Torich ti letste 30 yoore, hon fiile layt ketenkt tas ti ferpiinunge tswixich ti rechiirunge fon te welt stapiliteet hate un waare soo kaar sich am ferpesere. Awer, weeche ti letste ewënte woo pasiirt sin, tuun fiile layt sayn mënung ënere.

•   “Ti layt hon pang tas te kriich in Kasa anere lënter petrefe tuut, wayl Israël un Hezbollah tuun sich naner atakiire aan te krëns fom Liipanon.” (Reuters, 6^te yanuer 2024)

•   “Te Iraan hot fiile krupe soltaate woo in unerxiitliche pletse atakiire tuun, un tii hon aach pletslich aan kefang sayne nukleare wafe penutse. Un noch, Iraan hot yets ti unerxtitsung fon Ruslant un Xina. Weeche tas, is tiise lant een kroos kefoer fer ti lënter fom Ositent.” (The New York Times, 7^te yanuer 2024)

•   “Ti atake fon Ruslant tuun imer noch fiil fernichtung in kans Ukraanya pringe.” (UN News, 11^te yanuer 2024)

•   “Weeche ti ferkreesung fon te ekonomii un ti militeer kraft fon Xina, te wunx woo Taiwan hot fer fon khee lant ap hënge un ti propleeme woos kept tswixich Xina un ti Fereenichte Xtaate fon Amërika, is es laycht tas een kroos konflikt in te welt pasiire khent.” (The Japan Times, 9^te yanuer 2024)

 Meecht ti Piipel etwas saan iwer ti unsicher situatsyoon uf te welt hayt? Un meecht tiise situatsyoon tsu een welt kriich nëme?

 Ti Piipel hot net een spetsiifix kriich fon unser taache foer raus kesaat. Awer tii saat tas, in te tsayt woo mer leepe, teets mee kriiche kepe woo “te friit fon te eyert wech xafe” teete. (Apokalipsis 6:4)

 Tas puuch Tanyël hot foer heyer kesaat tas, “in te tsayt fom ën”, teete ti welt rechiirunge “eene te aner xupe”, es wil saan, eene keeche te anere khëmpfe fer mee macht kriin. In tiise khampf, teete se too tepay sayn militeer kraft tsayche un aach sayn “weyertliche tinge”, orer kelt, penutse. (Tanyël 11:40, 42, 43)

 Ti Piipel saat tas ti situatsyoon uf te welt wërt xlimer kepe eps peser wërt. Yeesus hot foer heyer kesaat tas es “tuut een kroos tripulatsyoon kepe, wii es noch nii fom aanfang fon te welt pis yets kep hot”. (Matheus 24:21) Tiise “kroos tripulatsyoon” tuut tsu een kriich nëme woo Armaxeton heest. Tas is “te kriich fon tëm kroose taach fom Ale Mechtiche Kot”. (Apokalipsis 16:14, 16)

 Awer, xtats ti mënxheet fernichte, tuut te Armaxeton ti mënxheet rete. Torich tiise kriich, tuut Kot wech xafe ti mënxliche rechiirunge, woo hayt soo fiil fernichtung torich sayn kriiche pringe. Soo, tuut te Armaxeton friit pringe woo fer imer hale tuut. Fer se ferxteen wii tas pasiire tuut, lees tiise artikele:

•   “Was is te Armaxeton?”

•   “O Armagedom é uma boa notícia!””