LISYOON 44
Meechte ale fayertaache un fëste Kot kefale?
Yeehoowa wil tas mer sole froo sin un uns ferkniiche. Awer meechte ale fayertaache iim kefale? Wii khene mer unser liip tsayche tsu Yeehoowa in tiise sache?
1. Warom tuun etliche fayertaache un fëste net Yeehoowa kefale?
Im xtant, wunerst tuu tich wise tas fiil fayertaache sich hale aan inlërnunge woo keen keeche was ti Piipel saat, orer hale sich aan ti falx relichyoon. Tiise fayertaache khene tsu tuun hon mit spiritismus, orer hale sich aan te klaape fon een unxtërplich seel. Etliche fayertaache hon tsu tuun mit awerklaape, un tings woo klik sol pringe. (Isayas 65:11) Yeehoowa saat tsu sayn tiiner: “Keet aus te mite fon tëne raus un halt aych fon tat wech . . . un lost noo unrayne tings aan se krayfe.” — 2 Korinter 6:17; a kuk ti noote.
2. Was tenkt Yeehoowa iwer fayertaache woo tsu fiil eere tsu mënxe kepe?
Yeehoowa saat tas es kefeerlich is ‘uf ti mënxe traue’. (Lees Yeeremias 17:5.) Etliche fayertaache sin fer mënxe, soltaate orer rechiirente eere. Anere fayertaache eere een lant orer tas haymat lant. (1 Yoohan 5:21) Un noch anere hon tsu tuun mit politik orer sotsyaale sache. Wii mënst tuu tas Yeehoowa sich xpiirt wën mer teel mache teete in een fayertaach woo eere tsu mënxe orer orkanisatsyoone kept, woo uf muute tinge mache woo keeche sayne wile sin?
3. Macht tas unerxiit wii ti layt sich aan xtele uf een fëst?
Ti Piipel saat tas es ferkheert is ‘pesof wëre, ausferxeemte fëste hale un sauferay’. (1 Pheeter 4:3) Uf etliche fayertaache, sin ti layt net ferninftich un xtele sich soo kaar imoraalix aan. Fer Yeehoowa sayn fraaynt sin, mise mer uns wech hale fon ales was fer iim unrayn is.
LËRN MEE
Lërn wiis tuu khanst Yeehoowa kefale un een kuut ëntxlus mache eps tuu wilst een fayertaach orer een fëst fayre orer net.
4. Mach khee teel in fayertaache un fëste woo Yeehoowa net kefale.
Leest Ëfeser 5:10. Noochte xprecht iwich tiise frooche:
-
Fon was mise mer uns sicher sin eep mer een fayertaach fayre?
-
Was fer fayertaache kepts woos tuu woonst?
-
Mënst tuu tas tiise fayertaache Yeehoowa kefale?
Tsum payxpiil, host tuu tich xon kefroot was Kot tenkt iwich keportstaache fayre? In te Piipel tsaycht niks tas eene fon Yeehoowa sayn tiiner keportstaache kefayert hot, un ti tswaay eensiche keportstaache woo ti Piipel triwer xprecht sin fon mënxe woo net Yeehoowa ketiint hon. Leest Xeenesis 40:20-22 un Matheus 14:6-10. Noochte xprecht iwich tiise frooche:
-
In was ferklayche sich tiise tswaay keportstaache?
-
Soo wiis in tiise tekste xteet, was mënst tuu: was tenkt Yeehoowa iwich keportstaache fayre?
Im xtant, froost tuu tich: ‘Meecht tas unerxiit mache fer Yeehoowa ep ich een keportstaach orer fayertaach fayre, woo keet keeche was ti Piipel in lërnt?’ Leest Eeksotus 32:1-8. Noochte, kukt te WIITEO un xprecht iwich tiise frooche:
-
Warom is es wichtich sicher sin iwich was Yeehoowa kefalt?
-
Wii khene mer tas mache?
Wii wise mer ep een fayertaach orer een fëst Kot kefalt orer net?
-
Halt tas sich aan een inlërnung woo keeche keet was ti Piipel saat? Fin raus wii te fayertaach aan kefang hot.
-
Meecht tas tsu fiil eere tsu mënxe, orkanisatsyoone orer een lant kepe? Meyer eere Yeehoowa mee wii ales aneres. Un meyer traue tas tee wërt ti welts propleeme am ën mache.
-
Wii xtele ti layt sich aan uf tiise fayertaache? Xteet sich tas mit was ti Piipel in lërnt? Meyer mise unser moraal rayn hale.
5. Helf anere tayne klaape ferxteen
Tas khan xweer hale “nee” saan wën anere wole hon tas mer teel mache in te fayertaache woo Yeehoowa net kefale. Lee aus was tuu klaapst mit respekt un ketult. Fer een payxpiil kuke wii tas mache, kukt te WIITEO.
Leest Matheus 7:12. Noochte xprecht iwich tiise frooche:
-
Soo wiis in tiise tekst xteet, weyer tas kuut fersuuche tswinge tayn ferwanter aach net etliche fayertaache fayre?
-
Opwool tuu net mee etliche fayertaache mit tayne familye fayerst, wii khanst tuu tsayche fer tëne tas tuu se noch wayter liipst?
6. Yeehoowa wil tas mer uns fraye sole
Yeehoowa wil tas mer sole xeene momënte mit unser familye un fraaynte hon. Leest Eklesyastes 8:15. Noochte xprecht iwich tiise frooch:
-
Wii tsaycht tiise tekst tas Yeehoowa wil tas mer uns fraye sole?
Yeehoowa wil tas sayn folek sol kuute momënte mitsamer hon un sich ferkniiche. Kukt im WIITEO wii Yeehoowa sayn folek sich frayt in internatsyoonale konkrëse.
Leest Kalater 6:10. Noochte xprecht iwich tiise frooche:
-
Meecht mer mise fayertaache fayre fer “tas kuute” fer anere mache?
-
Was teet tich mee kefale: yemant een kexenk kepe wayls tuu wilst, orer wayl tas tayn flicht is weeche een fayertaach?
-
Fiil fon Yeehoowa sayn Tsayer tuun als mool kleene fëste mache fer iire khiner un kepe tëne kexenke wën se net truf waarte. Wëns tuu khiner host, was khanst tuu mache fer tii fraye?
ETLICHE SAAN: “Tas is ekaal fon woo te fayertaach heyer khomt. Tas haupste is een xeen tsayt mit te familye un fraaynte hon fer sich fraye.”
-
Was teest tuu saan?
IN KHORTSE WËRTER
Yeehoowa wil tas mer sole xeene momënte mit unser familye un fraaynte hon. Awer tee wil aach tas mer net fayertaache fayre woo iim net kefale.
Was hon mer kelërnt?
-
Was fer frooche khene uns helfe wise ep een fayertaach Yeehoowa kefalt orer net?
-
Wii khene mer unser familye un fraaynte helfe ferxteen warom mer net etliche fayertaache mee fayre?
-
Wii wise mer tas Yeehoowa wil tas mer uns fraye un ferkniiche sole?
FER MEE WISE
Lees iwich fayertaache woo ti kriste net fayre.
“Por que as Testemunhas de Jeová não comemoram certos feriados?” (Artikel fom jw.org)
Lees iwich fier uersache warom mer klaape tas ti keportstaache Kot net kefale.
“Warom fayre Yeehoowa sayn Tsayer net keportstaache?” (Artikel fom jw.org)
Kuk wii ti khiner, woo Yeehoowa liipe, khene iim kefale torich ti fayertaache.
Milyoone kriste hon ëntxlist net waynachte fayre. Wii xpiire se sich too triwer?
“Tii hon etwas peseres kefun” (A Sentinela, 1te Teetsemper 2012)
a Kuk Fer peser ferxteen 5 fer se lërne wii um keen mit etliche fayertaache.
