Es is kerechent kep tas 5 pilyoone layt tuun ti oliimpixe xpiile fon 2024 kuke, woo sportiste fon 206 lënter un teritoorye teel mache tuun. Thomas Bach, woo presitent fon te Internatsyonaal Oliimpix Komisyoon is, hot kesaat: “Meyer mache teel in een ewënt woo ti welt eenich un in friit lost.” Tee saat noch: “Wole mer ti oliimpixe xpiile in friit fayre, wii ploos een eenich mënxheet, een tuun ti unerxiit woos unich uns is.”

 Khene ti oliimpixe xpiile wërklich soo was krooses hin kriin? Meechte mer khene wërklich eene taach friit un eenichkheet hon?

 Ti oliimpixe xpiile fon tiise yoer hale sich net ploos aan ti sports traan. Tii pringe sotsyaale un politixe sache foer woo ti layt net iwer eens khome; sin sache soo wii: mënxliche rechte, rasismus, tiskriminatsyoon weeche relichyoon un unkerechtichkheet.

 Ale tëm internatsyonaale sport ewënte, soo wii ti oliimpixe xpiile, mache tas ti layt xpas hon, tiise ewënte tsayche aach aanxtelunge woo ti layt teele, xtats tsum woere friit un eenichkheet nëme.

 Ti Piipel hat xon foer raus kesaat tas, in unser taache, teete ti layt sich uf een aat aan xtele woos xweyer lose teet sich eenich hale. (2 Timoteus 3:1-5) Fer mee iwer tiise profetsii lërne, lees te artikel “Meecht ti Piipel xon foer raus kesaat hon wii ti layt hayt tenke un sich aan xtele teete?”

 Ti Piipel kept uns ti hofnung tas ti kanse welt wërt eene taach in friit un eenichkheet sin. Tii saat uns tas “Kot sayn Raych”, woo een rechiirung im himel is, wërt ale layt uf te eyert eenich lose. (Lukas 4:43; Matheus 6:10)

 Te Kheenich fon tiise Raych, Yeesus Kristus, wërt friit fer ti kans eyert pringe. Ti Piipel saat:

•   ‘Te kerechte tuut pliie, un es tuut iwermeesich friit kepe.’ (Psalm 72:7)

•   “Tee tuut te aarm persoon woo hilef ferlangt, pefraye ... Tee tuut tëne fon te unertrikung un wyolënts pefraye.” (Psalm 72:12, 14)

 Xon hayt, Yeesus sayn inlërnunge hon milyoone layt in 239 lënter eenich kelos. Wayl se Kristus noo keen, hon Yeehoowa sayn Tsayer kelërnt wii in friit leepe. Fer mee too triwer lërne, lees tas piichelche A Sentinela mim theema “Como parar o ciclo do ódio.”