Wëns tuu tenkst aan yemant woo mit ëngstlichkheet a um keet, fiilaycht tenkst tuu aan yemant woo soo fiil pang hot tas eyer kaar niks mache khan, yemant woo khan net fons pet uf xtaye moynts frii, orer yemant woo noo un noo iwer sayn soriche xprecht.

 Etliche tuun sich wërklich soo aan xtele wën se ëngstlich sin. Awer ti unersuucher hon raus kefun tas anere — hauptseechlich mëner — khene sich anerste aan xtele. Een relatooryum saat tas mëner tuun eftas “alkohool, trooke un metikamënte penutse fer mit te ëngstlichkheet um keen. Tes weeche, was aus siit wii een alkohool propleem, khan in woerheet een tiif ëngstlichkheet sin. Un ëngstliche mëner tuun sich ofts pees un wuutich aan xtele”.

 Kewis net al ti mëner tuun sich ekaal aan xtele. Awer een tuun wii yemant mit te ëngstlichkheet um keet, tas is een propleem woo yeete taach kreeser wërt in tiise ‘xlime tsayte woo xweyer sin fer um se keen’. (2^te Timoteus 3:1) Wëns tuu ëngstlichkheet mit machst, meecht ti Piipel tich helfe khene?

 Ti Piipel hot fiile kuute aanreete woo uns helfe wën mer ëngstlich sin. Kuk mool 3 payxpiile:

1.  1. “Sayt net ëngstlich weeche te neekste taach, wayl te neekste taach hot sayn aychne soriche. Yeete taach pringt kenuuch xwiirichkheete mit sich.” (Matheus 6:34)

    Was wil tas saan? Es is peser uns net tsu fiil ketanke mache mit was im futuer pasiire khan (orer net). Ofts, ti xlechte tinge woo mer uns foer kextelt hate, tuun kaar net pasiire. Als mool tuun ti situatsyoone sich soo kaar ferpesere.

    Fersuuch tas too mache: Is es xon mit tich pasiirt tas tuu kewaart host tas een situatsyoon xlecht ap laafe teet, awer am ën is tas kaar net pasiirt? Tenk tich too traan. Tan tenk aan tëm propleem woos tuu yets mit machst. Sii ti tinge wii se wërklich sin un froo tich: “Was is ti xans tas tas too een xlim propleem wërt?”

2.  2. “Soo wii ayse xlayft ayse, soo eene man xlayft sayn fraaynt.” (Xpriiche 27:17)

    Was wil tas saan? Ti anere khene uns helfe mit te ëngstlichkheet um keen, awer mer mise se lose tas mache. Im xtant hon se xon was eenliches mit kemacht un khene uns nutsliche aanreete kepe. Awer aach wën se net was eenliches mit kemacht hon, khene se uns ferweenichst helfe ti situatsyoon fon te ausweenich sayt siin.

    Fersuuch tas too mache: Khënst tuu yemant woo was eenliches mit kemacht hot? Fiilaycht khan tiise fraaynt tich kuute aanreete kepe. Froo tëm was in tëm sayn situatsyoon funtsyoniirt hot orer net.

3.  3. “Xmayst ayre kanse soriche uf Kot, wayl Eyer aych uf phast.” (1^te Pheeter 5:7)

    Was wil tas saan? Kot tuut sich fiil khimere mit tëne woo layte. Tee laat uns in tsu tëm peete iwer ales was uns ketanke macht.

    Fersuuch tas too mache: Mach een list fon te tinge woo tich ëngstlich lose. Tan peet tsu Kot too triwer; lee tëm aus yeete propleem woos tuu mit machst un ferlang Sayn hilef fer too temit um keen.

 Ti Piipel kept net ploos aanreete iwer wii mit te ëngstlichkheet um keen — tii ferxprecht tas klaych, ti soriche woo uns hayt ketanke mache, net mee eksistiire tuun. Wii khan soo was pasiire?

 Kot sayn Raych pringt tsum ën ti tinge woo uns ëngstlich lose. (Apokalipsis 21:4) Unich tiise rechiirung, tuun mer soo kaar ti tinge ferkese woo uns ëngstlich orer stresiirt kelos hon. (Isayas 65:17)

 Tas is te futuer woo “te Kot woo friit kept” tich kepe wil! (Romaaner 16:20) Tee lost uns sicher: “Ich wees kans kenau was ich fer aych pleene. (…) Ich wil tas teyer friit hot, net unklik. Ich wil aych een futuer un een hofnung kepe.” (Yeeremias 29:11)