Tuust tuu tich aarich miit xpiire weeche ti pang fom coronavirus? Wën yaa, tuu pist net aleen. Torich xon phaar moonate, mise layt fon te kans welt sich aan phase weeche ti pantemii. Te Dr. Hans Kluge, rechyonaal tirektoer fon te Welt Kesuntheet Orkanisatsyoon in Europa, hot kesaat tas “fiile hon haufe tinge uf kep fer te coronavirus um hale sich ferprayte”. Tee saat noch: “In soo sorte situatsyoone, es is normaal un laycht sich oone muut xpiire, es wil saan, miit plaype.”

 Wëns tuu ti pantemii miitlichkheet mit machst, playp net oone muut. Ti Piipel is fiile layt am helfe mit tiise xlim tsayt um keen un tii khan tich aach helfe.

•  Was is ti pantemii miitlichkheet?

•  Warom is ti pantemii miitlichkheet was ërnstes?

•  Was fer piiplixe aanreete khene tich helfe torich ti pantemii miitlickheet triwer wech khome?

•  Piiplixe tekste fer mit te pantemii miitlickheet um keen

 Ti pantemii miitlichkheet is net een krankheet, awer es pexraypt ti normaale xpiirunge woo ti layt hon wayl ti pantemii sayn leepe keënert hot un tëne unsicher iwer te futuer kelos hot. Ti aanxtelung fon yeete persoon is eensich, awer etliche sinaale fon te pantemii miitlichkheet sin:

•   Unmuutichkheet

•   Ënerunge in was ti persoon est un sayn xloof rutiin

•   Sich nerwees xpiire

•   Sich stresiire weeche flichte woo friier laycht kemacht waare

•   Xweyer fine fer sich konsentriire

•   Sich oone hofnung xpiire

 Ti pantemii miitlichkheet khan kefeerlich fer unser un ti anere sayn kesuntheet sin. Wën mer net too tekeeche khëmpfe, khene mer mit te tsayt te muut ferliire fer uns keeche te coronavirus uf phase. Meyer khente aan fange se rechne tas tee net soo kefeerlich is, opwool eyer sich ferprayt un soo kaar layt um pringt. Im xtant winxe mer mee frayheet wayl mer xon leetich sin fon uns soo fiil uf phase. Awer tas khan in kefoer xtele unser un ti anere sayn kesuntheet.

 Torich tiise xlime tsayte, fiile xpiire was ti Piipel saat: “Wëns tuu oone muut in te xweyere tsayte playpst, tayn kraft tuut weenich sin.” (Xpriiche 24:10) Ti Piipel khan uns helfe mit te unmuutiche situatsyoone um keen, too tepay tiise pantemii.

•   Hal tich fiisix wayt wech, awer los net noo mit te anere xpreche

   Ti Piipel saat: “Te woere fraaynt (…) wërt een pruuter in unruyche tsayte.” (Xpriiche 17:17)

   Warom is tas wichtich? Ti woere fraaynte tuun uns uf muute. (1^te Thesalooniker 5:11) Im keeche teel, sich tsu fiil tsayt aleen hale khan unser kesuntheet fersaue. (Xpriiche 18:1)

   Fersuuch tas too mache: Xprech mit tayn fraaynte torich wiiteokonferëns, e-mail, mensagens orer ruuf se aan. Fertseel mit tëne wëns tuu een xlechte taach host un tuu se imer frooe wii se traan sin. Teyer khent xpreche iwer was aych am helfe is mit te pantemii um keen. Fersuuch aach was kuutes fer tayn fraaynte mache; soo khan een xlechte taach, een peser taach wëre.

•   Mërk ti kuute tinge in tayn situatsyoon un tuu se kuut penutse

   Ti Piipel saat: “Penutst ayre tsayt in te pest aat wiis meechlich is.” (Ëfeser 5:16)

   Warom is tas wichtich? Tayn tsayt kuut penutse khan tich helfe positiiw plaype un tich net tsu fiil ketanke mache. (Lukas 12:25)

   Fersuuch tas too mache: Xtats tich konsentriire aan was tuu net mee mache khanst, tenk aan te kuute tinge woos tuu yets mache khanst. Tsum payxpiil, fiilaycht yets host tuu kenuuch tsayt fer een hobby orer een aner perseenlich proyëkt. Orer im xtant khanst tuu mee tsayt mit tayn familye fertraype.

•   Hal een rutiin

   Ti Piipel saat: “Ales sol (…) mit ortnung pasiire.” (1^te Korinter 14:40)

   Warom is tas wichtich? Fiile layt tuun sich froo un in sicherheet xpiire wën se een rutiin hale.

   Fersuuch tas too mache: Mach een plaan woo mit tayn situatsyoon hayt phast. Pleen spetsiifixe xtune fer tayn aarwayt mache un fer tayn flichte tehëm un fon te xuul uf phase. Un ferkes tich net xtune pleene fer tich tichter pay Kot xafe. Tuu aach tepay in tayn rutiin rechne aktiwiteete woo kuut fer tich sin, wii tsayt mit tayn familye plaype, was traus mache un tich esersitiire. Als mool tuu tayn plaan wiiter noo kuke un mach ti neetiche ënerunge.

•   Phas tich aan tëm noo ti yooretsayte

   Ti Piipel saat: “Ti kluuch persoon siit ti kefoer un ferxtekelt sich.” (Xpriiche 22:3)

   Warom is tas wichtich? Ti sunexayn un ti friix luft sin wichtich fer tayn fiisix un mentaal kesuntheet. Awer khan sin tas es net soo laycht is nutse too tefun kriin weeche tas plats un yooretsayt woos tuu pist.

   Fersuuch tas too mache: Wën te winter ticht is, tuu tayn haus un tas plats woos tuu xafst in richte fer ti kreeste nutse fon te sunexayn kriin. Pleen aktiwiteete woos tuu traus mache khanst, aach wën tas khalt is. Wëns meechlich is, tuu wërmer tsaych khaafe tas tuu khanst mee tsayt traus plaype.

   Wën te somer khomt, tenk tich traan tas mee layt tuun tsayt traus plaype. Soo, phas tich kuut uf. Pleen woos tuu hin keen wilst, un kee tat hin wën es weenicher layt tat sin.

•   Phas tich wayter uf keeche te coronavirus

   Ti Piipel saat: “Te tum phast net uf un klaapt aan sich selepst.” (Xpriiche 14:16)

   Warom is tas wichtich? Te coronavirus khan toot pringe un meyer khene aan kextoch sin wën mer net uf phase.

   Fersuuch tas too mache: Kuk imer noo ti oryentiirunge woo im plats woos tuu woonst kep sin un mërk eps tuu tich noch am uf phase pist. Eriner tich: was tuu machst, khan tich, tayn familye un anere petrefe.

•   Ferxtërk tayn fraayntxaft mit Kot

   Ti Piipel saat: “Khomt ticht tsu Kot, un Eyer khomt ticht tsu aych.” (Tyako 4:8)

   Warom is tas wichtich? Kot khan tich helfe mit kwalkee xwiirichkheet um keen. (Isayas 41:13)

   Fersuuch tas too mache: Lees een xtik fon Kot sayn Wort, ti Piipel, yeete taach. Tiise Piipel leesung prokram khan tich helfe aan fange.

 Wust tuu tas Yeehoowa sayn Tsayer tuun wayter sayn fersamlunge hale, opwool ti pantemii fon coronavirus? Uf te kans welt hale se wayter — torich wiiteokonferëns — sayn fersamlunge, yoers rechyonaal konkrës un Aantenke fon Yeesus sayn toot. Wëns tuu wilst tiise fersamlunge kuke, tuu se kontaktiire.

 Isayas 33:24: “Khee pewooner tuut saan: ‘Ich sin krank.’”

 Was wil tas saan? Kot ferxprecht ale sorte krankheete tsum ën pringe.