Ti Piipel pexraypt tswaay krupe fon kristliche mëner woo ti responsapiliteete in te kemaynt uf phase tuun: ti “superintentente un ti ministeriaal tiiner”. (Filipenses 1:1) In te mëyeste kemaynte sin ëtliche fon tiise priiter. Wii tuun ti ministeriaal tiiner uns hëlfe?

Se tuun ti ëlteste hëlfe. Ti ministeriaal tiiner, yung orer alt, sin priiter woo een kuut spiritualiteet hon, woo flaysich sin un woo mëyer uns truf ferlose khëne. Tii nëme uf sich ti rotiin aarwayt, woo wichtich is un woo in yeete kemaynt kemacht këpe mus. Soo khëne ti ëlteste sich pëser in sayn responsapiliteete hale, wii ti priiter in lërne un xitse.

Se tuun een kuute tiinst mache. Ëtliche ministeriaal tiiner wëre in keteelt wii intikatoore fer ale woo tsu ti fersamlunge khome hërtslich aan nëme. Anere phase ti mikrofoone uf un tuun ti loop liite ap xpiile. Noch anere tuun ti puplikatsioone aus teele, ti rëchnunge fon te kemaynt uf phase un tuun ti kharte aus teele mit ti plëtse woo ti kemaynt preetiche keet. Neewich tas, hëlfe se tas te Raych Saal imer xeen un sauwer playpt. Ti ëlteste khëne aach ferlange tas se ti priiter un xwëstere woo alt sin, hëlfe. Es tuut niks aus mache was fer responsapiliteete ti ministeriaal tiiner hon, tii tuun tas kërn mache, un soo kriin se te respëkt fon ale in te kemaynt. — 1 Timóteo 3:13.

Se tuun een kuute payxpiil wii kristliche mëner këpe. Ti ministeriaal tiiner tuun sich kwalifitsiire torich sayn kristliche kwaliteete. Wën se reete in te fersamlung foer xtële, tuun se unser klaape xtërke. Torich sayne kuute payxpiil im preetiche, tuun se uns aan muute fer flaysich se sin. Sayn muut fer se tiine, pringt eenichkheet un frooheet fer ti kemaynt. (Efésios 4:16) Mit te tsayt, khëne ti ministeriaal tiiner sich aach kwalifitsiire fer ëlteste se wëre.

• Was fer mëner sin ti ministeriaal tiiner?

• Wii hëlfe se tas ales in te kemaynt kuut ap laaft?