Es kept imer weenicher ferninftiche layt uf te welt. Fiile pasyente sin krop un xraaye mit te toktere; es kept unfoliche layt woo mim luftxif reese woo mache soo kaar ti aarwayter wee; repëlixe khiner ferxpote, ameasiire un haue sayne leerer; un soo lang wii etliche politixe layt xeemliche tinge mache, anere fersuuche wayse tas se ferninftich sin.

 Ti Piipel is een kwel fon aanreete woo mer traue khene. Too tepay, lërnt tii uns in wii ferninftich sin un leet uns aus warom soo weeniche layt hayt tsu taach ferninftich sin.

 Wën een persoon ferninftich is, tuut se sich aan xtele in een aat woo kuut, richtich un kexayt is. Awer es kept imer weenicher layt woo sich soo aan xtele.

•   Khërtslich, in een unersuuchung in te Fereenichte Xtaate, hon ti layt kesaat tas, in te letste 22 yoore, ti aanxtelung fon te layt waar noch nii soo xlecht kewees wiis hayt is.

•   In een aner unersuuchung, woo mee wii 32.000 layt fon 28 lënter entrewistiirt hot, hon 65% fon te layt kesaat tas ti ferninftichkheet fon te layt hayt tsu taach is te xlimste woo se xon kesiin hon.

 Ti Piipel hot xon foer raus kesaat tas ti layt teete soo hayt sin.

•   “In te letste taache tuun xlime tsayte khome, woo xweyer wëre fer um se keen. Wayl ti mënxe tuun ploos sich selepst liipe, tuun tas kelt liipe, wëre hoochnaasich, inkepilt, tuun Kot un ti mënxe ferfluuche, tuun net ti eltere aan heere, wëre unpetanklich, … tuun khee selepst kontrol hon [un] wëre krop.” (2 Timoteus 3:1-3)

 Fer mee wise iwer wii tiise profetsii sich hayt am erfiile is, lees te artikel “Meecht ti Piipel xon foer raus kesaat hon wii ti layt hayt tenke un sich aan xtele teete?”.

 Opwool ti ferninftichkheet in te welt imer weenicher kept, hon milyoone raus kriit tas ti Piipel een sicher kwel fon aanreete is iwer wii ferninftich sin. Sayn aanreete “hon een fest funtament, yets un fer imer”. (Psalm 111:8) Kuk yets etliche aanreete:

•   Was ti Piipel saat: “Ales was teyer wolt tas ti mënxe fer aych mache solte, solt teyer aach kraat soo fer tëne mache.” (Matheus 7:12)

   Was wil tas saan? Meyer sole ti anere kuut un mit respekt pehantele, soo wii meyer teete kërn pehantelt wëre.

•   Was ti Piipel saat: “Wayl teyer ti liieray neewe kelos hot, xprecht ti woerheet eene mim anere.” (Ëfeser 4:25)

   Was wil tas saan? Meyer sole eerlich sin in ales was mer saan un mache.

 Fer mee too triwer wise, lees:

•   A Sentinela mim thitel “Como saber o que é certo e errado?”.

•   Te artikel “Tolerância — O que a Bíblia diz?”.