Layt uf te kans welt sin ëngstlich weeche ti politix wyolënts woo am pasiire is.

•   In Mëksiko, sin 39 politixe kantitaate um keprung kep. Noch nii waar tiise numer soo kroos kewees. Anere aate fon politixe wyolënts tuun aach pasiire. Tas ales hot ti layt ferxrok un tëne sayn acht fon te waal fon 2023-2024 ap kelenkt.

•   Khërtslich, in Europa, sin phaar wyolënte ewënte pasiirt woo mit politik tsu tuun hate. Too tepay hon se fersuucht te haupste minister fon Slowaakya um pringe. Es is in 15^te maay fon 2024 pasiirt.

•   Ti layt in te Fereenichte Xtaate fon Amërika sin ferxrok kep wayl es aus kesiin hot tas, fer tas tsweete mool, yemant fersuucht hot Donald Trump um pringe, woo friier te presitent waar. Es is in 15^te septemper fon 2024 pasiirt.

 Warom kep tas soo fiil politix wyolënts? Wërt tas eene taach tsum ën khome? Was saat ti Piipel too triwer?

 Ti Piipel hot kesaat tas in unser taache — woo kenënt sin “ti letste taache” — teete fiile layt sich aan xtele in een aat woo wyolënts pringt un woo macht tas se net xtime tuun.

•   ‘In te letste taache tuun xlime tsayte khome, woo xweyer wëre fer um se keen. Wayl ti mënxe wëre unpetanklich un untroy sin; wëre net wilich sin fer mit te anere xtime, wëre krop, hinerlistich, tik khopich un hoochmuutich sin.’ (2 Timoteus 3:1-4)

 Ti Piipel hot aach foer raus kesaat tas propleeme wii repelyoone keeche ti rechiirung un politix unruychkheete teete in tiise tsayt pasiire. (Lukas 21:9) Toch noch, ti politix wyolënts un ti layt too teweeche keteelt sin, wërt net fer imer hale.

 Ti Piipel leet aus tas Kot wërt ale mënxliche rechiirunge ersetse mit sayn aychne himlix rechiirung.

•   ‘Te Kot fom himel tuut een raych in setse woo tuut ale rayche ferprokle un tsum ën pringe, un ploos tas raych tuut fer imer plaype.’ (Tanyël 2:44)

 Kot sayn Raych wërt ti layt wërklich eenich lose, un friit fer ti kans welt pringe.

•   Te rechiirente fon Kot sayn Raych, Yeesus Kristus, is kenënt wii te “Prins fom Friit”; tee tuut sich sicher lose tas ‘te friit khee ën kriit’. (Isayas 9:6, 7)

•   Xon hayt, tii woo ti kesetse fon tiise Raych aan heere, lërne wii in friit se leepe. Tes weeche, saat ti Piipel: “Tii tuun sayn xwaarte tsu pluuch xaare xmiite un sayn lantse tsu traupe sichele xmiite. Ti natsyoone tuun net mee tas xwaart eene keeche te anere uf heepe, un tii tuun aach net mee te kriich lërne.” (Isayas 2:3, 4)

 Fer mee too triwer lërne, lees te artikel “O que o Reino de Deus realizará?” un kuk te wiiteo Was is Kot sayn Raych?.