Wën ti ëyerste kristen sich fersamelt hon, hon se liite kesung, kepeet, ti Xrifte keleest un xtutiirt oone rituaale. (1 Coríntios 14:26) Tuu tuust was eenliches in unsere fersamlung siin.

Ti informatsioone tuun sich aan ti Piipel hale un sin nutslich fer unser leepe. Am ën fon te woch, tuut sich yeete kemaynt fersamle fer een Piiplixe Reet, woo 30 minute tauert, aan heere, iwer wii ti Hayliche Xrifte nutslich fer unser leepe sin, un wii se in unsere taache kuut phase. Mëyer al wëre aan kemuut fer ti tëkste in unser Piipel mit leese. Noo te reet, wërt tas Xtuutium fon A Sentinela kemacht woo een xtuun tauert un weer mit mache wil, khan sich meele fer komentaare këpe. Een atikel fon te xtuutium etitsioon fom piichelche A Sentinela wërt penuts, woo uns mit hëlfe tuut noo te piiplixe kesëtse se leepe. Tas sëlwiche xtuutium wërt in mee wii 115 tausent kemaynte uf te kans Ëyert xtutiirt.

Mëyer kriin hilef fer pëser in lërne. In te woch tuun mer aach een fersamlung hale woo Unser Kristlich Leepe un Tiinst heest. Ti informatsioone woo mëyer in tiise fersamlung pexprëche, khome fom Fersamlungs Hëftche fer unser Kristlich Leepe un Tiinst Fersamlung, woo mëyer yeete moonat kriin. Tiise fersamlung hot tray teele. Tas ëyerste tuut Kaystliche Xmuke heese un hëlft uns een xtik fon te Piipel se khëne, woo ti mitkliiter fon te kemaynt xon tehëm keleest hon. Tas tsweete teel heest Mach Tayn Pëstes im Tiinst. Too wëre foerxtëlunge kemacht woo uns in lërne wii mëyer mit te layt iwer ti Piipel xprëche khëne. Tan tuut een leerer aanreete këpe wii mëyer pësere leeser un preeticher wëre khëne. (1 Timóteo 4:⁠13) Tas lëtste teel, woo Unser Kristlich Leepe heest, hëlft uns wii mer piiplixe printsiipie in unser leepe penutse khëne. Tas wërt mit frooche un antworte pexproch un hëlft uns ti Piipel pëser se ferxteen.

Wënst tuu in een fon unsere fersamlunge keest, tuust tuu tich sicher ferwunere mit te kwaliteet woo fon te Piipel in kelërnt wërt. — Isaías 54:13.

• Was khanst tuu fon te fersamlunge fon Yeehoowa sayn Tsayer waarte?

• In was fer fersamlung, woo mëyer hale, teest tuu kërn khome?