Yeete eene hot sayn aychne aat fer sich aan tsiie un ferxmike. Awer tas kept piiplixe oryentiirunge woo uns helfe raus suuche was uns kefalt un soo aach Yeehoowa fraye. Wole mer etliche fon tiise oryentiirunge siin.

1. Was fer oryentiirunge khene uns lenke?

Meyer sin Yeehoowa sayn tiiner, tes weeche mise mer sauwer aus siin un uns aan tsiie mit ‘kexayt, aan kemeesich un kuute ferxtant’. Soo tsayche mer tas mer “Kot aan peete”. (1 Timoteus 2:9, 10) Kuk fier oryentiirunge: (1) Unser ‘tsaych solt kexayt sin’. Tuu host fiilaycht xon kemërkt uf te fersamlunge, tas Yeehoowa sayn Tsayer unerxiitliche sorte tsaych aan tsiie. Awer unser tsaych un ti aat wii mer unser hoer khëme, solt tsayche tas mer unser Kot, Yeehoowa, respektiire. (2) Unser tsaych solt ‘aan kemeesich’ sin, tas is, mer wole net tas ti anere soo fiil acht uf uns kepe un aach net imoraalixe ketanke uf pringe. (3) Meyer tsayche tas mer ‘kuute ferxtant’ hon wën mer net plint ti moote fon te welt noo hale. (4) Unser ausiin sol imer kans klaar tsayche fer ti anere tas mer te woere Kot “aan peete”. — 1 Korinter 10:31

2. Wii khan ti aat woo mer uns aan tsiie unser priiter petrëfe?

Tas is woer tas mer khene raus suuche wii mer uns aan tsiie wole, awer mer mise tenke aan wii unser tsaych ti anere petrëfe khan. Soo, wole mer uf phase fer net anere pelaytiche. Xtats tas, ‘mache mer was kuut is fer unser neekste, fer tee uf muute’. — Lees Romaaner 15:1, 2.

3. Wii khan ti aat wii mer uns aan tsiie een kuute tsayer sin iwich Yeehoowa?

Meyer wole uns imer xeen un kexayt aan tsiie in ale tsayt, awer hauptseechlich wën mer uf te fersamlunge keen un ti preetich aarwayt mache. Meyer wole net tas unser tsaych sol een xlechte tsayer sin, tas ti layt khee acht tsu tas pexeet kepe woo mer aus richte. Xtats tas, wole mer uns aan tsiie in een aat woo “ferxmikt ti inlërnung fon unser Reter, Kot”, tas ti layt mee lërne wole iwich Yeehoowa. — Titus 2:10.

LËRN MEE

4. Een kuut ausiin tsaycht respekt tsu Yeehoowa

Was is te haupste motiiw tas mer uns ketanke mache iwich wii mer aus siin? Leest Psalm 47:2. Noochte xprecht iwich tiise frooche:

• Meyer representiire Yeehoowa. Tes weeche, wii sole mer raus suuche ti aat wii mer uns aan tsiie?

• Mënst tuu mer miste uns wërklich ketanke mache iwich ti aat wii mer uns aan tsiie un ferxmike wën mer uf ti fersamlunge keen orer ti preetich aarwayt mache? Warom?

5. Wii kuute ëntxlise mache iwich ti aat wii mer uns aan tsiie un uns ferxmike

Kukt te WIITEO.

Unser tsaych praucht net tayer sin awer tas solt sauwer sin un sich xteen mit te momënt un tas plats woo mer sin. Leest 1 Korinter 10:24 un 1 Timoteus 2:9, 10. Noochte xprecht iwich warom mer sole khee tsaych aan tsiie woo . . .

• xlamsich orer tsu keweenlich is.

• tsu ëng, wayt aus kexnit, woo mer torich siit orer woo sensuaal is.

Ale tëm ti kriste net mee sin unich ti kesetse woo Kot torich Mooses kep hot, khene tiise kesetse uns in lërne iwich wii Yeehoowa tenkt. Leest Teuteronoomyum 22:5. Noochte xprecht iwich tiise frooch:

• Warom sole mer net aan tsiie tsaych un ti hoer xnayte uf een aat tas eene man aus siit wii een fraa un een fraa wii eene man?

Leest 1 Korinter 10:32, 33 un 1 Yoohan 2:15, 16. Noochte xprecht iwich tiise frooche:

• Warom is es kuut sich frooe: ‘Meecht mayn ausiin yemant in te kemaynt orer in te nochperxaft pelaytiche?’

• Wii tsiie ti layt sich aan un ferxmike tat woos tuu woonst?

• Weyer tas kuut fer een krist sich aach soo aan tsiie un ferxmike? Warom?

 IN KHORTSE WËRTER

Wën mer kuute ëntxlise mache iwich ti aat wii mer uns aan tsiie un ferxmike, tsayche mer respekt tsu Yeehoowa un tsu ti anere.

Was hon mer kelërnt?

• Warom is es wichtich fer Yeehoowa ti aat wii mer uns aan tsiie un ferxmike?

• Was fer oryentiirunge khene uns helfe raus suuche wii uns aan tsiie un ferxmike?

• Wii khan unser ausiin een kuute orer een xlechte tsayer sin iwich Yeehoowa?