Wën mer mit unser priiter sin, xpiire mer uns wii te kheenich Tawi: “Wii kuut un wii xeen is wën priiter mitsamer in eenichkheet woone!” (Psalm 133:1) Awer tiise eenichkheet is net umsonst, yeete eene mus sayn teel mache.

1. Was is wunerlich unich Yeehoowa sayn folek?

Wëns tuu uf een fersamlung keest in een aner lant, un ferxteest aach net ti xprooch, xpiirst tuu tich toch tehëm. Warom? Wayl mer ti Piipel xtutiire un penutse ti selwiche puplikatsyoone in ti kans welt. Un mer xtrenge uns aan fer liip tsayche eene tsum anere. Meyer al tuun “Yeehoowa sayn naame aan ruufe, fer tee in eenichkheet tiine.” — Sofonias 3:9.

2. Was khanst tuu mache fer ti eenichkheet hale?

“Tuut een tiife liip, fom hërts, eene tsum anere hon.” (1 Pheeter 1:22) Wii khanst tuu tas mache? Kuk net noo ti anere sayn feeler, awer noo iire kwaliteete. Xtats ploos fraayntxaft hon mit tii woo tas selwiche kërn hon soo wiis tuu, xtreng tich aan fer unerxiitliche priiter khëne lërne. Meyer mise aach ales mache fer aus unser hërts raus rope irkënte prekonseyt woo mer hon.  —  Lees 1 Pheeter 2:17; a kuk ti noote 1.

3. Was khanst tuu mache wëns tuu langst naner khomst mit eene pruuter?

Meyer sin eenich, awer mer sin aach imperfekt. Als mool khene mer anere pelaytiche. Tes weeche, saat ti Piipel tas mer sole ‘foran krooshërtslich fertsaye’, un tii saat aach: “Yeehoowa hot aych krooshërtslich fertsayt un teyer solt tas selwiche mache.” (Lees Koloser 3:13.) Meyer wise tas mer xon oft Yeehoowa pelayticht hon, awer toch tuut tee uns fertsaye. Tes weeche, wil tee tas mer sole aach unser priiter fertsaye. Wëns tuu mërkst tas tuu yemant pelayticht host, kep te eyerste xrit fer friit mache. — Lees Matheus 5:23, 24; b kuk ti noote 2.

LËRN MEE

4. Xtreng tich aan fer khee prekonseyt hon

Meyer wole unser kanse priiter liipe. Awer es khan net laycht sin yemant liipe woo fiil anerste is wii meyer. Was khan helfe? Leest Aphostele sayn Kexicht 10:34, 35. Noochte xprecht iwich tiise frooche:

• Yeehoowa macht khee unerxiit; tee nëmt yeete eene aan woo iim aan peete wil. Wii khanst tuu Yeehoowa noo mache?

• Was fer sort prekonseyte kepts woos tuu woonst? Un warom solst tuu tich net soo aan xtele?

Leest 2 Korinter 6:11-13. Noochte xprecht iwich tiise frooch:

• Was khenst tuu mache fer yeetes mool mee liipe ale sorte priiter un xwestere?

5. Tuu hërtslich fertsaye un hal friit mit anere

Yeehoowa macht niks ferkheertes tas mer mise iim fertsaye. Awer toch fertsayt tee uns. Leest Psalm 86:5. Noochte xprecht iwich tiise frooche:

• Was lërnt uns tiise wërse iwich wii Yeehoowa fertsayt?

• Pist tuu petanklich tas Yeehoowa tich fertsayt? Warom?

• Warom is es als mool net laycht sich kuut kepe mit ale?

Wii khene mer Yeehoowa noo mache un foran eenich plaype mit unser priiter un xwestere? Leest Xpriiche 19:11. Noochte xprecht iwich tiise frooch:

• Was khanst tuu mache wën yemant tich ayert orer pelayticht?

Als mool khene meyer anere pelaytiche. Wën tas pasiirt, was sole mer mache? Kukt te WIITEO. Noochte xprecht iwich tiise frooch:

• Im wiiteo, was hot een xwester kemacht fer sich wiiter mit iire fraayntin ferxteen?

 IN KHORTSE WËRTER

Tuu khanst helfe ti eenichkheet in te kemaynt hale, wëns tuu anere fertsayest un tsu ale priiter liip tsaychst.

Was hon mer kelërnt?

• Was khanst tuu mache fer khee prekonseyt hon?

• Was wërst tuu mache wëns tuu langst naner khomst mit eene pruuter?

• Wilst tuu, soo wii Yeehoowa, anere fertsaye? Warom?