LISYOON 16

Was hot Yeesus kemacht wii tee uf ti Eyert waar?

FOERXPIILE

Fiil layt, wën se tenke aan Yeesus, tenke se aan een nëneche, eene profeet orer aan eene man woo am xtërpe is. Awer wën mer iwich sayn leepe hiir uf ti Eyert xtutiire, siin mer tas tee fiil mee wii tas waar. In tiise lisyoon, wëre mer siin etliche fon te wichtiche tinge woo Yeesus kemacht hot un wii tas tich helfe khan.

1. Was waar Yeesus sayn haupst aarwayt?

Yeesus sayn haupst aarwayt waar pekhant mache ti “kuute notisye iwer Kot sayn Raych”. (Lees Lukas 4:43.) Ti kuute notisye woo Yeesus pekhant kemacht hot, waare iwich eene raych, orer rechiirung fon Kot, woo wërt ti kanse propleeme fon te mënxheet am ën pringe. a (Kuk ti noote.) Yeesus hot tray un halp yoer sich aarich aan kextrengt fer tiise pexeet fon hofnung preetiche. — Matheus 9:35.

2. Warom hot Yeesus wunere kemacht?

Ti Piipel xprecht iwich fiil “mechtiche aarwayte un wunere un tsaycher woo Kot torich iim [Yeesus] kemacht hot”. (Aphostele sayn Kexicht 2:22) Mit te macht woo Kot tëm kept hot, khont Yeesus tas weter kontroliire, milyoone layt eneere, kranke heele un soo kaar ti toote uf ruufe. (Matheus 8:23-27; 14:15-21; Markus 6:56; Lukas 7:11-17) Yeesus sayn wunere pewayse tas Kot tee kexikt hot. Tii tsayche aach tas Yeehoowa macht hot fer unser kanse propleeme tsum ën pringe.

3. Was khene mer lërne fon Yeesus sayn leepe?

Yeesus hot imer Yeehoowa aan keheert. (Lees Yoohan 8:29.) Tee hot tas sayn kans leepe lang kemacht, soo kaar wën tee mit keechenter um kang is. Tee hot ketsaycht tas ti mënxe khene Kot tiine ale tëm woos xwiirichkheete kept. Soo hot Yeesus ‘een payxpiil fer uns kelos tas mer tëm sayn xrite ticht noo keen’ sole. — 1 Pheeter 2:21.

LËRN MEE

Lërn wii Yeesus ti kuute notisye kepreeticht hot un wunere kemacht.

4. Yeesus hot kuute notisye kepreeticht

Yeesus is kiloometer wayt torich krunt xtroose kelaaft fer ti kuute notisye preetiche fer soo fiil layt wiis meechlich waar. Leest Lukas 8:1. Noochte xprecht iwich tiise frooche:

Meecht Yeesus ploos kepreeticht hon fer ti layt woo pay iim hin khom sin?
Wii hot Yeesus sich aan kextrengt fer ti layt aan trefe?

Kot hot foer raus kesaat tas te Mesias teet ti kuute notisye preetiche. Leest Isayas 61:1, 2. Noochte xprecht iwich tiise frooche:

Wii hot Yeesus tiise profetsii erfiilt?
Mënst tuu tas ti layt hayt miste aach tiise kuute notisye heere?

5. Yeesus hot wichtiche woerheete in kelërnt

Yeesus hot net ploos ti kuute notisye iwich Kot sayn Raych kepreeticht, awer hot aach fiil kuute aanreete kep. Kuk etliche payxpiile fon was tee kesaat hot in ti reet woo tee ufm përich kemacht hot. Leest Matheus 6:14, 34 un 7:12. Noochte xprecht iwich tiise frooche:

Was fer kuute aanreete hot Yeesus in tiise wërse kep?
Mënst tuu tas tiise aanreete khente ti layt hayt helfe?

6. Yeesus hot wunere kemacht

Yeehoowa hot Yeesus macht kep fer fiil wunere mache. Kuk een payxpiil. Leest Markus 5:25-34 orer kukt te WIITEO. Noochte xprecht iwich tiise frooche:

WIITEO: Yeesus hot een krank fraa keheelt (5:10)

Meyer hon kesiin tas ti fraa aarich krank waar. Awer was waar tii sich sicher?
Was hot tich te pest kefal in tiise wuner?

Leest Yoohan 5:36. Noochte xprecht iwich tiise frooch:

Was hon Yeesus sayn wunere iwich iim pewayst?

Wust tuu?

Neekst ales was mer iwich Yeesus wise xteet in te piiplixe piicher fon Matheus, Markus, Lukas un Yoohan. Tii sin kenënt Ewankeelye. Yeete xrayper hot unerxiitliche kleenichkheete iwich Yeesus sayn leepe kexrip. Wën mer ti kanse kleenichkheete samer setse, khene mer siin wii Yeesus sayn leepe hiir uf ti Eyert waar.

MATHEUS

Tas waar te eyerste Ewankeelyum woo kexrip kewoer is. Tat, fine mer fiil fon Yeesus sayn inlërnunge, hauptseechlich iwich Kot sayn Raych.
MARKUS

Tas is te kleenste fon te Ewankeelye piicher. Een puuch fol mit aktiwiteete un aktsyoone.
LUKAS

Tsaycht wii tas kepeet wichtich waar fer Yeesus un wii tee mit te fraae um kang is.
YOOHAN

Pringt fiil fon was Yeesus mit sayn kuute fraaynte un anere layt fertseelt hot. Tas heleft uns Yeesus sayn kwaliteete khëne.