LISYOON 40
Wii khene mer rayn sin foer Kot?
Een mama heleft iire kleene puup sich fërtich mache fer in ti xuul keen. Tii kukt ep tee sich kewëxt hot un ep tëm sayn tsaych sauwer is un in ortnung. Tas is kuut fer tas khint sayn kesuntheet un tsaycht fer anere tas sayn eltere iim kuut uf phase. Soo wii ti eltere wole tas iire khiner sauwer sole sin, wil unser Fater Yeehoowa aach hon tas mer sauwer sole sin — khërperlich un moraalix. Sauwer sin is kuut fer uns un kept eere tsu Yeehoowa.
1. In was fer tinge is es wichtich sauwer sin?
Yeehoowa saat tas ‘mer sole haylich sin’. (1 Pheeter 1:16) Haylich sin hot tsu tuun mit khërperlich sauwer sin un moraalix rayn sin. Meyer khene khërperlich sauwer sin wën mer uns reekelmeesich paate un hale unser tsaych, tas haus un tas faartsaych sauwer un in ortnung. Meyer khene aach helfe te Raych Saal sauwer mache. Wën mer acht kepe tsu ti sauwerkheet, tan eere mer Yeehoowa. — 2 Korinter 6:3, 4.
2. Was fer kewoonheete khene uns unrayn mache?
Ti Piipel saat mer sole “uns fon ale sorte trek fom flayx un kayst sauwer mache”. (2 Korinter 7:1) Tas petayt tas mer uns aan xtrenge fer niks mache woo khent unser khërper un ketanke xaate mache. Meyer wole tas unser ketanke Yeehoowa kefale, tes weeche mache mer ales was mer khene fer xlechte ketanke wech lose. (Psalm 104:34) Meyer wole aach tas unser wërter sole rayn un sauwer sin. — Lees Koloser 3:8.
Was noch khënt uns khërperlich un moraalix unrayn mache? Etliche supstanse khene uns xaate mache. Tes weeche, rauche mer net un penutse aach khee trooke. Wën mer tas mache, sin mer kesunter un tsayche mer respekt tsu tas kexenk fom leepe. Un wii khene mer unser moraal rayn hale? Khëmpfe keeche xlechte kewoonheete, soo wii masturpatsyoon un pornokrafii. (Psalm 119:37; Ëfeser 5:5) Tas is net imer laycht noo lose mit een xlecht kewoonheet, awer Yeehoowa khan uns helfe tas mache. — Lees Isaiias 41:13.
LËRN MEE
Lërn warom mer Yeehoowa eere wën mer sauwer sin un aach wii noo lose mit xlechte kewoonheete.
3. Sauwerkheet eert Yeehoowa
Wën mer leese ti kesetse woo Yeehoowa kep hot fer te friirix Israël, lërne mer wii wichtich es is fer iim tas sayn folek sol sauwer sin. Leest Eeksotus 19:10 un 30:17-19. Noochte xprecht iwich tiise frooche:
-
Soo wiis in tiise tekste tsaycht, was tenkt Yeehoowa iwich sauwerkheet?
-
Was fer kuute kewoonheet khene tich helfe khërperlich sauwer sin?
Meyer mise uns tsayt lose un uns aan xtrenge fer ti sauwerkheet hale. Awer mer khene tas mache, is ekaal woo mer woone, un ep mer raych orer aarm sin. Kukt te WIITEO. Noochte xprecht iwich tiise frooch:
-
Wën mer in ti preetich aarwayt sin un ti layt siin tas unser tinge sauwer un in ortnung sin, tas khan eere kepe tsu Yeehoowa. Warom?
4. Noo lose mit xlechte kewoonheete
Yeehoowa khan uns helfe een xlecht kewoonheet im xtich lose
Wëns tuu rauchst orer trooke penutst, wees tuu tas es net laycht is een xlecht kewoonheet phake. Was khanst tuu mache? Tenk aan wii tiise kewoonheet tich xaate macht. Leest Matheus 22:37-39. Noochte xprecht iwich tiise frooche: Wii khan rauche orer trooke penutse xaate mache . . .
-
fer te mënx sayn fraayntxaft mit Yeehoowa?
-
fer te mënx sayn familye un anere woo mit iim leepe?
Mach een konkrët plaan fer noo lose mit een xlecht kewoonheet. a Kukt te WIITEO.
Leest Filiper 4:13. Noochte xprecht iwich tiise frooch:
-
Wii khene kuute kewoonheete — wii reekelmeesich peete, ti Piipel xtutiire un uf ti fersamlunge keen — kraft kepe fer noo lose mit een xlecht kewoonheet?
5. Khëmpf keeche unrayne ketanke un kewoonheete
Leest Koloser 3:5. Noochte xprecht iwich tiise frooche:
-
Wii wise mer tas pornokrafii, sexting un masturpatsyoon unrayne kewoonheete sin fer Yeehoowa? b
-
Mënst tuu tas weyer meechlich soo een sauwer moraal hon soo wii Yeehoowa wil? Warom?
Kuk wiis tuu khëmpfe khanst keeche unrayne ketanke. Kukt te WIITEO.
Yeesus hot een payxpiil penutst fer tsayche tas mer mise wërklich wole unser moraal sauwer hale. Leest Matheus 5:29, 30. Noochte xprecht iwich tiise frooch:
-
Yeesus hot net kesaat tas mer sole uns khërperlich wee mache, awer tas mer mise etwas mache. Was khan een mënx mache fer khee unrayne ketanke hon? c
Tas kefalt Yeehoowa wëns tuu tich aan xtrengst fer khëmpfe keeche unrayne ketanke. Leest Psalm 103:13, 14. Noochte xprecht iwich tiise frooch:
-
Wëns tich xweer halt noo lose mit een xlecht kewoonheet, wii khan tiise tekst tich kraft kepe fer foran khëmpfe?
Kep net uf!
Wën een mënx een rikfal kriit, khan tee im xtant tenke: ‘Ich tiine fer kaar niks, is peser uf kepe.’ Awer tenk mool: Tas is net wayl eene woo xpringt, xtolpert un falt, tas se ti kompetitsyoon ferloer hot, un tas se mus wiiter fon foner aan fange. Kraat soo is es mit een rikfal. Tas petayt net tas tuu te khampf keeche een xlecht kewoonheet ferloer host un aach net tas tuu must wiiter fon foner aan fange. Rikfale sin normaal — tii sin een teel fon te ferpeserung. Kep net uf! Mit Yeehoowa sayn hilef, khanst tuu noo lose mit een xlecht kewoonheet.
ETLICHE SAAN: “Ich hon mich tas xon soo aan keween, tas ich khan tas net lose.”
-
Was fer Piipel tekst teest tuu penutse fer tsayche tas mit Yeehoowa sayn hilef is es meechlich een xlecht kewoonheet im xtich lose?
IN KHORTSE WËRTER
Yeehoowa frayt sich wën unser khërper un ketanke rayn sin un wën mer mit xlechte kewoonheete noo lose.
Was hon mer kelërnt?
-
Warom is es wichtich uf ale aate sauwer sin?
-
Wii khanst tuu khërperlich sauwer sin?
-
Wii khanst tuu unrayne ketanke un xlechte kewoonheete im xtich lose?
FER MEE WISE
Was fer keweenliche tinge khanst tuu mache fer sauwer sin, opwool tas tuu weenich kelt hast?
Lees foerxlache woo khene tich helfe noo lose se rauche.
Lërn wii fiil xaate ti pornokrafii macht.
“Pornokrafii — Kefeerlich orer net?” (A Sentinela, 1te Akust 2013)
Lees wii eene man ti kewoonheet fer pornokrafii kuke triwer wech khom is.
“Een lange khampf woo ich ëntlich kewun hon” (A Sentinela, Nr. 4 2016)
a Fer praktixe foerxlache siin woo helfe khene noo lose rauche, lees in te sesyoon “Fer mee wise” te artikel: “Wii noo lose se rauche”.
b Noote 1: Sexting (aach kenent wii nude) is sich oone tsaych ap nëme un tiise pilter orer wiiteos fer anere xike.
c Noote 2: Fer hilef fine fer ti masturpatsyoon iwerkhome, lees “Como posso vencer o mau hábito da masturbação?” in tëm puuch Os Jovens Perguntam — Respostas Práticas, Wolum 1, kapitel 25.
