Sich tsu fiil ketanke mache, khan tayn kesuntheet un tayn frooheet xteere. Es khan soo kaar kreeser propleeme pringe wii tee woo meyer am aanfang uns ketanke kemacht hon.

•  Tuu net tsu fiil xlechte notisye kuke. Tuu prauchst net al ti kleenichkheete wise iwer ti propleeme woo pasiire. Tsu fiil tsayt too traan tuun, tuut tich ploos ëngstlich un mit pang lose.

   Ti Piipel saat: “Een wee kexlaatne kayst tuut ti kraft fon yemant wech hoole.” (Xpriiche 17:22)

   “Imer ti letste un xrekliche informatsyoone kuke, khan wii een sucht sin. Awer tas is net kesunt. Wën ich weenicher notisye kuke, tuun ich mich net tsu fiil ketanke mache.” — John

   Tenk mool noo: Wii ofts must tuu ti letste notisye kuke?

•  Hal een rutiin. Fersuuch uf xtaye, ese, xafe un xloofe keen imer in te selwich xtun. Wëns tuu tich foer pleenst, tuust tuu xpiire tas tayn leepe mee normaal is. Un tes weeche wërst tuu net soo ëngstlich.

   Ti Piipel saat: “Tëm flaysicher sayn pleen kepe sicher kuute resultaate.” (Xpriiche 21:5)

   “Wën ti pantemii fon coronavirus aan kefang hot, hon ich mayn rutiin kans im xtich kelos. Un ich hon aan kefang tsu fiil tsayt mit ferkniichung fertraype. Ich wolt mayn tsayt peser penutse. Soo hon ich uf kexrip was ich yeete taach mache must.” — Joseph

   Tenk mool noo: Host tuu een rutiin woo tich helft am ën fon te taach xpiire tas tuu fiil kemacht host?

•  Hal tich traan aan te kuute tinge in tayn leepe. Wëns tuu ekaal tenke tuust aan was tuu khenst anerste kemacht hon, orer ti xlechte tinge woo khene im futuer pasiire, tuust tuu tich ploos ëngstlich xpiire. Xtats tas, fersuuch tich traan tenke tswaay orer tray tinge weeche was tuu petanklich pist.

   Ti Piipel saat: “Tsaycht aych petanklich.” (Koloser 3:15)

   “Wën ich ti Piipel leese, tuun ich net mayn ketanke fol xlechte notisye lose. Tas helft mich positiiw sin. Es heert sich keweenlich aus, awer es funtsyoniirt!” — Lisa

   Tenk mool noo: Tuust tuu ofts tenke aan te xlechte tinge woo in tayn leepe pasiire un ti kuute tinge ferkese?

•  Tenk aan te anere. Wëns tuu imer ëngstlich pist, fiilaycht tuust tuu rechter aleen plaype; awer xtats tas, fersuuch ti anere helfe.

   Ti Piipel saat: “Suucht net ploos ayre aychne interese, awer aach ti interese fon te anere.” (Filiper 2:4)

   “Etwas fer ti anere mache, lost mich froo. Es tuut tëne helfe froo plaype un in te selwich tsayt, tuun ich mich net soo ëngstlich xpiire. In woerheet, hon ich khee tsayt fer mich ketanke mache.” — Maria

   Tenk mool noo: Khënst tuu yemant woo hilef praycht? Wii khanst tuu tëm helfe?

•  Phas tayn kesuntheet uf. Tuu kenuuch esersiis mache un ruue. Tuu was kesuntes ese. Tayn kesuntheet uf phase, khan tich helfe positiiwer sin un tich net soo ëngstlich xpiire.

   Ti Piipel saat: “Esersiis mache is kuut fer tich.” (1^te Timoteus 4:8, noote)

   “Ich un mayn soon khene net soo fiil esersiis traus mache wii mer kërn wolte. Soo mache mer imer esersiis tehëm. Tas hot uns keholef frooer sin un aach liiplicher un ketulticher eene mim aner.” — Catherine

   Tenk mool noo: Fer kesunter sin, khanst tuu mee uf phase mit was tuu est orer mee esersiis mache?

 Tiise itee hon fiile layt keholef sich net tsu fiil soriche mache. Was noch hot se keholef? Ti ferxpreche fon te Piipel iwer een peser futuer lërne — ferxpreche woo mer traue khene. Kuk ti lisyoon 33 fom piichelche Los tich kuut keen im leepe fer imer!