Tii woo friix ferhayrat sin hofe tas ti frayt woo se xpiire in iire hoochtsayt taach sol aan hale fer imer. Un tas khan pasiire. Kriste woo xon lang ferhayrat sin un xtrenge sich aan fer piiplixe oryentiirunge aan wëne, wise tas es meechlich is.

1. Was fer aanreete kept ti Piipel fer ti mëner?

Yeehoowa hot te man raus kesuucht fer te khop fon te familye sin. (Lees Ëfeser 5:23.) Tee waart tas ti ëntxlise woo te man macht sole kuut sin fer ti kans familye. Ti Piipel saat tsu te man: “Tuu tayn fraa wayter liipe.” (Ëfeser 5:25) Was petayt tas? Te man sol imer liip un fraayntlich mit sayn fraa um keen, ekaal ep tee tehëm is orer foer anere layt. Tee macht ales was tee khan fer kuut soriche iire materyaale un emotsyonaale neetichkheete. (1 Timoteus 5:8) Un foer ales, heleft tee sayn fraa im klaape xtark plaype. (Matheus 4:4) Tsum payxpiil, tee khan peete un ti Piipel leese mit sayn fraa. Te man woo liiplich mit sayn fraa um keet ferxtërkt sayn fraayntxaft mit Yeehoowa. — Lees 1 Pheeter 3:7.

2. Was fer aanreete kept ti Piipel fer ti fraae?

Kot sayn Wort saat tas “ti fraa sol tiife respekt fer sayne man tsayche”. (Ëfeser 5:33) Wii khan tii tas mache? Tii khan weyert kepe tsu tëm sayn kuute kwaliteete un fer ales was tee macht fer iir un ti khiner. Tii khan aach respekt tsayche wën se pay xteet ti ëntxlise woo tee macht un in een liiplich aat mit iim xpreche, wën tee aach net een krist is. Ti fraa sol aach net xlecht xpreche iwich iire man fer anere layt.

3. Wii khan een pheyerche sayn hayrat ferxtërke?

Ti Piipel saat fer ti ferhayrate: “Ti tswaay wëre een flayx.” (Matheus 19:5) Tas petayt tas se mise sich aan xtrenge fer tas ti liip woo se xpiire eene tsum anere net ferkeet. Tii mache tas wën se tsayt mitsamer rom pringe un fertseele eerlich un liiplich iwich iire ketanke un xpiirunge. Niks un nimant is wichticher in iire leepe wii iire man orer fraa, heechstens Yeehoowa. Tii xtrenge sich aan fer khee romantixe xpiirunge iwich een aner persoon hon.

 LËRN MEE

4. Te man mus sayn fraa liipe un soriche fer iir

5. Ti fraa mus iire man liipe un respektiire

Ti Piipel saat tas ti fraa sol sayn man respektiire ep tee eene krist is orer net. Leest 1 Pheeter 3:1, 2. Noochte xprecht iwich tiise frooche:

• Wën te man noch net Yeehoowa tiint, kans sicher wilst tuu tas tee tas mache sol. Was mënst tuu tas teet peser pariire: ti kans tsayt preetiche fer iim orer mit iim um keen mit liip, kuutheet un respekt? Warom?

Mitsamer, man un fraa, khene kuute ëntxlise mache. Awer tas khan pasiire tas ti fraa net aan nëmt was te man saat.  Sicher khan se saan was se tenkt, awer tii mus tas mache mit ketult un respekt. Tii erkhënt tas Yeehoowa te man tas flicht kep hot fer ëntxlise was peser is fer ti familye. Tii mus mache ales was se khan fer te man sayn ëntxlus pay xteen. Soo, macht se iire teel tas ti familye froo khan sin. Leest 1 Pheeter 3:3-5. Noochte xprecht iwich tiise frooch:

• Wii xpiirt Yeehoowa sich wën ti fraa iire man respektiirt?

6. Tuu khanst propleeme in te hayrat triwer wech khome

 IN KHORTSE WËRTER

Te man un ti fraa khene froo sin wën se sich liipe, respektiire un ti piiplixe aanreete aan wëne.

Was hon mer kelërnt?

• Was khan te man mache fer een froo hayrat hon?

• Was khan ti fraa mache fer een froo hayrat hon?

• Wëns tuu ferhayrat pist, was fer piiplixe oryentiirunge khene tayn hayrat ferxtërke?