Etliche layt tuun mee alkohool trinke wën se stresiirt, aleen, orer leetich sin. Pist tuu yets mee am trinke wii friier? Wën yaa, was khanst tuu mache fer te alkohool unich kontrol hale un uf phase tas alkohool trinke net een sucht wërt? Kuk mool etliche informatsyoone woo khene tich helfe te alkohool unich kontrol hale.

•  Was petayt alkohool mit moos trinke?

•  Wii khanst tuu wise eps tuu tsu fiil alkohool trinkst?

•  Finef itee woo khene tich helfe kontroliire wii fiil alkohool tuu trinkst

 Ti Piipel saat: “Say net pay tëne woo tsu fiil wayn trinke.” (Xpriiche 23:20)

 Tenk mool noo: Ti Piipel xprecht net keeche alkohool mit moos trinke. (Eklesyastes 9:7) Awer tii tsaycht tas es een unerxiit kept tswixich alkohool mit moos trinke, fiil trinke un sauferay. (Lukas 21:34; Ëfeser 5:18; Titus 2:3) Soo kaar wën een persoon net pesof wërt, tsu fiil alkohool trinke khan fersaue ti persoon sayn apiliteet fer ëntxlise mache, sayn kesuntheet un ti aat wii se mit te anere um keet. (Xpriiche 23:29, 30)

 Fiile autoriteete xpreche iwer ti unerxiit tswixich alkohool mit moos trinke un tsu fiil trinke. Fer tas rechne, penutse se eftas wii fiil een persoon in een taach trinkt un wii fiil taache fon te woch se trinkt. a Awer, te alkohool petreft yeete persoon in een unerxiitlich aat un, als mool, is es peser kaar niks trinke. Tëm noo te Welt Kesuntheet Orkanisatsyoon:

 “Soo kaar eene orer tswaay xlik khene tsu fiil sin — tsum payxpiil:

•   Wën een persoon faart orer maxiine penutst.

•   Wën een fraa xwanger is orer milich fer sayn nëneche kept.

•   Wën een persoon etliche sorte metitsiin in nëmt.

•   Wën een persoon etliche sorte krankheete hot.

•   Wën een persoon net kontroliire khan wii fiil se trinkt.”

 Ti Piipel saat: “Wole mer unser weeche uner suuche.” (Tas Yaamer Liit 3:40)

 Tenk mool noo: Tsu fiil trinke khan fiile xlechte resultaate pringe. Tuu khanst tich too tefun xitse wëns tuu eftas tayn kewoonheete uner suuchst un tëne ënerst, wëns neetich is. Ti neekste phunkte khene tich helfe se wise eps tuu te kontrol am ferliire pist.

•   Tuu must alkohool trinke fer froo wëre. Tuu tenkst tas tuu alkohool praychst fer tich in ruu xpiire, fer xpas mit te anere hon orer tich ferkniiche. Tuu trinkst fer mit tayn propleeme um keen.

•   Tuu trinkst mee wii friier. Tuu tuust eftas trinke. Was tuu trinkst, is yets xtërker un tuu must mee trinke fer tich soo wii friier xpiire.

•   Alkohool trinke pringt tich propleeme tehëm un in te aarwayt. Tsum payxpiil: tuu tuust mee kelt wiis tuu host mit alkohool aus kepe.

•   Noo se trinke, machst tuu etwas woos tuu net thërfst, wii faare, xwime, orer maxiine penutse.

•   Anere saan tich tas se sich ketanke mit tich mache weeche wii fiil tuu trinkst. Wën se tas saan, wërst tuu pees un fersuuchst ausreete kepe. Tuu fersuuchst aach fon te anere ferxtekele tas tuu am trinke pist, orer liie tuust iwer wii fiil tuu trinkst.

•   Es is xweyer fer tich noo lose se trinke. Tuu host xon fersuucht weenicher trinke orer noo lose tas mache, awer tuu host es net hin kriit.

 1. Mach een plaan.

 Ti Piipel saat: “Tëm flaysicher sayn pleen kepe sicher kuute resultaate.” (Xpriiche 21:5)

 Fersuuch tas too mache: Suuch raus was fer taache fon te woch tuu trinke tuust. Xtel een krëns iwer wii fiil tuu in tiise taache trinke tuust. Say pextimt ferweenichst 2 taache in te woch net trinke.

 Een pritaanix orkanisatsyoon, woo ti layt helft alkohool mit moos trinke, saat: “Ti pest aat fer tich wayt wech fon een sucht hale, is reeklich phaar taache hoole un khee alkohool trinke.”

 2. Kee tayn plaan noo.

 Ti Piipel saat: “Macht fërtich was teyer aan kefang hot.” (2^te Korinter 8:11)

 Fersuuch tas too mache: Fer net tsu fiil trinke, phas uf wii fiil alkohool in yeete ketrenk trin is. Khaaf ketrenk woo khee alkohool hon, woo kesunt sin un woos tuu kërn host un los se tich pay tich.

 “Wëns tuu kleene ënerunge machst, ti xans fer propleeme mit alkohool hon, wërt kleener” — saat een orkanisatsyoon fon te Fereenichte Xtaate fon Amërika, woo keeche te alkolismus khëmpft.

 3. Say pextimt tayn ëntxlise hale.

 Ti Piipel saat: “Wën teyer ‘yaa’ saat, tas sol ‘yaa’ petayte; un wën teyer ‘nee’ saat, tas sol ‘nee’ petayte.” (Tyako 5:12)

 Fersuuch tas too mache: Wën yemant tich was aan piit woo tayn plaan xteert, say fërtich fer “nee” saan. Say fest, awer mach tas mit kexik.

 Een orkanisatsyoon fon te Fereenichte Xtaate fon Amërika, woo keeche te alkolismus khëmpft, saat: “Woo friier tuu lërnst ‘nee’ saan, woo laychter wërt tas fer tich fest keeche ti fersuuchung plaype.”

 4. Hal tich traan aan te nutse woo tayn ëntxlise pringe.

 Ti Piipel saat: “Tas ën fon een sache is peser wii sayn aanfang.” (Eklesyastes 7:8)

 Fersuuch tas too mache: Mach een list mit uersache warom tuu kontroliire wilst wii fiil alkohool tuu trinkst. Tuu khanst, tsum payxpiil, in te list tepay tuun: tayn xloof un kesuntheet ferpesere, kelt xpaare un peser mit te anere um keen. Wëns tuu iwer tayn ëntxlise mit te anere xprechst, hal tich traan aan warom tas kuut is, net aan warom tas xweyer is.

 5. Suuch Kot fer hilef kriin.

 Ti Piipel saat: “Fer ales sin ich xtark torich tee woo meer kraft kept.” (Filiper 4:13)

 Fersuuch tas too mache: Wëns tuu tenkst tas tuu een propleem mit alkohool host, peet tsu Kot fer hilef kriin. Ferlang tëm kraft un selepst kontrol. b Un hool tsayt fer se lërne was Sayn Wort, ti Piipel, saat woo tich helfe khan. Mit Kot pay tich, khanst tuu kontroliire wii fiil alkohool tuu trinkst.