LISYOON 24

Was saat ti Piipel iwich ti engele?

FOERXPIILE

Yeehoowa wil tas mer iwich sayn himliche familye lërne sole. Tsu tiise familye keheere ti engele, woo kenënt sin “Kot sayn soone”. (Yoop 38:7) Was lërnt ti Piipel iwich ti engele? Was mache se? Meechte ale engele tsu Kot sayn familye keheere?

1. Weer sin ti engele?

Yeehoowa hot ti engele kemacht eep eyer ti Eyert kemacht hot. Soo wii Kot, khene mer ti engele net siin, un tii leepe im himel. (Hepreeyer 1:14) Tas kep milyoone engele un yeete eene is imer anerste wii ti anere. (Apokalipsis 5:11) Tii ‘mache was Yeehoowa saat un heere aan sayn kepoote.’ (Psalm 103:20) In te piiplixe tsayte, hot Yeehoowa als mool engele kexikt fer pexeete aus richte un sayn tiiner helfe un rete. Hayt, fiire ti engele ti kriste tsu mënxe woo wole iwich Kot lërne.

2. Weer sin te Taywel un sayn temoone?

Etliche engele sin net troy tsu Yeehoowa keplip. Te eyerste engel woo sich keeche Kot kextelt hot, ‘is kenënt Taywel un Satanaas, woo ti kans pewoont eyert am hiner keen is.’ (Apokalipsis 12:9) Satanaas wolt iwich anere rechiire. Soo, hot tee kemacht tas Aatam un Ewa un aach anere engele sich kesamelt hon mit iim keeche Kot. Tiise kefeerliche engele sin kenënt wii temoone. Yeehoowa hot tiise engele fom himel runer keworeft tsu ti eyert un tii wëre fernicht. — Lees Apokalipsis 12:9, 12.

3. Wii fersuuche te Taywel un ti temoone uns hiner keen?

Te Taywel un ti temoone hiner keen ti layt torich spiritismus un okultismus. Too tsu keheert ales was macht ti layt kontakt hon mit kayste. Un tas is kefeerlich. Tsum payxpiil, etliche layt leese horoskop. Anere keen noo tii woo te tsukhunft roote wole, woo tas klik saan, woo prauche, woo hekse. Un anere, wën se krank sin, suuche se tratamente woo mit okultismus tsu tuun hon. Te Taywel macht aach ti layt klaape tas se khene mit te toote xpreche. Awer Yeehoowa saat: “Keet net pay tëne woo kayste aan ruufe un suucht net tii woo te tsukhunft roote wole.” (Lewiitikus 19:31) Tee saat tas wayl tee wil uns xitse fom Taywel un sayn temoone. Tii sin tëm sayn faynte un wole uns xaate mache.

LËRN MEE

Lërn iwich ti kuute tinge woo ti engele mache, ti xaate woo te okultismus uns mache khan, un wii mer uns xitse khene keeche te Taywel un sayn temoone.

4. Ti engele helfe ti layt Yeehoowa khëne lërne

Ti engele xpreche net mit te layt. Xtats tas, tuun se helfe Yeehoowa sayn tiiner ti layt aan trefe woo wole iwich Yeehoowa lërne. Leest Apokalipsis 14:6, 7. Noochte xprecht iwich tiise frooche:

Warom prayche mer ti engele sayn hilef fer preetiche?
Mënst tuu net tas es kuut is wise tas ti engele tich helfe layt aan trefe woo wole iwich ti Piipel lërne? Warom tenkst tuu soo?

5. Hal tich wech fom spiritismus un ale sorte okultismus

Te Taywel un ti temoone sin Yeehoowa sayn faynte, un tii sin aach unser faynte. Leest Lukas 9:38-42. Noochte xprecht iwich tiise frooch:

Was mache ti temoone mit te mënxe?

Meyer wole net lose tas ti temoone teel mache in unser leepe. Leest Teuteronoomyum 18:10-12. Noochte xprecht iwich tiise frooche:

Uf was fer aate fersuuche ti temoone kontakt mache un uns hiner keen? Was fer tinge woo mit okultismus tsu tuun hon sin pekhant woos tuu woonst?
Meecht tas richtich sin Yeehoowa ferpiite te okultismus? Warom?

Kukt te WIITEO. Noochte xprecht iwich tiise frooche:

WIITEO: “Tuut aych keeche te Taywel xtele” (5:02)

Im wiiteo, hat Paula een pentche aan iire meetche sayne aarm kepun. Mënst tuu tas es weyer etwas kefeerliches? Warom?
Was mist Paula mache fer sich xitse fon te temoone?

Ti woere kriste waare imer keeche ti temoone. Leest Aphostele sayn Kexicht 19:19 un 1 Korinter 10:21. Noochte xprecht iwich tiise frooch:

Warom is es wichtich fernichte ales was mit okultismus tsu tuun hot?

6. Kewin te khampf keeche te Taywel un sayn temoone

Ti temoone wëre rechiirt fom Taywel. Awer ti troye engele wëre rechiirt fom kreeste fon te engele: Michel, te haupste engel — Yeesus sayn aner naame. Wii een kroos macht hot Michel? Leest Apokalipsis 12:7-9. Noochte xprecht iwich tiise frooche:

Weer hot mee macht? Michel un sayn engele orer te Taywel un sayn temoone?
Mënst tuu tas Yeesus sayn tisipele prayche angst hon fom Taywel un sayn temoone?

Tuu khanst kewine te khampf keeche Satanaas un sayn temoone. Leest Tyako 4:7. Noochte xprecht iwich tiise frooch: