LISYOON 17

Wii is Yeesus?

FOERXPIILE

Wii is Yeesus?

Wën mer lërne iwich was Yeesus kesaat un kemacht hot uf ti Eyert, siin mer sayn kwaliteete. Tas macht tas mer uns tichter tsu iim un sayne Fater, Yeehoowa, xpiire. Was fer kwaliteete sin tas? Un wii khene mer Yeesus noo mache in unser leepe?

1. In was fer aat is Yeesus wii sayne Fater, Yeehoowa?

Yeesus hot neewich sayne liipe Fater im himel keleept fer pilyoone yoore, un hot fiil fon tëm kelërnt. Tes weeche, tuut Yeesus tenke, xpiire un hantele kraat soo wii Yeehoowa. (Lees Yoohan 5:19.) In woerheet, Yeesus macht sayne Fater sayn kwaliteete soo kenau noo tas tee saat: “Weer mich siit, siit aach te Fater.” (Yoohan 14:9) Soo fiil mee wiis tuu lërnst iwich Yeesus sayn kwaliteete, mee lërnst tuu iwich Yeehoowa. Tsum payxpiil, siin wii Yeesus sich kekhimert hot mit te layt tsaycht wii Yeehoowa sich khimert mit tich.

2. Wii hot Yeesus ketsaycht tas tee Yeehoowa liipt?

Yeesus saat: “Tas ti welt wise sol tas ich te Fater liipe, mache ich kraat soo wii te Fater mich kexikt hot.” (Yoohan 14:31) Wii Yeesus uf ti Eyert waar, hot tee ketsaycht tas eyer sayne Fater liipe teet, wayl tee tëm aan keheert hot in ales, wëns aach net laycht waar. Yeesus hot aach kërn iwich sayne Fater kexproch un anere keholef Kot sayn fraaynte sin. — Yoohan 14:23.

3. Wii hot Yeesus ketsaycht tas tee ti mënxe liipt?

Ti Piipel saat tas Yeesus ‘ti mënxheet aarich kërn hot’. (Xpriiche 8:31, noote) Yeesus waar liiplich mit ale, tee hot imer een kuut wort kehat fer anere uf muute un waar wilich fer helfe. Ti wunere woo tee kemacht hot hon net ploos sayn macht ketsaycht, awer aach tas tee ti mënxe ketauert hot. (Markus 1:40-42) Sayn wërter hon ale, woo een eerlich hërts hate, ketreest un hofnung kep. Yeesus waar wilich fer layte un xtërpe wayl tee ti mënxe liipt. Awer tee liipt hauptseechlich tii woo sayn inlërnunge aan heere. — Lees Yoohan 15:13, 14.

LËRN MEE

Lërn mee iwich Yeesus sayn kwaliteete. Un aach wii liip un krooshërtslichkheet tsayche soo wii tee.

4. Yeesus liipt sayne Fater

Yeesus sayn payxpiil lërnt wii mer khene tsayche tas mer Kot liipe. Leest Lukas 6:12 un Yoohan 15:10; 17:26. Noochte xprecht iwich tiise frooch:

Wii khene mer Yeesus noo mache un tsayche tas mer Yeehoowa liipe?

Yeesus hot sayne Fater keliipt un imer mit tëm fertseelt in sayn kepeet

5. Yeesus khimert sich mit te mënxe woo hilef prayche

Yeesus hot ti anere sayn neetichkheet foer sayn aychne ketuun. Soo kaar wën tee miit waar, hot tee sayn tsayt un kraft aan keweent fer anere helfe. Leest Markus 6:30-44. Noochte xprecht iwich tiise frooche:

Wii hot Yeesus ketsaycht tas tee sich mit te mënxe khimere teet? — Kukt ti wërse 31, 34, 41 un 42.
Warom wolt Yeesus ti mënxe helfe? — Kukt te wërs 34.
Meyer hon kesiin tas Yeesus sayne Fater sayn kwaliteete noo macht. Was khene mer tan lërne iwich Yeehoowa?
Wii khene mer tsayche tas mer uns aach khimere mit te mënxe soo wii Yeesus?

6. Yeesus is krooshërtslich

Yeesus hat net fiil materyaalixe tinge, awer hat toch mit anere keteelt was tee hat. Tee saat mer sole tas aach soo mache. Leest Aphostele sayn Kexicht 20:35. Noochte xprecht iwich tiise frooch:

Soo wii Yeesus saat, was pringt uns frooheet?

Kukt te WIITEO. Noochte xprecht iwich tiise frooch:

WIITEO: “Kepe pringt mee frooheet” — Xtik (4:00)

Wën mer selepst net fiil hon, wii khene mer toch krooshërtslich sin?

Wust tuu?

Ti Piipel lërnt uns tsu Yeehoowa peete in Yeesus sayne naame. (Leest Yoohan 16:23, 24.) Wën mer tas mache, tsayche mer tas mer weyert kepe tsu was Yeesus fer uns kemacht hot tas mer khene Yeehoowa sayn fraaynte sin.

ETLICHE SAAN: “Kot macht sich niks traus wën ti mënxe layte.”