Es siit aus tas iweraal kepts unkerechtichkheet. Kuk mool ploos 2 payxpiile fon layt woo unkerecht in kexpërt waare.

•   In te Fereenichte Xtaate fon Amërika, waar een man unkerecht inkexpërt torich neekst 38 yoore. In yanuer fon 2018, hot te richter kexikt tëm pefraye; een DNA eksam hot pewayst tas eyer unxultich waar.

•   In septemper fon 1994, sin 3 yunge mëner in kexpërt kep in een lant in Afrika. Ti uersach: ti wolte net im militeer tiine weeche sayn kewise. In septemper fon 2020, waare se xon 26 yoore in te katee, opwool se nii akusiirt waare orer foer een richter khom sin.

 Wëns tuu unkerechtichkheet mit kemacht host, fiilaycht host tuu tas selwiche kexpiirt wii Yoop, eene man fon te Piipel. Tee hot kesaat: “Ich xraaye noo hilef, awer es kept khee kerechtichkheet.” (Yoop 19:7) Noch soo, ti Piipel ferxprecht een tsayt wën mer woere kerechtichkheet kriin tuun, opwool es hayt unmeechlich aus siit. Un was ti Piipel saat khan tich xon yets helfe mit te unkerechtichkheet um keen.

 Ti layt tuun sich unkerecht aan xtele wayl se Kot sayn oryentiirunge ap xtose. Ti Piipel tsaycht tas ti woer kerechtichkheet fon Kot khomt. (Isayas 51:4) In te Piipel, tas kerechtes mache is ticht ferpunt mit tas richtiches mache. (Psalm 33:5) Wën ti layt mache was richtich is tëm noo Kot sayn kesetse, tuun se ti anere kerecht pehantele. Im keeche teel, ti unkerechtichkheet khomt fon te sint — es wil saan, wën ti layt net aan heere Kot sayn kerechte kesetse. Kuk mool etliche payxpiile:

•   Ekoiismus. Ekoiistixe winxe sin ticht ferpunt mit te sint. (Tyako 1:14, 15) Tas se khene kriin was se wole, fiile layt tuun ti anere hiner keen un tëne unkerecht pehantele. Awer Kot wil hon tas mer ti anere sayn interese foer unseres tuun. (1^te Korinter 10:24)

•   Weenich khëntnis. Etliche tuun ti anere unkerecht pehantele oone tas mërke; noch soo, is tas foer Kot een sint. (Romaaner 10:3) In woerheet, wayl ti layt weenich khëntnis hate, hon se eene fon te kreeste unkerechtichkheete woo xon pasiirt sin, kemacht: tii hon Yeesus Kristus um keprung. (Aphostele sayn Kexicht 3:15, 17)

•   Mënxliche orkanisatsyoone un itee woo net pariire. Ti politixe un relichyeese orkanisatsyoone un aach ti kexefte saan tas se ti kerechtichkheet uf muute tuun. Awer in woerheet, weeche tëne, kepts fiile feeler, uneerlichkheet, prekonseyt, kiirichkheet, intolerans un kroose ekonoomixe unerxiite tswixich ti layt. Weeche tas ales, sin ti layt unkerecht pehantelt. Etliche woo tiise orkanisatsyoone pay xteen, wole tas richtiches mache. Awer am ën, ales was ti mënxe mache woo net mit Kot sayn oryentiirunge xtimt, tuut net pariire. (Eklesyastes 8:9; Yeeremias 10:23)

 Yawool. Tee hast ti unkerechtichkheet un al ti aktsyoone un aanxtelunge woo too hiner traan sin. (Xpriiche 6:16-18) Tee hot te profeet Isayas inspiriirt se xraype: “Ich, Yeehoowa, a liipe ti kerechtichkheet. Ich hase ti xteeleray un ti unkerechtichkheet.” (Isayas 61:8)

 Tas Kesets woo Kot fer ti israeliiter friier kep hot, hot ketsaycht tas eyer wolt hon tas sayn folek kerecht weyer. Tee hot kexikt tas ti richter solte net sich khaafe lose orer was aneres mache woo khent ti kerechtichkheet fertreete. (Teuteronoomyum 16:18-20) Tee hot ti israeliiter konteniirt woo Sayn kesetse net aan keheert hon un woo ti aarme hiner kang hon. Un tsum xlus, hot eyer ti israeliiter net mee aan kenom wayl se noo kelos hon sayn kesetse aan heere. (Isayas 10:1-3)

 Sicher. Ti sint is hinich ti kans unkerechtichkheet un Kot tuut torich Yeesus ti sint wech xafe un ti mënxe noch mool perfekt lose. (Yoohan 1:29; Romaaner 6:23) Kot hot aach een Raych in kextelt. Tiise Raych tuut een kerecht nay welt pringe un tat tuut ti kerechtichkheet iwerhant nëme. (Isayas 32:1; 2^te Pheeter 3:13) Fer mee iwer tiise himlixe Raych wise, kuk te wiiteo Was is Kot sayn Raych?

 Wën ti kerechtichkheet iwerhant nëmt, tuun al ti layt friit un sicherheet hon. (Isayas 32:16-18) Fer Kot, hon al ti mënxe tas selwiche weyert. Tes weeche wëre al mit kerechtichkheet pehantelt. Ti traurichkheet, xmërts un phayn woo ti unkerechtichkheet pringt, tuun nii mee eksistiire. Un mit te tsayt tuun ti xlechte tinge woo mer friier mit kemacht hon uns nii mee phayn pringe. (Isayas 65:17; Apokalipsis 21:3, 4) Fer mee se wise, kuk ti lisyoon 33 fom puuch Los tich kuut keen im leepe fer imer!

 Ia. Es is xon pewayst kep tas mer khene uf te piiplixe profetsiie traue, tas was ti Piipel iwer kexicht un syens saat richtich is un tas ti piicher fon te Piipel naner xtime tuun. Tas ales tsaycht tas mer khene uf sayn ferxpreche traue. Fer mee se wise iwer warom khene mer uf te Piipel traue, kuk ti neekste wiiteos un artikele:

•   Khëne mëyer sicher sin tas ti Piipel woer is? (wiiteo)

•   “6 Piiplixe profetsiie woo sich hayt xon erfiile”

•   “Ferxtërkt torich “tas Profeetixe Wort” (wiiteo)

•   “Khene mer aan ti Piipel klaape?”

 In te piiplixe tsayte, hon kuute layt kemacht was se khonte tas se net unkerecht pehantelt weyere. Tsum payxpiil, een mool wolte se te aphostel Phaul tsu een unkerecht kericht nëme woo khent sayn toot pringe; xtats tiise unkerechtichkheet ruych aan nëme, hot Phaul kemacht was eyer khont — tee hot tsum Sësar aan kehal. (Aphostele sayn Kexicht 25:8-12)

 Noch soo, ekaal was ti mënxe mache, tii tuun nii es hin kriin ti kanse unkerechtichkheet uf te welt tsum ën pringe. (Eklesyastes 1:15) Awer etliche layt hon kemërkt tas wën se klaape ëntwikele aan Kot sayn ferxpreche fon een kerechte nay welt, khene se torich ti ëngstlichkheete triwer wech khome un friit xpiire, soo kaar wën se unkerechtichkheet mit mache.