Teest tuu kërn tayn khëntnis iwer ti Piipel ferpësre? Wilst tuu mee lërne iwer een Piipel tëkst, persoon, plats orer anere tinge woo in te Piipel xteen? Host tuu tich xon kefroot wii Kot sayn Wort tich hëlfe khan mit etwas woo tuu tich ketanke machst? Tan, penuts ti piplioteek fom Raych Saal.

Tii hot kuute hilfe fer mëyer xtutiire. Woerxaynlich host tuu nët ale piiplixe puplikatsioone fon Yeehoowa sayn Tsayer in tayn xprooch. Awer, ti piplioteek fom Raych Saal hot ti mëyeste fon te lëtste puplikatsioone. Fiilaycht, hot se unerxiitliche iwersëtsunge fon te Piipel, een kuutes wërter puuch un anere tinge woo khëne nutslich sin. Tuu khanst tich fray fine fer ti piplioteek foer orer noo te fersamlung penutse. Es khan sin tas tat een komputatooer is woo ti Watchtower Library instaliirt hot. Mit tiise prokram khanst tuu fiil fon unsere puplikatsioone fine un aach xnël un laycht een atikel, wort orer een Piipel tëkst suuche.

Tii is nutslich fer ti xtutënte woo foerxtëlunge in te Leepe un Tiinst Fersamlung mache. Wënst tuu in tiise xuul in kexrip pist, khan ti piplioteek fom Raych Saal nutslich fer tich sin, fer tayn foer xtëlunge kuut foer perayte. Te superintentent fon te Leepe un Tiinst Fersamlung is tee woo ti piplioteek uf phast. Tee phast uf tas ti lëtste puplikatsioone nët feele un tas se kuut orkanisiirt wëre. Tuu khanst fer tee orer fer tayn Piipel leerer ferlange tas se tich tsayche wii khanst tuu ti atikle, woos tuu prauchst, fine. Awer khee puuch thërf fon te piplioteek raus kehool këpe, un es is kuut ti piicher kuut se pehantle un niks rin se xraype.

Ti Piipel leet aus tas wën mëyer ti “khëntnis fon Kot” fine wole, mise mëyer uns aan xtrënge fer tii ‘wii ferxtëkelte xatse’ suuche. (Provérbios 2:⁠1-⁠5) Ti piplioteek fom Raych Saal is een kuut plats fer aan fange se suuche.

• Was fer hilfe fer xtutiire këpts in te piplioteek fom Raych Saal?

• Weer khan tich hëlfe ti piplioteek kuut se penutse?