mit mache. Un tee khan sayn tiiner uf muute fer uns helfe wëns uns mee neetich is.

LËRN MEE

Lërn was tuu mache must fer Kot tayn hërtsliche kepeete horiche. Un aach, wii tas kepeet tich helfe khan.

4. Was mise mer mache tas Kot unser kepeet horicht?

Was fer tinge sin wichtich tas Kot unser kepeet horicht? Kukt te WIITEO.

WIITEO: Tuut Kot ti kanse kepeete heere? — Xtik (2:42)

Yeehoowa wil tas mer tsu iim peete. Leest Psalm 65:2. Noochte xprecht iwich tiise frooche:

Mënst tuu tas te “Heerer fon kepeete”, wil tas tuu tsu iim peetst? Warom tenkst tuu soo?

Tas Kot unser kepeet heert, mise mer leepe in een aat wii tee saat tas richtich is. Leest Mikeyas 3:4 un 1 Pheeter 3:12. Noochte xprecht iwich tiise frooch:

Wii khene mer uns sicher sin tas Yeehoowa unser kepeet heere tuut?

In een kriich, ti tswaay sayte peete tsu Kot fer kewine. Mënst tuu tas Kot teet tiise kepeete antworte?

5. Unser kepeet mus fom hërts aus khome

Etliche layt hon kelërnt tas se miste imer ti selwiche kepeete mache, mit te selwiche wërter. Awer, is es tas was Kot wil? Leest Matheus 6:7. Noochte xprecht iwich tiise frooch:

Was khanst tuu mache fer net “imer ti selwiche tinge noo un noo saan” in tayn kepeete?

Yeete taach, tenkt aan een seechen woo Yeehoowa tich kep hot un tank iim too foer. Wëns tuu tas machst yeete taach in ti woch, khanst tuu mërke tas tuu iwich siwe unerxiitliche tinge kepeet host oone ti selwiche wërter penutse.

Eene fater hot kërn wën sayne soon mit iim hërtslich xprecht un saat was tee wërklich xpiirt. Yeehoowa is aach soo. Tee hot kërn tas mer hërtslich tsu iim peete.

6. Tas kepeet is een kexenk fon Kot

Wii khan tas kepeet uns kraft kepe, hauptseechlich in xlime tsayte? Kukt te WIITEO.

WIITEO: Peete heleft mit propleeme um se keen (1:32)

Ti Piipel saat tas tas kepeet khan uns helfe woere friit xpiire. Leest Filiper 4:6, 7. Noochte xprecht iwich tiise frooche:

Opwool tas kepeet net imer ti propleeme ferxwiine macht, wii khan tan tas uns helfe?
Iwich was teest tuu kërn peete?

Wust tuu?

Tas wort “amen” petayt “soo sol es sin” orer “sicher”. Fon friier aan, in ti Piipel, wërt tas wort penutst am ën fon te kepeete. — 1 Kroonike 16:36.

7. Nëm tich tsayt fer peete

Als mool hon mer soo fiil tsu tuun tas mer ferkese peete. Wii wichtich waar tas kepeet fer Yeesus? Leest Matheus 14:23 un Markus 1:35. Noochte xprecht iwich tiise frooche: