LISYOON 59
Hal yachtung aus mit koraaj
Friier orer xpeeter, mise ale kriste um keen mit keechner un soo kaar mit yachtung. Meecht mer mise angst hon?
1. Warom wise mer tas yachtung wërt pasiire?
Ti Piipel saat: “Al woo wole een leepe fon aanpeetung tsu Kot nëme, in eenichkheet mit Yeesus Kristus, wëre aach keyacht.” (2 Timoteus 3:12) Yeesus hot yachtung mit kemacht wayl tee net teel in Satanaas sayn welt kemacht hot. Meyer mache aach net teel. Tes weeche, wunert uns tas net wën mer mise um keen mit yachtung fon te rechiirunge un relichyoone. — Yoohan 15:18, 19.
2. Wii khene mer uns foer perayte fer yachtung aus hale?
Tas is wichtich hayt xon unser fertraung uf Yeehoowa ferxtërke. Nëm tich yeete taach tsayt fer peete, ti Piipel leese un kee reekelmeesich uf ti fersamlunge. Tas wërt tich kraft un koraaj kepe fer ale sorte yachtung aus hale, soo kaar wën keechner in tayn familye sin. Te aphostel Phaul hot fiil yachtung mit kemacht; tee saat: “Yeehoowa is mayne helfer; ich tuun khee pang hon.” — Hepreeyer 13:6.
Reekelmeesich preetiche keen ferxtërkt aach unser koraaj. Preetiche keen ferkreest unser fertraung uf Yeehoowa un heleft uns ti angst fon mënxe iwerkhome. (Xpriiche 29:25) Wën mer koraaj hon fer yets preetiche keen, tan wëre mer kuut foer perayt sin fer foran preetiche wën ti rechiirung uns ferpiite wil tas mache. — 1 Thesalooniker 2:2.
3. Was fertiine mer wën mer yachtung aus hale?
Nimant macht kërn yachtung mit. Awer wën mer net uf kepe, wërt unser klaape xtërke. Unser fertraung uf Yeehoowa wërt kreeser, wayl mer xpiire tas tee mit uns is, un heleft uns wën mer tenke tas mer khente net mee aus hale. (Lees Tyako 1:2-4.) Yeehoowa sayn hërts tuut wee wën tee siit tas mer layte. Awer tee frayt sich seer wën mer net uf kepe. Ti Piipel saat: “Wën iir aus halt ti layte wayl iir etwas kuutes macht, tas frayt Kot.” (1 Pheeter 2:20) Yeehoowa ferxprecht eewich leepe in een welt woos khee yachtung kept fer al tii woo net uf kepe pis am ën. — Matheus 24:13.
LËRN MEE
Lërn warom es meechlich is leaal tsu Yeehoowa sin ale tëm woos yachtung kept. Lërn aach ti seechen woo mer tes weeche kriin.
4. Kep net uf wën tayn familye sich keeche xtelt
Tas khan sin tas yemant in unser familye net wil tas mer sole Yeehoowa tiine. Yeesus hot tas in foer raus kesaat. Leest Matheus 10:34-36. Noochte xprecht iwich tiise frooch:
-
Was khan pasiire wën eene in te familye wil Yeehoowa tiine?
Im wiiteo khanst tuu soo een payxpiil siin. Kukt te WIITEO. Noochte xprecht iwich tiise frooch:
-
Was teest tuu mache wën een ferwanter orer een fraaynt net kërn hët tas tuu Yeehoowa tiine teest?
Leest Psalm 27:10 un Markus 10:29, 30. Noo yeete tekst leese, xprecht iwich tiise frooch:
-
Wii khan tiise ferxpreche tich helfe um keen mit keechner in te familye orer fraaynte?
5. Tiin wayter Yeehoowa wëns tuu aach yachtung mit machst
Meyer mise koraaj hon fer Yeehoowa tiine wën anere wole uns tsurik hale. Kukt te WIITEO. Noochte xprecht iwich tiise frooch:
-
Wii khene ti payxpiile im wiiteo unser klaape ferxtërke?
Leest Aphostele sayn Kexicht 5:27-29 un Hepreeyer 10:24, 25. Noo yeete tekst leese, xprecht iwich tiise frooch:
-
Warom is es soo wichtich Yeehoowa tiine soo kaar wën ti preetich aarwayt un ti fersamlunge ferpoot sin?
6. Yeehoowa wërt tich helfe net uf kepe
Yeehoowa sayn Tsayer fon unerxiitliche kultuer un elter tuun foran mit leaaliteet Yeehoowa tiine soo kaar wëns yachtung kept. Fer siin was tiise priiter keholef hot, kukt te WIITEO. Noochte xprecht iwich tiise frooch:
-
Im wiiteo, was hot keholef ti priiter net uf kepe?
Leest Romaaner 8:35, 37-39 un Filiper 4:13. Noo yeete tekst leese, xprecht iwich tiise frooch:
-
Wii ferxtërkt tiise tekst unser fertraung tas es meechlich is ale sorte proope aus hale?
Leest Matheus 5:10-12. Noochte xprecht iwich tiise frooch:
-
Warom khanst tuu froo sin ale tëm tuu yachtung mit machst?
Milyoone fon Yeehoowa sayn tiiner sin troy keplip unich yachtung. Tuu khanst tas aach!
ETLICHE SAAN: “Ich khent net yachtung aus hale.”
-
Was fer tekste khente tiise persoon koraaj kepe woo tee praycht?
IN KHORTSE WËRTER
Tas hot fiil weyert fer Yeehoowa wën mer iim foran tiine, opwool mer yachtung mit mache. Mit tëm sayn hilef, wëre mer net uf kepe!
Was hon mer kelërnt?
-
Warom wise ti kriste tas yachtung wërt pasiire?
-
Wii khanst tuu tich foer perayte fer mit yachtung um keen?
-
Warom khanst tuu tich sicher sin tas tuu khanst foran Yeehoowa tiine opwool es yachtung kept?
FER MEE WISE
Wii hot Yeehoowa eene pruuter keholef wii tee in kexpërt is woer weeche sayn neutraliteet?
Kuk wii een pheyerche leaal Yeehoowa ketiint hot unich yachtung.
Lees wiis tuu khanst mit koraaj um keen mit yachtung.
“Tuu tich yets fer ti yachtung foer perayte” (A Sentinela, Yuuli 2019)
Wii khene mer mit keechner in te familye um keen?
“Ti woerheet tuut net ‘te friit pringe, awer tas xwaart’” (A Sentinela, Oktooper 2017)
