Wën etwas xlimes pasiirt, ti layt frooe sich: “Warom is tas pasiirt?” Is kuut se wise tas mer khene ti antwort in te Piipel fine!

1. Wii hot ti xlechtichkheet aan kefang uf te eyert?

Satanaas, te Taywel, hot sich keeche Yeehoowa kextelt. Tee wolt iwich anere rechiire. Tes weeche hot tee Aatam un Ewa uf kehetst tas se solte aach keeche Kot sich xtele. Wii hot te Taywel tas hin kriit? Tee hot fer Ewa keloo. (Xeenesis 3:1-5) Tee hot Ewa tenke kemacht tas Yeehoowa teet etwas kuutes fon tëne ferxtekele. In anere wërter, Satanaas hot kesaat tas ti mënxe khente frooer sin wën se Kot net aan heere teete. Tan, hot tee ti eyerst lii fertseelt: Ewa teet net xtërpe. Tes weeche nënt ti Piipel Satanaas wii “eene liichner un te fater fon te liie”. — Yoohan 8:44.

2. Was hon Aatam un Ewa tan kemacht?

Yeehoowa waar soo krooshërtslich mit Aatam un Ewa. Kot hot kesaat tas se khente fon ale peem fom Eetem kaate ese, ploos fon een net. (Xeenesis 2:15-17) Awer tii hon net keheert, tii hon toch fom paam kes. Ewa hot ‘aan kefang fon te frucht hoole un se ese’. Xpeeter hot Aatam aach ‘tefun kes’. (Xeenesis 3:6) Aatam un Ewa waare perfekte mënxe, un tes weeche, waar tas net xweer fer tëne mache was richtich is. Awer tii hon raus kesuucht Yeehoowa net aan heere. Wii se tas kemacht hon, hon se kesint un sich keeche Kot sayn rechiirung kextelt. Soo hon se fiil eelent fer sich selepst kepracht. — Xeenesis 3:16-19.

3. Was hot Aatam un Ewa sayn ëntxlus mit uns se tuun?

Wii Aatam un Ewa kesint hon, sin se imperfekt kewoer, un soo, hon iire kanse khiner tas keërpt. Ti Piipel saat iwich Aatam: “Soo wii torich een mënx ti sint in te welt khom is, un torich ti sint te toot, soo hot sich te toot tsu ale mënxe ferprayt, wayl se al kesint hate.” — Romaaner 5:12.

Tan, warom layte mer? Als mool layte mer weeche ferkheerte ëntxlise woo mer mache orer weeche ti ferkheerte ëntxlise woo ti anere mache. Un manich mool khene mer kraat uf een plats sin wën etwas xlimes pasiirt. — Lees Eklesyastes 9:11.

 LËRN MEE

4. Weer is wërklich te xultner tas mer layte?

Fiil layt klaape tas Kot ti welt kontroliirt. Meecht tas wërklich woer sin? Kukt te WIITEO.

Leest Tyako 1:13 un 1 Yoohan 5:19. Noochte xprecht iwich tiise frooch:

• Meecht Kot ti xult hon aan ti xlechtichkheet un eelent?

5. Te resultaat fon Satanaas sayn rechiirung

1. Aatam un Ewa waare perfekt un hon im paratiis keleept. Awer tii hon Satanaas aan keheert un hon sich keeche Yeehoowa kextelt

2.   Te sint, ti eelent un te toot mache yets teel fon te welt

3. Yeehoowa wërt te sint, ti eelent un te toot am ën mache. Ti mënxe wëre wiiter perfekt un wëre im paratiis leepe

6. Yeehoowa khimert sich mit uns wën mer layte

Meecht Kot sich was traus mache wën mer layte? Wole mer siin was te kheenich Tawi un te aphostel Pheeter kexrip hon. Leest Psalm 31:7 un 1 Pheeter 5:7. Noochte xprecht iwich tiise frooch:

• Wii xpiirst tuu tich yets tas tuu weest tas Yeehoowa siit wën mer layte un wil uns helfe?

 IN KHORTSE WËRTER

Satanaas, Aatam un Ewa sin ti haupste xultner fon te eelent in te welt. Yeehoowa khimert sich mit uns un hatich wërt eyer ti kans eelent tsum ën pringe.

Was hon mer kelërnt?

• Was fer lii hot Satanaas, te Taywel, fer Ewa fertseelt?

• Was hot Aatam un Ewa sayn ëntxlus mit uns se tuun?

• Wii wise mer tas Yeehoowa sich khimert mit uns wën mer layte?