Wën een natuer katastroof pasiirt, tuun Yeehoowa sayn Tsayer klaych hilef orkanisiire fer sayn priiter woo in noot sin, mit hëlfe. Tas tsaycht tas mëyer uns wërklich liipe tuun. (João 13:34, 35; 1 João 3:17, 18) Wii khëne mëyer mit hëlfe?

Mëyer këpe fraywilich kontripuytsioone. In te friirixe tsayte waar een xwëyer hunger in Yuutea, too hon ti klaapes priiter fon Antiokia këlt kexikt fer sayn priiter se hëlfe. (Atos 11:27-30) Soo eenlich tuun mëyer es hayt aach mache. Wën mëyer kewaar këpe tas unsere priiter in anere plëtse xwirichkheete mit mache, tan tuun mëyer aach torich unser kemaynt këlt xike fer tëne se hëlfe mit was se prauche. — 2 Coríntios 8:13-15.

Mëyer këpe praktixe hilef. Ti ëlteste in te kemaynt tuun ti priiter kontaktiire in tëm plats woo ti katastroof pasiirt is fer se wise eep se al kuut sin. Oft mools, korteniire se Umaniteere Hilef Komisioone woo leepensmitel, trink waser, tsaych, woon plëtse un metitsiinixe hilef, aus teele. Fiile fon Yeehoowa sayn Tsayer, woo een pextimt apiliteet hon, tuun fraywilich tsu te petrofente plëtse hin reese fer in te hilef aarwayt mit se mache, orer hayser un Raych Saale woo petrof këp sin, wiiter uf paue. Ti eenichkheet in unser orkanisatsioon un ti speriëns woo mëyer kriin torich tsusamer xafe, macht tas mëyer klaych aan fange se hëlfe wën een katastroof pasiirt. Ëyerst, tuun mëyer unsere klaapes priiter hëlfe, tan wën es meechlich is, tuun mëyer aach anere layt hëlfe. Fer uns is es een tuun fon was fer relichioon se sin. — Gálatas 6:10.

Mëyer këpe emotsionaal hilef un troost torich ti Piipel. Tii woo fon een katastroof petrof këpt sin, mise ketreest këpe. In tiise momënte, khan Yeehoowa, “te Kot fon ale troost”, se xtërke. (2 Coríntios 1:3, 4) Es is aarich kuut wën mëyer layt woo khee hofnung hon mit te Piipel treeste khëne. Mëyer lëye aus tas Kot torich sayn Raych ale katastroofe, woo hayt phayn un eelent pringe, sicher wëch xafe tuut. — Apocalipse 21:4.

• Wii tuun Yeehoowa sayn Tsayer es hin kriin, in katastroofe xnël hilef se këpe?

• Was fer piiplixe troost khëne mëyer fer tii woo iwerleepe këpe?