LISYOON 34

Wii khene mer Yeehoowa tsayche tas mer iim liipe?

FOERXPIILE

Xpiirst tuu tich tichter pay Kot fon te tsayt aan woos tuu host aan kefang ti Piipel xtutiire? Teest tuu kërn foran tayn fraayntxaft mit iim ferxtërke? Wën yaa, tan khanst tuu tich sicher sin: soo fiil xtërke wii tayn liip tsu Yeehoowa wërt, soo fiil mee liipt eyer tich un khimert sich um tich. Awer wii khanst tuu tsayche tas tuu Yeehoowa liipst?

1. Wii khene mer tsayche tas mer Yeehoowa liipe?

Meyer tsayche tas mer Yeehoowa liipe wën mer iim aan heere. (Lees 1 Yoohan 5:3.) Yeehoowa tswingt nimant iim aan heere. Tee lost yeete eene aus sich selepst raus suuche ep tee tas mache wil orer net. Warom? Wayl Yeehoowa wil tas mer iim ‘hërtslich aan heere’ sole. (Romaaner 6:17) In anere wërter, tee wil tas mer iim aan heere net wayl mer ketswung sin, awer wayl mer iim liipe. Ti teele 3 un 4 in tiise puuch wëre tich helfe tayn liip tsu Yeehoowa tsayche torich ti tinge mache woo iim kefale un net mache was tee hast.

2. Warom halt es uns als mool xweer unser liip tsu Yeehoowa tsayche?

“Fiile sin ti xwiirichkheete fon tëm kerechte.” (Psalm 34:19) Meyer al mise khëmpfe keeche unser imperfektsyoon un mer mise um keen mit xwiirichkheete wii unkerechtichkheet, weenich kelt hon un noch anere. Wën mer mit propleeme um keen mise, khan es xweer sin mache was Yeehoowa fon uns ferlangt. Tas pasiirt wayl mache was ferkheert is, khent aus siin tas es laychte weyer. Awer, wëns tuu Yeehoowa aan heerst un pist troy, tsaychst tuu tas tuu iim liipst mee wii ales aneres. Tan pewayst tuu tas tuu troy pist, un tes weeche, wërt Yeehoowa aach troy sin mit tich. Tee lost tich nii im xtich. — Lees Psalm 4:3.

LËRN MEE

Kuk warom tas soo wichtich is fer Yeehoowa tas tuu tee aan heerst un was khan tich helfe troy tsu iim sin.

3. Een sache woo mit tich tsu tuun hot

In te Piipel, im puuch Yoop, leese mer tas Satanaas hot was xlimes keeche Yoop kexproch un keeche ti kanse mënxe woo wole Yeehoowa tiine. Leest Yoop 1:1, 6–2:10. Noochte xprecht iwich tiise frooche:

Soo wii Satanaas kesaat hot, warom hot Yoop Yeehoowa aan keheert? — Kukt Yoop 1:9-11.
Was saat Satanaas iwich ti kanse mënxe un aach iwich tich? — Kukt Yoop 2:4.

Leest Yoop 27:5b. Noochte xprecht iwich tiise frooch:

Wii hot Yoop pewayst tas eyer wërklich Yeehoowa keliipt hot?

Yoop hot sayn liip tsu Yeehoowa pewayst wii tee troy tsu iim keplip is

Meyer pewayse unser liip tsu Yeehoowa wën mer troy tsu iim plaype

4. Fray Yeehoowa sayn hërts

Leest Xpriiche 27:11. Noochte xprecht iwich tiise frooch:

Wii xpiirt Yeehoowa sich wëns tuu machst was richtich is un heerst iim aan? Warom?

5. Tuu khanst troy tsu Yeehoowa sin

Meyer liipe Yeehoowa un tas muut uns uf fer iwich tëm mit anere xpreche. Wayl mer troy tsu Yeehoowa sin, wole mer iim aan heere aach wëns net laycht is tas mache. Kukt te WIITEO. Noochte xprecht iwich tiise frooche:

WIITEO: Xits tayn klaape soo kaar wëns tuu torich proope keest (5:09)

Finst tuu tas xweer mit anere xpreche iwich Yeehoowa?
Im wiiteo, was hot Klautyo keholef ti angst ferliire?

Tas is laychter troy tsu Yeehoowa sin, wën mer liipe was tee liipt un hase was tee hast. Leest Psalm 97:10. Noochte xprecht iwich tiise frooche:

Wëns tuu tenkst aan ales woos tuu xon kelërnt host, was sin etliche tinge woo Yeehoowa liipt? Un was sin etliche tinge woo tee hast?
Wii khanst tuu lërne liipe was kuut is un hase was xlecht is?

6. Yeehoowa aan heere is imer kuut fer uns

Yeehoowa aan heere is imer tas peste woo mer mache khene. Leest Isaiias 48:17, 18. Noochte xprecht iwich tiise frooche:

Klaapst tuu tas Yeehoowa wërklich wees was peser is fer uns? Warom tenkst tuu soo?
Wii hot tas woos tuu kelërnt host fon te Piipel un fon Yeehoowa tich xon keholef?

ETLICHE SAAN: “Fer Kot is es ekaal was ich mache orer net.”