LISYOON 57

Un wëns tuu een xlime sint machst?

FOERXPIILE

Tuu liipst Yeehoowa hërtslich un xtrengst tich aan fer sayne wile mache, awer toch als mool machst tuu feeler. Awer etliche feeler khene xlimer sin wii ti anere. (1 Korinter 6:9, 10) Wëns tuu een xlime sint machst, ferkes net tas Yeehoowa tich noch liipt. Tee wil tich fertsaye un helfe.

1. Was mise mer mache tas Yeehoowa uns fertsayt?

Weer Yeehoowa liipt xpiirt sich aarich traurich wën eyer siit tas se eene xlime sint kemacht hot. Awer ti ferxpreche woo Yeehoowa fer sayn folek kemacht hot, treest uns: “Wën ayre sinte aach root sin, wëre se soo ways wii xnee.” (Isayas 1:18) Wën mer uns hërtslich peroye, wërt Yeehoowa uns fertsaye. Wii tsayche mer tas mer uns peroye? Wën mer wërklich uns peroye, lose mer noo tsu mache was ferkheert is un hale aan tas Yeehoowa uns fertsaye sol. Tan, wëre mer mache ales was meechlich is fer ënere ti ketanke un kewoonheete woo uns tsum sint kenom hon. Un noch, mer xtrenge uns aan fer leepe soo wii Yeehoowa saat wiis richtich is. — Lees Isayas 55:6, 7.

2. Wii penutst Yeehoowa ti elteste fer uns helfe wën mer kesint hon?

Wën mer een xlime sint mache, saat Yeehoowa tas mer sole ‘ti elteste fon te kemaynt ruufe’. (Lees Tyako 5:14, 15.) Ti elteste liipe Yeehoowa un sayn xeef. Tii penutse ti khëntnis fon te Piipel fer uns helfe noch mool een xtark fraayntxaft mit Yeehoowa hon. — Kalater 6:1.

Wii helfe uns ti elteste wën mer een xlime sint kemacht hon? Tswaay orer tray elteste wëre ti Piipel penutse fer tsayche warom es ferkheert is was mer kemacht hon. Tii wëre uns aach foerxlache un aanreete kepe fer uns helfe net wiiter sinte. Fer ti kemaynt xitse fon een influens woo khent xaate mache, wëre ti elteste raus tuun fon te kemaynt tii woo xlime sinte mache un sich net peroye.

LËRN MEE

Lërn wii Yeehoowa uns helfe khan wën mer een xlime sint mache.

3. Ufrichtich saan tas mer een feeler kemacht hon, heleft uns

Yeete sint pelayticht Yeehoowa. Tes weeche, mise mer iim fertseele te feeler woo mer kemacht hon. Leest Psalm 32:1-5. Noochte xprecht iwich tiise frooch:

Xtats ferxtekele was mer kemacht hon, warom is es peser Yeehoowa fertseele te sint woo mer kemacht hon?

Noo tëm woo mer Yeehoowa te sint fertseelt hon, is aach wichtich tas mer ferlange tas ti elteste uns helfe sole. Kukt te WIITEO. Noochte xprecht iwich tiise frooch:

WIITEO: “Yeehoowa tuut tii woo Eyer liipt, tisipliniire” (3:01)

Im wiiteo, wii hon ti elteste Canon keholef tsurik tsu Yeehoowa keen?

Tas ti elteste uns helfe khene, mise mer eerlich mit tëne sin. Leest Tyako 5:16. Noochte xprecht iwich tiise frooch:

Warom is es laychter fer ti elteste uns helfe wën mer eerlich mit tëne sin?

Saa ufrichtich tas tuu een feeler kemacht host, say eerlich mit te elteste un nëm aan Yeehoowa sayn liiplich hilef

4. Yeehoowa is parmhërtslich mit te sinter

Wën een persoon een xlime sint macht un nëmt net aan mache was Yeehoowa saat woo richtich is, tan khan tee net mee teel mache in te kemaynt, un meyer hon khee umkang mee mit iim. Leest 1 Korinter 5:6, 11. Noochte xprecht iwich tiise frooch:

Soo wii een pisye heep te kanse taych wakse macht, wii khan een sinter woo sich net peroyt ti kans kemaynt influentsiire?

Ti elteste mache Yeehoowa sayn parmhërtslichkheet noo mit imperfekte sinter, tii piite sich aan fer foran helfe tii woo muste fon te kemaynt raus ketuun wëre. Fiil fon tëne sin tsurik khom weeche ti tisipliin, ale tëm woos wee ketuun hot, hot tas kemacht tas se ferxtan hon tas se ferkheert waare. — Psalm 141:5.

Wii tsaycht ti aat wii Yeehoowa mit te sinter um keet tas tee kemeesich, parmhërtslich un liiplich is?

5. Yeehoowa fertsayt tee woo sich peroyt

Yeesus hot een ferklaychung fertseelt fer uns helfe ferxteen wii Yeehoowa sich xpiirt wën yemant sich peroyt. Leest Lukas 15:1-7. Noochte xprecht iwich tiise frooch:

Was lërnt tiise tekst uns iwich Yeehoowa?

Leest Esekyël 33:11. Noochte xprecht iwich tiise frooch:

Was is wichtich mache fer tsayche tas mer uns wërklich peroyt hon?

Soo wii een xeefer, khimert sich Yeehoowa mit sayn xeef

ETLICHE SAAN: “Ich hon angst tas wën ich ti elteste fertseele was ich kemacht hon, wëre se mich fon te kemaynt raus tuun.”

Was teest tuu saan fer yemant woo soo tenkt?

IN KHORTSE WËRTER

Wën mer een xlime sint mache, khan Yeehoowa uns fertsaye, awer mer mise uns hërtslich peroye un net mee mache was ferkheert is.

Was hon mer kelërnt?

Warom is es kuut unser sinte fer Yeehoowa fertseele?
Was mise mer mache tas uns sinte fertsayt wëre?
Warom mise mer ti hilef fon te elteste ferlange wën mer een xlime sint kemacht hon?

Ich hon tiise lisyoon fërtich kemacht am taach:

Tsiil

Ti elteste fon te kemaynt khëne lërne.

Noch een tsiil:

Noch een tsiil