Yeesus is te Khop fon te kemaynt. (Ëfeser 5:23) Hayt is tee im himel un fon tat aan oryentiirt tee sayn tisipele hiir uf te eyert torich te “troye un ferninftiche sklaaw”. (Lees Matheus 24:45.) Yeesus hot te “sklaaw” in kesetst un hot tëm etliche autoriteet kep. Awer tee playpt noch wii een sklaaw fer Kristus un tiint tëm sayn priiter. Weer is tiise sklaaw? Wii phast tee uns uf?

1. Weer is te “troye un ferninftiche sklaaw”?

Yeehoowa hat imer kehat eene man orer een kleen krup mëner fer oryentiirunge fer sayn folek kepe. (Malakias 2:7; Hepreeyer 1:1) Noo Yeesus sayne toot, hon ti aphostele un elteste in Yeruusalem tas kemacht. (Aphostele sayn Kexicht 15:2) Soo is aach noch hayt. Yeehoowa hot een krup elteste fer kaystlich esmitel soriche un fer ti preetich aarwayt fiire. Tiise krup is kenënt ti Rechiirente Khërperxaft fon Yeehoowa sayn Tsayer. Tii sin “te troye un ferninftiche sklaaw, woo sayn hër [Yeesus] kexikt hot” fer tiise responsapiliteete uf phase. (Matheus 24:45a) Al ti mitkliiter fon te Rechiirente Khërperxaft sin mim hayliche kayst kesalpt woer. Tii wëre mit Kristus im himel rechiire wën iire leepe hiir uf te eyert am ën keet.

2. Wii kept te troye sklaaw kaystlich esmitel fer Yeehoowa sayn folek?

Yeesus saat tas te sklaaw ‘teet esmitel fer Kristus sayn tisipele in te richtich tsayt kepe.’ (Matheus 24:45b) Soo wii tas ese uns heleft xtark un kesunt plaype, kept tas kaystlich ese — ti oryentiirung fon Kot sayn Wort — ti kraft fer foran leaal tsu Yeehoowa plaype un mache ti aarwayt woo Yeesus uns kep hot. (1 Timoteus 4:6) Meyer kriin tas kaystlich esmitel in te fersamlunge, konkrëse, puplikatsyoone un wiiteos woo sich aan ti Piipel hale. Tiise esmitel heleft uns ferxteen Kot sayne wile un ferxtërkt unser fraayntxaft mit iim.

LËRN MEE

3. Yeehoowa sayn folek mus orkanisiirt sin

Unich Yeesus sayn oryentiirung, orkanisiirt ti Rechiire Khërperxaft Yeehoowa sayn Tsayer sayn aarwayt. Soo eenlich waar tas aach unich ti friirixe kriste. Kukt te WIITEO.

Leest 1 Korinter 14:33, 40. Noochte xprecht iwich tiise frooch:

• Wii tsaycht tiise tekst tas Yeehoowa wil tas sayn folek sol teel mache in een orkanisatsyoon?

4. Te troye sklaaw orkanisiirt unser preetich aarwayt

Ti preetich waar ti haupst aarwayt woo ti friirixe kriste kemacht hon. Leest Aphostele sayn Kexicht 8:14, 25. Noochte xprecht iwich tiise frooche:

• Weer hot ti friirixe kriste sayn aarwayt kefiirt?

• Meecht Pheeter un Yoohan ti oryentiirung aan kenom hon woo ti anere aphostele kep hon?

Ti preetich aarwayt is ti wichticher aktiwiteet woo ti Rechiirente Khërperxaft orkanisiirt. Kukt te WIITEO.

Yeesus hot foer kepracht wii wichtich es is ti kuute otere preetiche. Leest Markus 13:10. Noochte xprecht iwich tiise frooche:

• Warom is ti preetich aarwayt soo wichtich fer ti Rechiirente Khërperxaft?

• Warom prayche mer tas te “troye un ferninftiche sklaaw” ti welts preetich aarwayt orkanisiirt?

5. Te troye sklaaw oryentiirt uns

Ti Rechiirente Khërperxaft oryentiirt kriste in te kans welt. Wii wise tii was fer oryentiirung kepe? Kuk wii ti Rechiirente Khërperxaft tas friier kemacht hot. Leest Aphostele sayn Kexicht 15:1, 2. Noochte xprecht iwich tiise frooche:

• Was fer sache hot propleeme unich ti friirixe kriste kepracht?

• Weer hon Phaul un Parnapë kesuucht fer mit tiise propleem um keen?

Leest Aphostele sayn Kexicht 15:12-18, 23-29. Noochte xprecht iwich tiise frooch:

• Eep ti Rechiirente Khërperxaft fon te aphostele sayn taache een ëntxlus kemacht hot, hot tee Kot sayn oryentiirung iwich tiise sache ferlangt. Wii hot tee tas kemacht?  —  Kukt ti wërse 12, 15, un 28.

Leest Aphostele sayn Kexicht 15:30, 31 un 16:4, 5. Noochte xprecht iwich tiise frooche:

• Meechte ti friirixe kriste aan kenom hon ti oryentiirunge woo ti Rechiirente Khërperxaft fon tiise taache kep hot?

• Wii hot Yeehoowa se keseechent wën se keheert hon?

Leest 2 Timoteus 3:16 un Tyako 1:5. Noochte xprecht iwich tiise frooch:

• Woo suucht ti Rechiirente Khërperxaft oryentiirung fer ëntxlise mache hayt se taache?

 IN KHORTSE WËRTER

Ti Rechiirente Khërperxaft is te “troye un ferninftiche sklaaw” woo Yeesus in kesetst hot. Tiise priiter kepe oryentiirung un kaystlich esmitel fer ti kriste in te kanse welt.

Was hon mer kelërnt?

• Weer hot te “troye un ferninftiche sklaaw” in kesetst?

• Wii khimert sich ti Rechiirente Khërperxaft mit uns hayt?

• Klaapst tuu tas ti Rechiirente Khërperxaft te “troye un ferninftiche sklaaw” is?