LISYOON 28
Tsaych tas tuu petanklich pist tsu ales was Yeehoowa un Yeesus fer tich kemacht hon
Wii xpiirst tuu tich wën een fraaynt tich een kexenk kept? Sicher frayt tich tas un tuu wilst tayne fraaynt tsayche tas tas kexenk tich kefalt hot. Yeehoowa un Yeesus hon uns tas peste kexenk kep woo yemant uns kepe khent: tas fray khaaf opfer. Wii khene mer tsayche tas mer too triwer petanklich sin?
1. Wii khene mer tsayche tas mer weyert kepe iwich was Yeehoowa un Yeesus fer uns kemacht hon?
Ti Piipel ferxprecht tas ‘yeete eene woo aan Yeesus klaapt’ khan fer imer leepe. (Yoohan 3:16) Wii tsayche mer tas mer aan Yeesus klaape? Tas is net ploos saan tas mer aan iim klaape, awer aach tas tsayche torich unser entxlise un was mer in unser leepe mache. (Tyako 2:17) Wën mer torich unser wërter un aktsyoone unser klaape tsayche, ferxtërke mer unser fraayntxaft mit Yeesus un mit sayne Fater, Yeehoowa. — Lees Yoohan 14:21.
2. In was fer wichtich fersamlung khene mer tsayche tas mer petanklich sin tsu Yeehoowa un Yeesus?
Am oomt fon sayne toot, hot Yeesus kesaat tsu sayn tisipele wii petanklichkheet tsayche fer sayn opfer. Tee hot een wichtich fersamlung in kesetst woo in te Piipel kenënt is “Oomtsmal fom Hër”, woo aach kenënt is wii Aantenke fon Yeesus sayne toot. (1 Korinter 11:20) Yeesus hot tiise fersamlung in kesetst tas sayn aphostele un ale echte kriste woo noch khome teete sich erinere solte tas eyer sayn leepe fer uns ap kep hat. Tee saat: ‘Macht tas imer fer aan mich tenke.’ (Lukas 22:19) Uf te Aantenke keen tsaycht tas tuu petanklich pist weeche ti kroos liip woo Yeehoowa un Yeesus iwich uns xpiire.
LËRN MEE
Lërn noch anere aate wiis tuu tsayche khanst tas tuu weyert kepts tsu ti kroos liip woo Yeehoowa un Yeesus tsu uns ketsaycht hon. Lërn aach warom tas Aantenke fon Yeesus sayne toot soo wichtich is.
3. Wii petanklichkheet tsayche
Xtelt tich mool foer, wëns tuu am fersaufe weyerst un een persoon teet tich rete. Meechst tuu ferkese was tiise persoon fer tich kemacht hot? Orer teest tuu ales mache fer tsayche tas tuu petanklich weyerst fer ales was tee kemacht hot?
Meyer hon ti hofnung tas mer fer imer leepe khene weeche Yeehoowa. Leest 1 Yoohan 4:8-10. Noochte xprecht iwich tiise frooche:
-
Warom is Yeesus sayn opfer soo een wuner xeen kexenk?
-
Was tenkst tuu iwich tas was Yeehoowa un Yeesus fer tich kemacht hon?
Wii khene mer tsayche tas mer petanklich sin tsu ales was Yeehoowa un Yeesus fer uns kemacht hon? Leest 2 Korinter 5:15 un 1 Yoohan 4:11; 5:3. Noo tëm tas iir ti tekste keleest hot, xprecht iwich tiise frooch:
-
Wii khene mer unser petanklichkheet tsayche?
4. Mach Yeesus noo
Een aner aat fer petanklichkheet tsayche is Yeesus noo mache. Leest 1 Pheeter 2:21. Noochte xprecht iwich tiise frooch:
-
Wii khanst tuu Yeesus ticht noo mache?
Yeesus hot Kot sayn Wort keliipt, ti kuute notisye kepreeticht un ti layt keholef
5. Kee uf tëm Aantenke fon Yeesus sayne toot
Fer wise wii tas eyerste Oomtsmal fom Hër waar keweest, leest Lukas 22:14, 19, 20. Noochte xprecht iwich tiise frooche:
-
Wii waar tas Oomtsmal fom Hër?
-
Was petayt tas proot un te wayn? — Kukt ti wërse 19 un 20.
Yeesus wolt tas sayn tisipele tas Oomtsmal fom Hër yeetes yoer am taach fon sayne toot fayre solte. Tes weeche, samele sich Yeehoowa sayn Tsayer yeetes yoer fer erinere Yeesus sayne toot in te aat wii tee kexikt hot. Fer mee wise iwich tiise wichtich fersamlung, kukt te WIITEO. Noochte xprecht iwich tiise frooch:
-
Wii fayre Yeehoowa sayn Tsayer tas Aantenke fon Yeesus sayne toot?
In tëm Aantenke, tas proot petayt Yeesus sayne perfekt mënxliche khërper woo eyer ap kep hot weeche uns. Te wayn petayt iim sayn pluut
ETLICHE SAAN: “Ales woos tuu prauchst fer keret wëre is aan Yeesus klaape.”
-
Wii khenst tuu Yoohan 3:16 un Tyako 2:17 penutse fer tsayche tas es neetich is mee mache wii ploos klaape?
IN KHORTSE WËRTER
Meyer tsayche tas mer weyert kepe tsu ales was Yeesus fer uns kemacht hot wën mer aan iim klaape un in te fersamlung sin fom Aantenke fon Yeesus sayne toot.
Was hon mer kelërnt?
-
Wii tsayche mer tas mer aan Yeesus klaape?
-
Wii khanst tuu fer Yeehoowa un Yeesus tsayche tas tuu petanklich pist?
-
Warom is es soo wichtich uf te fersamlung fom Aantenke fon Yeesus sayne toot keen?
FER MEE WISE
Was tuut Kristus sayne toot uns uf muute fer se mache?
Was is klaape un wii khene mer tee tsayche?
“Tsaych tas tuu aan Yeehoowa sayn ferxpreche klaapst.” (A Sentinela, Oktooper 2016)
In te artikel “Ich xpiire mich yets sauwer, in friit un tsufriite”, kuk wii een fraa sich kexpiirt hot wii se ferxtan hot was Yeesus sayn fray khaaf opfer petayt.
Lees warom weeniche layt fom proot ese un fom wayn trinke im Aantenke.
“Warom fayre Yeehoowa sayn Tsayer tas Oomtsmal fom Hër anerste?” (Artikel fom jw.org)
