LISYOON 22

Wii khanst tuu mit anere xpreche iwich ti kuute notisye?

FOERXPIILE

Pis yets hin host tuu xon fiil woerheete fon te Piipel kelërnt. Awer im xtant tenkst tuu: ‘Al miste tas wise!’ Tas is woer, al mise wise iwich tas! Awer khan sin tas tuu een pisye angst host fer mit anere xpreche iwich was tuu am lërne pist. In tiise lisyoon wëre mer siin wiis tuu tiise angst phake khanst un tich fraye fer mit anere iwich ti kuute notisye xpreche.

1. Wii khanst tuu mit anere xpreche iwich was tuu am lërne pist?

Yeesus sayn tisipele hon kesaat: “Meyer khene net noo lose se xpreche fon was meyer kesiin un keheert hon.” (Aphostele sayn Kexicht 4:20) Tii hon ti woerheet soo keliipt, tas se wolte too triwer xpreche mit soo fiil layt wiis meechlich waar. Xpiirst tuu tich aach soo? Tan, suuch keleechenheete fer mit kexik xpreche mit tayn ferwanter un fraaynte iwich was tuu am lërne pist. — Lees Koloser 4:6.

Foerxlache:

Wëns tuu mit een ferwanter xprechst khanst tuu saan: “Ich hon etwas interesantes letst woch kelërnt.”
Tsaych een tekst fon te Piipel fer een fraaynt treeste woo krank is orer macht sich iwich etwas ketanke.
Wën tayn aarwayts koleke frooe wii tayne samstaach orer suntaach waar, fertseel iwich was tuu kelërnt host in tayn Piipel xtuutyum orer in te fersamlung.
Tsaych te site jw.org fer tayn fraaynte.
Laat yemant in fer kuke wii tayne Piipel xtuutyum is orer tsaych wii een Piipel xtuutyum ferlange im jw.org.

2. Warom is es te weyert preetiche keen mit te kemaynt?

Yeesus sayn tisipele hon net ploos iwich ti kuute notisye kexproch mit layt woo se kekhënt hon. Yeesus hot sayn tisipele “kexikt tsu tsweet . . . tsu yeete xtat” fer preetiche. (Lukas 10:1) Sich soo in richte hot mee layt ti keleechenheet kep fer ti kuute notisye heere. Un noch, preetiche keen mit anere, hot tëne kroos frayt kep. (Lukas 10:17) Wilst tuu aach preetiche keen mit te kemaynt?

LËRN MEE

Kuk was tich helfe khan ti angst phake un tich fraye wëns tuu ti kuute notisye preetichst.

3. Yeehoowa wërt mit tich sin

Etliche wole preetiche awer mache sich ketanke iwich was ti anere too triwer tenke, orer op se tas aan nëme.

Host tuu een pisye angst wëns tuu mit anere xprechst iwich was tuu am lërne pist? Warom?

Kukt te WIITEO. Noochte xprecht iwich tiise frooch:

WIITEO: Ich hon kepeet tas Yeehoowa solt mich koraaj kepe (4:05)

Wii hon tiise yunge Yeehoowa sayn Tsayer ti angst ferloer?

Leest Isayas 41:10. Noochte xprecht iwich tiise frooch:

Wii khan tas kepeet tich helfe wëns tuu angst host fer preetiche?

Wust tuu?

Fiil woo hayt Yeehoowa sayn Tsayer sin hon ketacht tas se khente nii ti kuute notisye preetiche. Kuk een payxpiil fon een pruuter fon Ruslant woo heest Sergey. Tee hot sich oone weyert kexpiirt. Un mit anere layt xpreche waar net laycht. Awer, tan hot tee aan kefang ti Piipel xtutiire. Tee saat: “Ale tëm ich angst hat, hon ich aan kefang mit anere xpreche iwich was ich am lërne waar. Ich hon mich kewunert wii tas mich keholef hot mee selepstfertraung kriin un tas hot aach ferxtërkt ti Piipel inlërnunge in mayn hërts.”

4. Xprech mit kexik

Wëns tuu mit anere iwich ti kuute notisye xprechst, tenkt net ploos aan was tuu saast awer aach aan wiis tuu tas saast. Leest 2 Timoteus 2:24 un 1 Pheeter 3:15. Noochte xprecht iwich tiise frooche:

Wëns tuu mit anere iwich ti Piipel xprechst, wii khanst tuu aan wëne was tiise wërse saan?
Khan sin tas etliche fon tayn ferwanter orer fraaynte net aan nëme was tuu saast. Was khanst tuu mache?
Warom is es peser mit kexik xpreche xtats tswinge tas se aan nëme sole was tuu saast?

5. Mit anere xpreche iwich ti kuute notisye macht uns froo

Yeehoowa hot Yeesus ti aarwayt kep fer ti kuute notisye preetiche. Was hot Yeesus kemënt iwich tiise aarwayt? Leest Yoohan 4:34. Noochte xprecht iwich tiise frooche:

Meyer ese net ploos fer se leepe, awer aach wayl tas uns froo macht. Warom hot Yeesus Kot sayne wile mache — soo wii ti kuute notisye preetiche — ferklaycht mit ese?
Warom mënst tuu tas iwich ti kuute notisye preetiche macht uns froo?

Foerxlache

In te mite woch fersamlung, kep acht tsu aate wiis tuu khanst een kexpreech aan fange.
Iwerlee tich ops tuu khanst tich aan mële fer teel mache in te mite woch fersamlung. Ti teele woo ti xtutente mache, khene tich helfe mee koraaj hon fer xpreche mit anere iwich was tuu am lërne pist.
Penuts te khaste “Etliche saan” un “Yemant khan frooe” fer tich iipe fer etliche frooche antworte un aach wise was saan wën yemant tas net aan nëmt.

YEMANT KHAN FROOE: “Wii keets? Was xafst tuu noch?”