LISYOON 31

Was is Kot sayn Raych?

FOERXPIILE

Kot sayn Raych is te haupste sache woo ti Piipel triwer xprecht. Torich tiise Raych, wërt Yeehoowa fon te Eyert een paratiis mache. Awer, was is te Raych? Wii wise mer tas tee xon rechiirt? Was hot te Raych xon kemacht kriit? Un was wërt tee im tsukhunft mache? Tiise lisyoon un ti tswaay neekste wëre tiise frooche antworte.

1. Was is Kot sayn Raych, un weer is te kheenich?

Kot sayn Raych is een rechiirung woo Kot in kesetst hot. Te Kheenich is Yeesus, un tee rechiirt fom himel aus. (Matheus 4:17; Yoohan 18:36) Ti Piipel saat tas Yeesus “wërt fer imer Kheenich” sin. (Lukas 1:32, 33) Wii te Kheenich fon Kot sayn Raych, wërt Yeesus iwich ti kanse layt uf ti Eyert rechiire.

2. Weer wërt mit Yeesus rechiire?

Yeesus rechiirt net aleen. Mënxe “fon yeete xtam, xprooch, folek un natsyoon . . . tuun iwer ti eyert rechiire” mit iim. (Apokalipsis 5:9, 10) Wii fiil wëre mit Yeesus Kristus rechiire? Fon te tsayt aan wii Yeesus uf ti Eyert waar, milyoone mënxe sin kriste kewoer. Meechte ale kriste mit iim rechiire? Nee. Noore 144 tausent wëre im himel khome mit Yeesus. (Lees Apokalipsis 14:1-4.) Ale ti anere kriste wëre hiir uf ti Eyert leepe un teel sin fon Kot sayn folek. — Psalm 37:29.

3. Warom is Kot sayn Raych peser wii ti mënxliche rechiirunge?

Ale tëm wën ti rechiirunge fersuuche kuute tinge mache, hon se net ti macht fer ales mache was se wole. Un tan khomt ti tsayt woo anere uf tëne iire plats khome, un tii wole im xtant net tas peste fer ti layt. Awer te rechiirente fon Kot sayn Raych, Yeesus, wërt nii um ketrukt. Kot hot ‘een raych in kesetst woo nii fernicht wërt’. (Tanyël 2:44) Yeesus wërt ti kans Eyert rechiire, un tee wërt net mit etliche peser um keen wii mit anere. Tee is liiplich, kuut un kerecht, un te wërt ti layt in lërne fer aach um keen eene mim anere in tiise aat: mit liip, kuutheet un kerechtichkheet. — Lees Isaiias 11:9.

LËRN MEE

Mërk warom Kot sayn Raych peser is wii yeete anere mënxliche rechiirung.

4. Kot sayn Raych wërt iwich ti kans Eyert rechiire

Te macht woo Yeesus hot fer rechiire is kreeser wii yeete anere rechiirente woos xon kep hot. Leest Matheus 28:18. Noochte xprecht iwich tiise frooch:

Was is te unerxiit unich te macht woo Yeesus hot fer rechiire un ti mënxliche rechiirente sayn?

Ti mënxliche rechiirunge wëre oft um ketrukt un yeete eene rechiirt ploos een teel fon te Eyert. Awer was khan ma saan fon Kot sayn Raych? Leest Tanyël 7:14. Noochte xprecht iwich tiise frooche:

Warom is es kuut se wise tas Kot sayn Raych “wërt net fernicht”?
Warom is es kuut se wise tas te Raych wërt iwich ti kans Eyert rechiire?

5. Ti mënxliche rechiirunge mise um ketrukt wëre

Warom mus Kot sayn Raych uf ti mënxliche rechiirunge sayn plats khome? Kukt te WIITEO. Noochte xprecht iwich tiise frooch:

WIITEO: Was is Kot sayn Raych? — Xtik (1:41)

Was fer propleeme hon mer weeche ti mënxliche rechiirunge?

Leest Eklesyastes 8:9. Noochte xprecht iwich tiise frooche:

Mënst tuu tas Kot sayn Raych mist uf ti mënxliche rechiirunge sayn plats khome? Warom?

6. In Kot sayn Raych sin rechiirente woo uns ferxteen

Unser Kheenich Yeesus hot uf ti Eyert keleept wii een mënx. Tes weeche, khan tee ‘ferxteen unsere xwacheete’. (Hepreeyer 4:15) Un noch, Yeehoowa hot 144 tausent troye mëner un fraae raus kesuucht fer mit Yeesus rechiire, mënxe “fon yeete xtam, xprooch, folek un natsyoon”. — Apokalipsis 5:9.

Frayt tich tas se wise tas Yeesus un tii woo mit iim rechiire, ferxteen was mer mit mache? Warom?

Yeehoowa hot ale sorte mëner un fraae raus kesuucht fer mit Yeesus rechiire

7. Kotes Raych sayn kesetse sin fiil peser wii ti mënxe sayn

Ti rechiirunge hon kesetse fer ti layt helfe un xitse. Kot sayn Raych hot aach kesetse. Leest 1 Korinter 6:9-11. Noochte xprecht iwich tiise frooche:

Wii mënst tas ti welt weyer wën ti kanse mënxe teete Kot sayn kesetse aan heere? a — Kukt ti noote.
Yeehoowa ferlangt tas ti layt sole sayn kesetse aan heere. Was mënst tuu: hot tee tas recht fer tas ferlange? Warom?
Wii wise mer tas layt woo net Kot sayn kesetse aan heere, sich ënere khene? — Kukt te wërs 11.