LISYOON 11

Wii khanst tuu ti pest nuts hon fon ti Piipel leese?

FOERXPIILE

Is es tich xon pasiirt tas tuu ti lust ferloer host ploos am tenke fer een kroos proyëkt aan fange? Fer tas laychter mache, fiilaycht host tuu tas in kleenere teele kemacht. Tuu khanst tas selwiche mache fer ti Piipel leese. Im xtant froost tuu tich: ‘Awer, woo sol ich aan fange?’ In tiise lisyoon, tuun meyer siin etliche keweenliche tinge woos tuu mache khanst fer kërn ti Piipel xtutiire un tas ti leesung mee interesant wërt.

1. Warom is es wichtich reekelmeesich ti Piipel leese?

Te mënx woo ti Piipel, orer “Yeehoowa sayn kesets”, leest, wërt froo un is tsufriite mim leepe. (Lees Psalm 1:1-3.) Fer aan fange, lees phaar minute ti Piipel yeete taach. Soo fiil mee wiis tuu Kot sayn Wort khëne lërnst, soo fiil mee kefalt tich ti Piipel leese.

2. Wii khanst tuu ti pest nuts hon fon te Piipel leese?

Fer ti pest nuts hon fon te Piipel leese, mise mer ‘mit layse xtim’ leese un triwer noo tenke. (Yosuee 1:8) Tas petayt pisye noo lose tsu leese un sich tas iwerleye. Wëns tuu am leese pist, froo tich: ‘Was lërnt mich tas iwich Yeehoowa Kot? Wii khan ich tas in mayn leepe aan wëne? Wii khan ich penutse was ich leese fer anere helfe?’

3. Wii khanst tuu tsayt fine fer ti Piipel leese?

Mënst tuu tas weyer net laycht tsayt fine fer ti Piipel leese? Fiil fon uns tenke soo. Fersuuch soo ‘kuut tayn tsayt penutse wiis meechlich is’. (Ëfeser 5:16) Tuu khanst tas mache wëns tuu yeete taach een tsayt raus suuchst fer ti Piipel leese. Etliche layt tuun liipe ti Piipel moynts frii leese. Anere leese im xtant liipe pisye xpeeter, fiilaycht am mitaach xtun. Un noch anere, am ën fom taach, eep se xloofe keen. Un tuu? Wën weyer ti pest tsayt fer tich?

LËRN MEE

Kuk was tuu mache khanst tas tayn Piipel leesung mee interesant wërt. Un aach wii tich kuut foer perayte fer ti pest nuts hon fon tayne Piipel xtuutyum.

Soo wii wëns tuu etwas est woos tuu noch nii kexmekt host un tan fangst tuu aan tas kërn ese, soo khanst tuu aach aan fange ti Piipel kërn leese.

4. Lërn was mache fer ti Piipel kërn leese

Im xtant is es net laycht aan fange ti Piipel leese. Awer tuu khanst lërne wii een “xtarke wunx” hon, orer tas kërn mache. Tas selwiche pasiirt wëns tuu etwas est woos tuu noch nii kexmekt host un tan fangst tuu aan tas kërn ese. Leest 1 Pheeter 2:2. Noochte xprecht iwich tiise frooch:

Wëns tuu ti Piipel yeete taach leest, meecht tas tich helfe tas kërn mache?

Kukt te WIITEO un kukt was etliche kemacht hon fer kërn ti Piipel leese. Noochte xprecht iwich tiise frooche:

WIITEO: Yunge woo Kot sayn Wort liipe (5:33)

Im wiiteo, was hot ti yunge kexteert fer ti Piipel leese?
Was hot ti yunge keholef net uf kepe ti Piipel yeete taach leese?
Was hon tii kemacht fer ti Piipel leesung mee interesant lose?

Foerxlach:

Suuch raus een kuut Piipel iwersetsung woo laycht is fer se leese. Een woos tuu raus suuche khanst is ti Tradução do Novo Mundo, woo in fiile xprooche kept.
Fang aan se leese ti teele woo mee interesant sin fer tich. Kuk etliche foerxlache im khaste “Fang aan ti Piipel se leese”.
Xrayp uf was tuu xon keleest host in ti Piipel. Fer tas, penuts te khaste “Erinerst tich woos tuu noo kelos host?”.
Penuts te aplikatiiw JW Library^®. Mit tëm, khanst tuu leese un horiche ti Piipel im selulaar, tablet orer komputatoer.
Penuts te Apêndice fon Tradução do Novo Mundo. Too sin lant khaarte, khaste un klosaryo woo mache tas tayn leesung mee interesant is.

5. Peray tich fer tayne Piipel xtuutyum

Leest Psalm 119:34. Noochte xprecht iwich tiise frooche:

Warom is es kuut peete eeps tuu ti Piipel leest orer peraytst tich fer tayne Piipel xtuutyum?

Wii khanst tuu ti pest nuts hon fon yeete lisyoon fon tiise puuch? Wëns tuu tich am perayte pist fer tayne xtuutyum mache, fersuuch tas:

Lees ti eyerste apsetse fon te lisyoon.
Lees ti Piipel tekste un xtrengt tich aan fer ferxteen was tii tsu tuun hon mim sache.
Xtraych ti wërter orer ti frase woo ti antwort pringe fer yeete frooch. Tas heleft tich fertseele iwich ti lisyoon mit tayne leerer.

Wust tuu?

Yeehoowa sayn Tsayer hon xon unerxiitliche iwersetsunge fon te Piipel penutst. Awer meyer tuun kërn penutse ti Tradução do Novo Mundo da Bíblia Sagrada wayl tii is kenau, laycht fer ferxteen un pringt Kot sayne naame. — Kuk te artikel im site “Is ti Piipel woo Yeehoowa sayn Tsayer penutse anerste?”

ETLICHE SAAN: “Ti Piipel xtutiire is tsu xweer. Un noch, ich hon tsu fiil tsu tuun im taach un tan sin ich miit.”

Was mënst tuu?

IN KHORTSE WËRTER

Fer ti pest nuts hon fon was Kot sayn Wort saat, los tich tsayt fer ti Piipel leese, peet fer ferxteen was tuu am leese pist un tuu tich kuut foer perayte fer yeete xtuutyum.