Yeesus Kristus hot fer sayn tisiple kesaat: “Lost ayer licht foer te mënxe xayne, tas se ayre kuute aarwayte siin un ayer Fater, woo im himel is, eere tuun”. (Mateus 5:16) Too tefoer, tuun mëyer ti motërn teknolokii, wii tas internet, kuut penutse. Unser ofitsiaal site jw.org is ti on-line kwël fon informatsioone iwer unsere klaape un aarwayt. Was khan tat kefun këpe?

Piiplixe antworte fer ti frooche woo mee kemacht wëre. Tuu khanst ti antworte fer ëtliche fon te wichtiche frooche fom leepe fine. Tsum payxpiil, es këpt ti pleetche Meecht ti trautichkheet een ën kriin? un Meechte ti toote nooch mool leepe khëne? in unser site, in mee wii 600 xprooche. Tuu khanst aach ti Tradução do Novo Mundo in mee wii 130 xprooche un fiil puplikatsioone leese, woo hëlfe ti Piipel se ferxteen, wii tas puuch O Que a Bíblia Realmente Ensina? un ti aktuaale etitsioon fon A Sentinela un Despertai!. Fiile fon tiise puplikatsioone khëne on-line keleest orer keheert këpe. Mer khan aach te download in keweenliche formate mache, wii MP3, PDF un EPUB. Mëyer khëne soo kaar fer anere persoone, woo interesiirt sin, etwas in tëne sayn muter xprooch truke. Es këpt wiiteo puplikatsioone in unkefeer 20 tsayche xprooche. Tuu khanst aach te download mache fon tramatisiirte Piipel leesunge, piiplixe foerxtëlunge un xeene muusike fer se heere wënst tuu tsayt host.

Woere informatsioone iwer Yeehoowa sayn Tsayer. In unser site këpst aach ti lëtste nayichkheete un wiiteos iwer unser aarwayt uf te kans wëlt. Aach, wichtiche noorichte woo Yeehoowa sayn Tsayer petrëfe tuun un wii mëyer ti anere hëlfe wën een katastroof pasiirt. Tuu khanst mee informatsioone iwer unsere konkrëse woo noch khome un te kontakt fon unsere filiaale fine.

Soo, khan tas licht fon te woerheet pis aan tas ën fon te Ëyert xayne. Layt fon ale kontinënte wëre keholf, soo kaar tii woo in Antartita woone. Mëyer peete ‘tas Yeehoowa sayn wort sich wayter xnël aus prayte tuut’ tas Kot uf te kans wëlt keloopt këpt. — 2 Tessalonicenses 3:1.

• Wii tuut te site jw.org mee layt hëlfe ti woerheet fon te Piipel se lërne?

• Was teest tuu kërn in unser site suuche?