Fiil yoere lang, hon Yeehoowa sayn Tsayer fiil iwersëtsunge fon te Piipel penutst, ketrukt un aus keteelt. Awer, mëyer hon kesiin tas een nay iwersëtsung nootwëntich waar, fer ti layt hëlfe se kriin was Kot fer ale mënxe wil, ti “kenau khëntnis fon te woerheet”. (1 Timóteo 2:3, 4) Soo, in 1950, hon mëyer aan kefang teele fon unser Piipel, Tradução do Novo Mundo, se puplitsiire. Tii hot een motërn xprooch un is xon in mee wii 130 xprooche kenau iwersëts këp.

Tiise Piipel solt laycht fer se ferxteen sin. Mit te tsayt tuun ti xprooche sich ferëntere, un fiil iwersëtsunge hon ekspresioone woo nëme penuts këpe un woo xwëyer fer se ferxteen sin. Un noch, es sin friirixe hant xrifte kefun këp, woo kenauer un tichter tsu te orixinaale xrifte sin. Tas hot mit keholf tas hepreeyx, aramaayx un kreekix fon te Piipel pëser se ferxteen.

Tiise Piipel solt troy tsu tëm sin was Kot saat. Ti iwersëtser fon te Piipel thorfte ti inxpiriirte xrifte nët um xraype. Tii muste troy tsu te friirixe hant xrifte sin. Awer, Kot sayn naame, Yeehoowa, tuut nët in te mëyeste iwersëtsunge fon te Hayliche Xrifte foer khome.

Tiise Piipel solt sayn Autoer eere. (2 Samuel 23:2) In te Tradução do Novo Mundo, is Yeehoowa sayn naame in nëkst 7 tausente xtële noch mool inkesëtst këp, soo wii tee in te friirixe hant xrifte fon te Piipel foer khom is. Tas khëne mëyer in tëm pilt uner traan siin. (Salmo 83:18) Tas resultaat noo een tiif un flaysiche xtuutium woo fiil yoere ketauert hot, waar een Piipel woo xeen fer se leese is, wayl se Kot sayn ketanke klaar un taytlich wayse tuut. Tas is een tuun eeps tuu ti Tradução do Novo Mundo in tayn xprooch host orer nët, mëyer tuun tich aan muute fer tich aan keweene Yeehoowa sayn Wort yeete taach leese. — Josué 1:8; Salmo 1:2, 3.

• Fer was hon Yeehoowa sayn Tsayer sich aan kextrëngt fer een nay iwersëtsung fon te Piipel mache?

• Was fer kewoonheet is kuut fer tii woo Kot sayn wile lërne wole?