LISYOON 19
Meechte Yeehoowa sayn Tsayer woere kriste sin?
Meyer, Yeehoowa sayn Tsayer, klaape tas mer woere kriste sin. Warom? In tiise lisyoon, lërne mer aan was unser klaape sich halt, warom mer te naame Yeehoowa sayn Tsayer hon un wii mer tsayche tas mer eene te anere liipe.
1. Aan was hale Yeehoowa sayn Tsayer iire klaape?
Yeesus saat: ‘[Kot] sayn wort is ti woerheet.’ (Yoohan 17:17) Soo wii Yeesus, Yeehoowa sayn Tsayer hale sich aach traan aan was Kot sayn Wort saat. Kuk wii te aanfang fon unser motërn kexicht waar. Unkefeer im yoer 1870, hot eene krup layt aan kefang ti Piipel kenau xtutiire. Tii wolte wise was ti Piipel wërklich in lërne teet. Wën se een piiplix inlërnung ferxtan hon, hon se too traan keklaapt, wën tas aach anerst waar fon was ti khëriche in kelërnt hon. Tan, hon se aan kefang tiise woerheete fer anere in lërne. a— Kuk ti noote.
2. Warom hon mer te naame Yeehoowa sayn Tsayer?
Yeehoowa nënt ti mënxe woo iim aan peete wii sayn tsayer, wayl tii xpreche ti woerheet iwich iim. (Hepreeyer 11:4–12:1) Tsum payxpiil, friier hot Kot tsu sayn folek kesaat: “Teyer sayt mayn tsayer.” (Lees Isayas 43:10.) Yeesus is kenënt wii “te Troye Tsayer”. (Apokalipsis 1:5) Tes weeche, in 1931 hon mer aan kefang te naame Yeehoowa sayn Tsayer penutse. Tas is fer uns een kroos eere tiise naame hon.
3. Wii mache Yeehoowa sayn Tsayer Yeesus sayn liip noo?
Yeesus hot sayn tisipele keliipt soo wii wën se sayn familye weyere. (Lees Markus 3:35.) Soo aach, sin Yeehoowa sayn Tsayer sich eenich wii een kroos familye in te kans welt. Tes weeche ruufe se eene te anere pruuter un xwester. (Fileemon 1, 2) Meyer mache soo wii tas kesets saat: “Liipt ti kans pruuterxaft” — ti kanse priiter. (1 Pheeter 2:17) Yeehoowa sayn Tsayer tsayche tiise liip uf fiile aate, hauptseechlich wën ti priiter hilef prayche.
LËRN MEE
Lërn mee iwich Yeehoowa sayn Tsayer sayn kexicht un mërk anere pewaysunge tas tii woere kriste sin.
Woere kriste hale iire klaape aan ti Piipel un was se wise lërne se fer ti anere
4. Unser klaape halt sich aan ti Piipel
Yeehoowa hot foer raus kesaat tas ti woere khëntnis fon te Piipel teet imer mee pekhant wëre. Leest Tanyël 12:4 un ti noote. Noochte xprecht iwich tiise frooch:
-
Soo fiil mee wii Kot sayn folek teet ti Piipel unersuuche (orer xtutiire), was ‘teet raychlich wëre’?
Kuk wii een krup layt, unich tëne eene man woo Charles Russell heest, hot Kot sayn Wort xtutiirt. Kukt te WIITEO. Noochte xprecht iwich tiise frooch:
-
Im wiiteo, wii hon Charles Russell un anere ti Piipel xtutiirt?
Wust tuu?
Als mool, mise mer kleene ënerunge mache in unser khëntnis fon te Piipel. Warom? Wayl Kot noo un noo heleft uns peser ferxteen sayn Wort. Tas is soo wii wën ti sun uf keet, lamsam wërts heler un ma fangt aan peser siin was um uns rom is. (Lees Xpriiche 4:18.) Es is woer tas ti Piipel sich net ferënert, awer soo wii mer peser ferxteen was tii saat, mise mer kleene ënerunge mache.
5. Meyer preetiche ti woerheet iwich Yeehoowa
Warom hon mer te naame Yeehoowa sayn Tsayer raus kesuucht? Kukt te WIITEO. Noochte xprecht iwich tiise frooch:
-
Warom waar tas kuut raus suuche te naame Yeehoowa sayn Tsayer?
Warom hot Yeehoowa mënxe raus kesuucht fer sayn tsayer sin? Wayl tiise tsayer teete pekhant mache tas Yeehoowa te woere Kot is, weeche ti liieray woo iwich iim kexproch wërt. Kuk tswaay fon tiise liie.
Etliche relichyoone lërne in tas Kot wil tas ti mënxe xtaatue orer pilter penutse fer iim aan peete. Awer meecht tas woer sin? Leest Lewiitikus 26:1. Noochte xprecht iwich tiise frooche:
-
Is tas woer tas Kot wil tas mer xtaatue orer pilter fon hayliche penutse fer iim aan peete? Was tenkt Yeehoowa iwich tas?
Etliche relichyoone lërne in tas Yeesus Kot is. Awer meecht tas wërklich soo sin? Leest Yoohan 20:17. Noochte xprecht iwich tiise frooche:
-
Is tas woer tas Yeesus Kot is? Sin Yeesus un Kot te selwiche persoon?
-
Kot hot sayn tsayer kexikt fer ti woerheet iwich iim un sayne soon preetiche. Was mënst tuu iwich tas?
6. Meyer liipe eene te anere
Ti Piipel ferklaycht ti kriste mit unerxiitliche teele fom mënxliche khërper. Leest 1 Korinter 12:25, 26. Noochte xprecht iwich tiise frooche:
-
Was mus eene woere krist mache wën anere kriste layte?
-
Was host tuu kemërekt iwich ti liip woos unich Yeehoowa sayn Tsayer kept?
Wën Yeehoowa sayn Tsayer in een aner lant hilef prayche, wole iire priiter in te kans welt klaych helfe. Fer een payxpiil siin, kukt te WIITEO. Noochte xprecht iwich tiise frooch:
-
Meyer hon kesiin tas klaych wën een neetichkheet is, kepe Yeehoowa sayn Tsayer umaniteer hilef. Wii pewayst tas tëne sayn liip?
Woere kriste tsayche liip fer ti woo hilef prayche
ETLICHE SAAN: “Yeehoowa sayn Tsayer sin ploos noch een fon te naye relichyoone.”
-
Fon was fer tsayt aan nënt Yeehoowa sayn tiiner wii sayn tsayer?
IN KHORTSE WËRTER
Yeehoowa sayn Tsayer sin woere kriste. Meyer sin een welts familye fon Kot sayn tiiner, hale unser klaape aan ti Piipel un lërne anere ti woerheet iwich Yeehoowa.
Was hon mer kelërnt?
-
Warom hon mer te naame Yeehoowa sayn Tsayer raus kesuucht?
-
Wii tsayche meyer tas mer eene te anere liipe?
-
Mënst tuu tas Yeehoowa sayn Tsayer woere kriste sin?
FER MEE WISE
Lërn mee iwich unser kexicht.
Yeehoowa sayn Tsayer — Klaape in Aktsyoon, Teel 1: Aus te Tunkelheet (1:00:53)
Kuk een payxpiil woo tsaycht tas Yeehoowa sayn Tsayer khee angst hate fer falxe inlërnunge foer pringe.
Lees etliche frooche woo ti layt meyerst mache iwich Yeehoowa sayn Tsayer.
“Haupste frooche iwer Yeehoowa sayn Tsayer” (Sesyoon fom jw.org)
Stephen hot teel kemacht in rasismus kriminaliteet. Kuk warom tee sich keënert hot noo tëm woo tee Yeehoowa sayn Tsayer khëne kelërnt hot.
“Mayn leepe is yeete taach xlechter kep” (A Sentinela, 1te Yuuli 2015)
a Noote: Fon 1879 aan, pringt unser haupst piichelche, A Sentinela, ti piiplixe woerheete.
