Te toot pringt fiil trauer un xmërts. Tes weeche, nënt ti Piipel te toot te letste faynt. (1 Korinter 15:26) In ti lisyoon 27, host tuu kelërnt tas Yeehoowa wërt tiise faynt fernichte. Awer was pasiirt mit te layt woo xon kextorep sin? In tiise lisyoon, tuust tuu lërne iwich Yeehoowa sayn xeene ferxpreche — tee wërt uf ruufe fom toot pilyoone layt fer imer leepe. Meecht tas wërklich pasiire? Woo sole tii woo uf keruuf wëre leepe? Im himel orer uf te eyert?

1. Was wil Yeehoowa mache fer unser ferwantere un fraaynte woo xon kextorep sin?

Yeehoowa wil wërklich tsurik tsum leepe pringe tii woo xon kextorep sin. Yoop, eene man mit een xtarke klaape, waar sich sicher tas Yeehoowa net iim ferkese teet noo sayne toot. Tee saat tsu Kot: “Tuu tuust mich ruufe, un ich tuun teer antworte [ausm kraap].” — Lees Yoop 14:13-15.

2. Wii wise mer tas tii woo xon kextorep sin wiiter leepe khene?

Wii Yeesus uf te eyert waar, hot Kot tëm macht kep fer layt fom toot uf ruufe. Tsum payxpiil, Yeesus hot een meetche fon 12 yoer un een witfraa sayn soon fom toot uf keruuft. (Markus 5:41, 42; Lukas 7:12-15) Tee hot aach sayne fraaynt, Lasaro, uf keruuft. Ale tëm Lasaro xon fier taache toot un pekraapt waar, hot Yeesus tee wiiter tsurik tsum leepe kepracht. Yeesus hot tsu Kot kepeet un saat: “Lasaro, khom raus!” Un “te man woo toot waar, is raus khom”. Lasaro waar lepeentich! (Yoohan 11:43, 44) Xtelt tich mool foer wii froo Lasaro sayn familye un fraaynte waare!

3. Was fer hofnung kepts fer tayne fraaynte un ferwantere woo xon kextorep sin?

Ti Piipel ferxprecht: “Tas es een ufxtaye fom toot kept.” (Aphostele sayn Kexicht 24:15) Ti mënxe woo Yeesus friier uf keruuft hot sin net im himel kang. (Yoohan 3:13) Tii hon sich kefrayt fer wiiter hiir uf te eyert leepe. In ti selwich aat, hatich wërt Yeesus pilyoone layt uf ruufe fer in paratiis uf te eyert fer imer leepe. Tee saat tas “al tii woo in te kreeper sin” wëre uf keruuft. (Yoohan 5:28, 29) Tas petayt tas ale tii woo Yeehoowa in sayn ketanke uf heept, wëre wiiter leepe, soo kaar tii woo nimant mee sich erinert.

 LËRN MEE

4. Yeesus hot ketsaycht tas tee khan toote uf ruufe

Lërn mee iwich was Yeesus fer sayne fraaynt Lasaro kemacht hot. Leest Yoohan 11:14, 38-44. Noochte xprecht iwich tiise frooche:

• Wii wise mer tas Lasaro wërklich kextorep waar? — Kukt te wërs 39.

• Tenk mool, wën Lasaro im himel khom weyer, mënst tuu tas Yeesus tëm een kefale ketuun hët, wii eyer tee wiiter uf keruuft hot fer uf te eyert leepe?

Kukt te WIITEO.

5. Fiil mënxe wëre uf keruuft fom toot!

Leest Psalm 37:29. Noochte xprecht iwich tiise frooch:

• Pilyoone layt wëre uf keruuft. Woo wëre tii leepe?

Yeesus wërt net ploos uf ruufe tii woo Yeehoowa aan kepeet hon, awer aach fiil anere mënxe. Leest Aphostele sayn Kexicht 24:15. Noochte xprecht iwich tiise frooch:

• Wën tas ufxtaye kept, weer teest tuu kërn wiiter siin?

• Wii hot ti hofnung fom ufxtaye Phelicity sayn eltere ketreest un kraft kept?

 IN KHORTSE WËRTER

Ti Piipel ferxprecht tas pilyoone layt woo xon kextorep sin wëre uf keruuft. Yeehoowa wil tas se wiiter leepe sole un tee hot Yeesus ti macht kept fer tas mache.

Was hon mer kelërnt?

• Wii wise mer tas Yeehoowa un Yeesus wole ti toote uf ruufe?

• Woo wëre tii woo fom toot uf xtaye, leepe — im himel orer uf te eyert? Warom antwortst tuu soo?

• Pist tuu tich sicher tas ti keliipte woo xon kextorep sin, wiiter leepe khene? Warom?