Ti khoste fon te kriiche sin aarich kroos.

•   “In te letst yoer, hon ti rechiirente uf te welt mee kelt in te kriiche aus kep wii in te kans mënxlich kexicht — 2,2 trilyoone tolare, tas is mee wii 10 trilyoone reaale.” (The Washington Post, 13^te feepruer 2024)

 Awer ti kriiche tuun net ploos kelt khoste. Tsum payxpiil, kuk ti situatsyoon fon te kriich in Ukraanya.

•   Soltaate. Fon aanfang fom kriich aan, 2 yoore tsurik, sin neekst 500 tausent soltaate um keprung orer ferletst kep, tëm noo ti numere.

•   Layt fom lant. Tëm noo ti Orkanisatsyoon fon te Fereenichte Natsyoone, mee wii 28 tausent layt sin um keprung orer ferletst kep. Awer een ofitseer fon te OFN hot kesaat: “Es is unmeechlich ti kanse khoste fon tiise xreklich kriich fer ti layt rechne.” a

 Un noch, tas eelent woo ti kriiche pringe, is aarich kroos.

•   114 milyoone. Pis septemper fon 2023, tas is te numer layt uf te kans welt woo muste sayn hayser lose weeche te kriich un ti wyolënts.

•   783 milyoone. Tas is te numer layt woo kroonix hungernoot layte. “Ti konflikte sin noch te kreest uersach warom ti layt hunger layte. Un 70 portsënt fon te layt woo hungernoot mit mache, leepe in pletse woo fom kriich un wyolënts petrof sin.” (Welt Esmitel Prokram)

 Meechte ti kriiche een ën kriin? Khene mer hofe tas es friit kepe tuut? Wëre eene taach ti rekurse fom planeet penutst fer ti hungernoot un ti aarmheet aans ën pringe? Was saat ti Piipel too triwer?

 Ti Piipel hot foer raus kesaat tas es fiil kriiche kepe teet. Tii hot tas in een simpoolix aat kesaat wii se pexrip hot een rayter woo uf een kaul kehokt is.

•   “Un eene aner kaul woo fayer farpich waar, is raus kang. Tee woo uf tëm kehokt hot, hot tas recht kriit fer te friit fon te eyert wech xafe, tas ti mënxe sich naner um pringe teete, un fer tëm is een kroos xwaart kep.” (Apokalipsis 6:4)

 Noo tiise simpoolix rayter, khome noch anere tswaay rayter: een representiirt ti hungernoot un te aner te toot, woo weeche krankheete un anere uersache pasiirt. (Apokalipsis 6:5-8) Fer mee iwer tiise profetsii wise un aach warom khene mer sicher sin tas tii in unser taache sich am erfiile is, lees te artikel “Quem são os cavaleiros do Apocalipse?”

 Klaych, wëre ti rekurse fon te Eyert nii mee fer ti kriiche penutst. Awer tas tuut net pasiire weeche ti mënxe sayn aanxtrengunge. Ti Piipel saat:

•   Kot tuut “ti kriiche uf te kans eyert tsum ën” pringe. (Psalm 46:9)

•   Kot tuut ti kroose xaate fon te kriiche fermache. “Tee tuut yeete treene fon tëne sayn aue ap trokne, un es kept kheen toot mee, kheen traurichkheet, kheen krayxe un kheen phayn. Ti friirixe tinge sin xon rom kang.” (Apokalipsis 21:4)

•   Kot tuut sicher lose tas al friit fer imer kriin khene. “Mayn folek tuut in een friitlich plats woone, in sichere hayser un in ruyche pletse.” (Isayas 32:18)

 Tëm noo ti Piipel, ti kriiche un anere tinge woo in unsere taache pasiire, tsayche tas tiise friitlich futuer kans ticht is.

 Wii tuut Kot friit fer ti Eyert pringe? Tee macht tas torich sayn Raych, een rechiirung woo im himel is. (Matheus 6:10) Fer se wise was Kot sayn Raych is un was tas Raych fer tich mache khan, kuk te wiiteo Was is Kot sayn Raych?