LISYOON 15
Weer is Yeesus?
Yeesus is eene fon te pekhanteste mënxe im kanse kexicht. Noch soo, fiil mënxe wise weenich iwich iim un hon unerxiitliche itee iwich weer tee wërklich is. Awer, was saat ti Piipel iwich tëm?
1. Weer is Yeesus?
Yeesus is een mechtiche ëngel woo im himel leept. Eep Yeehoowa ti kanse anere tinge kemacht hot, hot Tee Yeesus kemacht. Tes weeche is tee kenënt “te eyerst kepoerne fon ales woo kemacht kep is”. (Koloser 1:15) Ti Piipel nënt tee wii Kot “sayn eensiche kepoerne Soon”. Tas petayt tas Yeesus te eensiche is woo Yeehoowa aleen tsum leepe kepracht hot. (Yoohan 3:16) Yeesus hot ticht mit sayn fater, Yeehoowa, kexaft. Tee hot Yeehoowa keholef ti kanse anere tinge mache. (Lees Xpriiche 8:30.) Ti liip unich Yeehoowa un Yeesus is aarich xtark. Yeesus hot mit leaaliteet Kot sayn pexeete un instrutsyoone aus kericht. Tes weeche, nënt ti Piipel tee wii “tas Wort”. — Yoohan 1:14.
2. Warom is Yeesus uf te Eyert khom?
Unkefeer foer 2 tausent yoore, hot Yeehoowa een wuner kemacht: Tee hot sayne hayliche kayst penutst fer Yeesus sayn leepe fom himel aan im muterlayp fon een yung fraa — Maria — rin setse. Soo, is Yeesus wii een mënx kepoer. (Lees Lukas 1:34, 35.) Yeehoowa hot Yeesus kexikt uf te Eyert fer te ferxprochne Mesias, orer Kristus, sin fer ti mënxheet rete. a (Kuk ti noote.) Yeesus hot ti kanse profetsiie iwich te Mesias erfiilt. Tas hot ti mënxe keholef ferxteen tas Yeesus “te Kristus, te Soon fom lepeentiche Kot” waar. — Matheus 16:16.
3. Woo is Yeesus yets?
Noo Yeesus sayne toot, is tee uf keruuf kewoer wii een engel un is tsurik tsum himel kang. Tat, “hot Kot tee ferhërlicht in een hooch xtel”. (Filiper 2:9) Yets, is Yeesus een mechtiche engel. Ploos Yeehoowa hot mee macht wii Yeesus.
LËRN MEE
Lërn weer Yeesus wërklich is un warom tas es wichtich is iwich iim lërne.
4. Yeesus is net te Ale Mechtiche Kot
Ti Piipel lërnt tas Yeesus een mechtiche engel im himel is. Awer toch, heert tee sayn Kot un Fater, Yeehoowa. Wii wise mer tas? Kukt te WIITEO un mërk wii ti Piipel tsaycht tas Yeesus anerste is fon te Ale Mechtiche Kot.
Ti tekste woo uner traan xteen helfe uns ferxteen tas Yeehoowa un Yeesus unerxiitliche persoone sin. Leest ti tekste un noochte xprecht iwich tiise frooche:
Leest Lukas 1:30-32.
-
Wii tsayche tëm engel sayn wërter tas Yeesus un Yeehoowa — te “Ale Heechste” — net te selwich persoon sin?
Leest Matheus 3:16, 17.
-
Was hot ti xtim, woo fom himel khom is, kesaat wii Yeesus ketaaft woer is?
-
Weem sayn xtim tenkst tuu tas es waar?
Leest Yoohan 14:28.
-
In een familye, weyere is elter un hot mee autoriteet? Te fater orer te soon?
-
Yeesus hot Yeehoowa Fater keruuf. Was lërnt uns tas?
Leest Yoohan 12:49.
-
Meecht Yeesus tenke tas eyer un sayne Fater ekaal sin? Mënst tuu tii weyere ekaal?
5. Pewaysunge tas Yeesus te Mesias waar
Ti Piipel hot fiil profetsiie woo ti mënxe keholef hon wise weer te Mesias waar, tee woo Yeehoowa raus kesuucht hot fer ti mënxheet rete. Kukt te WIITEO fer etliche profetsiie siin woo Yeesus erfiilt hot wii tee uf ti Eyert waar.
Leest ti profetsiie un noochte xprecht iwich tiise frooche:
Leest Mikeyas 5:2 fer wise woo te Mesias uf ti welt khome teet. b— Kukt ti noote.
-
Hot tiise profetsii sich erfiilt? — Matheus 2:1.
Ti Piipel hot in foer raus kleenichkheete ketsaycht iwich te Mesias sayne toot. Leest Psalm 34:20 un Sakarias 12:10 fer etliche fon tiise kleenichkheete siin.
-
Hon tiise profetsiie sich erfiilt? — Yoohan 19:33-37.
-
Etliche saan tas Yeesus etwas kemacht hot tas ti profetsiie sich in tiise aate erfiilt hon. Meecht tas meechlich sin?
-
Was tsaycht tich tas iwich Yeesus?
6. Iwich Yeesus lërne is aarich kuut fer uns
Ti Piipel saat tas es wichtich is lërne iwich Yeesus un iwich was Kot wil tas tee mache sol. Leest Yoohan 14:6 un 17:3. Noochte xprecht iwich tiise frooch:
-
Warom is es wichtich iwich Yeesus lërne?
Yeesus hot te weech uf kemacht fer tas mer khente Kot sayn fraaynte sin. Tee hot ti woerheet iwich Yeehoowa in kelërnt un, torich Yeesus, khene mer eewich leepe hon.
ETLICHE SAAN: “Yeehoowa sayn Tsayer klaape net aan Yeesus.”
-
Was teest tuu saan?
IN KHORTSE WËRTER
Yeesus is een mechtiche engel. Tee is Kot sayne Soon un te Mesias.
Was hon mer kelërnt?
-
Warom is Yeesus kenënt te “eyerst kepoerne fon ales woo kemacht kep is”?
-
Was hot Yeesus kemacht eep tee uf te Eyert khom is?
-
Wii wise mer tas Yeesus te Mesias is?
FER MEE WISE
Fin raus anere tsayche tas Yeesus te Mesias waar.
“Meechte ti piiplixe profetsiie pewayse tas Yeesus te Mesias waar?” (Artikel fom jw.org)
Fin raus in was fer aat Yeehoowa Yeesus sayne Fater is. Was saat ti Piipel iwich tas?
“Warom is Yeesus kenënt Kot sayne Soon?” (Artikel fom jw.org)
Kuk warom ti Triniteet net een Piipel inlërnung is.
Lees iwich wii een fraa sayn leepe sich keënert hot wii se unersuucht hot was ti Piipel iwich Yeesus saat.
“Een yiitix fraa leet aus warom se iire klaape peser uner suucht hot” (Despertai!, Maay 2013)
a Noote: In ti lisyoone 26 un 27, lërne mer warom ti mënxheet mus keret wëre un wii Yeesus uns keret hot.
b Noote: Fer een profetsii siin woo kenau foer raus kesaat hot wën Yeesus uf te Eyert khome teet, kuk Fer peser ferxteen 2.
