Es siit aus tas fiile relichyoone tuun sich mee konsentriire aan kelt kriin wii aan te layt helfe Kot aan peete. Host tuu tas xon kemërkt? Tii tuun tinge un aarwayte aan piite un ferkhaafe. Fiile fon sayn fiirer tuun kroose loone kriin un leepe wii rayche mënxe. Kuk mool ploos phaar payxpiile:

•   Een unersuuchung hot ketsaycht tas, torich 13 yoore, hot een katoolix pixof tas kelt fon te khërich penutst fer se petsaale neekst 150 reese in perseenliche luftxif un unkefeer 200 reese in limusine. Tee hot aach mee wii 4 milyoone tolare aus kep fer sayn haus, woo tsu te khërich keheert hot, wii nay lose.

•   In een lant in Afrika, tuun tausente layt ti relichyeese fersamlunge fon een preeticher kuke. In sayn mechtich kroos khërich, sin ale sorte tinge ferkhaaft — too tepay een eel woo tee saat wunere macht, un aach tiiche un himte mit sayn pilt. Ti meyerste fon sayn nookeener sin aarm, awer tee is mechtich raych.

•   In Xina, 2 fon te 4 hayliche përiche fom putismus, sin firme woo in te bolsa de valores rexistriirt sin. Un te pekhante Shaolin thempel is mit soo fiile kexefte proyëkte ferpunt, tas sayn relichyeese fiirer is kekhënt wii “te kexefts monge”.

•   In te kexefte uf te kans Fereenichte Xtaate fon Amërika, is een nay sort aarwayt am foer khome: te kaystlich aanreetner. Tëm noo een relatooryum, tuun tiise aanreetner relichyeese rituaale foer pringe un kaystliche oryentiirunge fer ti aarwayter kepe.

 Was tenkst tuu iwer relichyoone woo sich mit kexefte rin mexe? Host tuu tich xon kefroot was Kot tenkt iwer layt woo fersuuche kelt mache fon te anere sayn klaape?

 Kot kefalt sich net wën ti layt relichyoon un kexefte mixe. Tsum payxpiil: friier hon etliche priister kesaat tas se Kot foer kextan hon. Awer tii hate “een prays fer in lërne”; ti Piipel tsaycht tas Kot net froo too temit waar. (Mikeyas 3:11) Kot hot konteniirt tii woo Sayn aanpeetung plats tsu een “xpitspuupe heel” kemacht hate; tii hon aan kefang kiiriche kexefte tat mache. (Yeeremias 7:11)

 Soo wii Kot, Yeesus kefalt sich net wën ti layt relichyoone penutse fer kelt kriin. Wii eyer uf te eyert waar, hon ti relichyeese fiirer kiiriche mënxe kelos kexefte in Yeruusalem sayn thempel mache. Un tiise relichyeese fiirer hon kelt too tefun kriit. Eerliche layt woo tsu Yeruusalem kang sin fer Kot aan peete, waare fon te kexefte layt unkerecht pehantelt. Yeesus hot mit koraaj tiise uneerliche kexefts layt ausm thempel kexikt; tee hot kesaat: “Lost noo tas haus fon mayn Fater tsu een kexeft haus se mache!” (Yoohan 2:14-16)

 Aach in sayn preetich aarwayt, hot Yeesus ketsaycht tas eyer soo wii Kot ketenkt hot. (Yoohan 8:28, 29) Tee hot nii kelt ferlangt fer ti layt iwer Kot in lërne orer fer ti wunere mache. Tee hot ese fersoricht fer tii woo hunger hate, ti kranke keheelt, ti toote uf keruuft — ales kratis! Yeesus hot nii sayn preetich aarwayt penutst fer raych wëre. In woerheet, hot eyer noch net mool sayn aychne haus kehat! (Lukas 9:58)

 Yeesus hot fer sayn nookeener kesaat tas se solte nii sayn relichyeese aktiwiteete penutse fer kelt kriin. Tee hot kesaat: “Umsonst hot teyer tas kriit, tan umsonst kept tas wayter.” (Matheus 10:8) Tiise friirixe nookeener, woo wii kriste kenënt kep sin, hon tas kraat soo kemacht. Kuk mool etliche payxpiile:

•   Te aphostel Pheeter waar mit Yeesus torich sayn preetich aarwayt. Een mool, eene man woo Simon keheest hot, hot kelt fer Pheeter aan kepoot fer kraft un autoriteet kriin. Pheeter hot tas klaych ap kextos un hot Simon korikiirt. Tee hot tëm richt raus kesaat: “Tayn silper sol mit tich xtërpe, wayl tuu tachst tas tuu khenst Kot sayn kexenk mit kelt khaafe.” (Aphostele sayn Kexicht 8:18-20)

•   Te aphostel Phaul waar eene reesenter superintentent woo aarich pekhant waar. Torich ti yoore, hot eyer xtram kexaft in fiile kristliche kemaynte. Noch soo, hot eyer nii fersuucht kelt torich tiise aarwayt kriin. Tee un sayn mithelfer waare khee “ferkhaafer fon Kot sayn wort, soo wii fiile [waare]”. (2^te Korinter 2:17) Kraat tas keeche teel! Phaul hot kexrip: “Wii meyer ti kuute notisye fon Kot fer aych kepreeticht hon, hon mer taach un nacht kexaft tas meyer net een ekonoomix last fer aych weyere.” (1^te Thesalooniker 2:9)

 Sicher, tiise eyerste kriste praychte kelt hon fer sayn preetich kampanya un aarwayt fon umaniteer hilef. Awer tii hon nii kelt ferlangt wën se ti layt keholef hon Kot aan peete. Ti layt khonte raus suuche een kontripuytsyoon mache orer net, tëm noo tiise funtamente:

•   2^te Korinter 8:12: “Wën ti persoon wilich is, is tas kexenk kuut aan kenom — tëm noo was ti persoon hot, net tëm noo was ti persoon net hot.”

   Was wil tas saan? Wën ti persoon was kept, tas wichtichste is ti uersach hiner traan, net wii fiil tii kep hot.

•   2^te Korinter 9:7: “Yeete eene sol mache was eyer in sayn hërts pexlos hot, net keeche sayn wile orer ketswung, wayl Kot liipt weer mit frooheet kept.”

   Was wil tas saan? Kot wil net hon tas yemant sich ketswung xpiirt fer een kontripuytsyoon mache. Tee kefalt sich wën een persoon raus suucht tas mache fom hërts aus.

 Ti Piipel is kans taytlich: Kot nëmt net aan ale relichyoone orer ale sorte aanpeetung. (Matheus 7:21-23) In een xtark profetsii, tuut ti Piipel al ti falxe relichyeese orkanisatsyoone mit een huure fraa ferklayche. Warom? Wayl tii xafe mit te rechiirunge fer kelt un anere tinge kriin; un tii tuun layt fon ale natsyoone hiner keen. (Apokalipsis 17:1-3; 18:3) Ti profetsii saat aach was klaych mit te falxe relichyoone pasiire tuut: Kot tuut se xtroofe. (Apokalipsis 17:15-17; 18:7)

 Pis tiise tsayt khomt, Kot wil net hon tas ti layt hiner kang wëre orer sich fon tëm wech hale weeche ti xlechtichkheet fon te falxe relichyoone. (Matheus 24:11, 12) Tee wil hon tas eerliche layt tëm in te richtich aat tiine un aus rayse fon te falxe relichyoone. (2^te Korinter 6:16, 17)